Read njo ZÜNGDANGBA 21 Bible Online

ZÜNGDANGBA 21 - njo bible

ZÜNGDANGBA 21

¹ Kodang anüolentip nung aliba Kanan nunger Arad chubai Israel Atharim lenmangi arur ta jembiba angashi, pai Israel anema rara aser kar apu.

²Idangji Israeli KIBUBA dang ya oda atemzük, “Nai item nisungtem onok ket nung agütsüra, onoki parnok yimtitem ajak meshimeshiaa samatsütsü.”

³KIBUBAi Israel ola anga, aser Kanan nungerji bendanga agütsü. Anungji Israeli parnok aser par yimtitem meshimeshia raksatsü; anungji iba linük dang Hormab ta aja.

⁴ Parnoki Hor tenem nungi Temerem Tzüyim leni Edom meketdanga ao. Saka nisungtemji lenmang nung tazüzük makai küma,

⁵ parnoki Tsüngrem aser Mosa anema jembia ashi, “Kechiba nenoki onok lisem lima nung asütsüsa Ijip nungi anir adok? Kechiaser idaki amtsük aser tzüa mali. Iba samesa chiyungtsü yagi onok alaker.”

⁶Idangji KIBUBAi parnok rongnung per tesashi yoka item jagi nisungtem dak meji aser Israel nunger aika asü.

⁷Anungji nisungtemi Mosa dang arua ashi, “Onoki temenen menaogo, kechiaser onoki KIBUBA aser na anema temenen jembiogo; onok nungi perji agientsü asoshi KIBUBA dang mepishijang.” Aser Mosai parnok asoshi mepishitsü.

⁸Idangji KIBUBAi Mosa dang ashi, “Per ka yangluang aser aji rangdong ka nung tulokang; aser shiba daksa per jagi mejidir iba dakji reprangang aser taküm alitsü.”

⁹ Anungji Mosai yongmenyin agi per ka yanglu aser aji rangdong ka nung ayu. Idangji shirnok daksa peri mejidir, yongmenyin per dakji reprang aser taküm ali.

¹⁰Tang Israel chirtem apusoa oa Obot nung anen.

¹¹Parnoki Obot nungi apusoa oa Abarim lisem lima Moab jakdang aliba anüdoklen tsütsü anen.

¹²Yang nungjagi parnoki apusoa oa Zered lenten nung anen.

¹³Idak nungjagi apusoa oa Amor nunger litsü tashi oa aliba Arnon lisem lima külen tsütsü anen, kechiaser Arnonji Moab aser Amor nunger tsüngda Moab arrtsü nung lir.

¹⁴Anungji KIBUBA Rara kaket nung ya shia lir. “Sufa nung Waheb, aser Arnon lententem,

¹⁵Aser wabetsa lententem, koba Ar tashi oagi lir, aser Moab arrtsü nung metaloka lir.”

¹⁶Yang nungjagi Beer tashi maneni ao aser tzübu koba nung KIBUBAi Mosa dang ashi, “Nisungtem külemi sentepdakjang, aser ni parnok nem agütsüdi.”

¹⁷Idangji Israeli iba ken aten: “Tzü adokang, o tzübu; Iba tzü indang nenoki ken tenang;

¹⁸Chubatemi atuba tzübu indang, koba nübur tamarenertemi tuok, tamarenertem ajok agi aser parnok mechi agi.” Idangji parnoki lisem lima nungjagi Mattania ao.

¹⁹Mattana nungi Nahaliel, Nahaliel nungi Bamoth,

²⁰Bamoth nungi Moab lenteni aru kong nungi Pisga kolak nungi lisem limaji reprangzüka yok.

²¹Idangji Israeli Amor nunger chuba Sihon dangi osangbenertem yoka ashi,

²²“Ner linük ajanga onok odakjang. Onoki alu leni mesüra tsükmenatzü lu leni memeyiptsü, mesüra tzübu kecha nungia tzü majemtsü. Ner arrtsü maten tashi onoki chuba lenmang nungji aotsü.”

²³Saka Shioni pa arrtsü atena Israel aotsü memela. Pai pei nübur ajak aniten aser Israel anema aremi ao aser Israel anema Yahaz-i arua Israel anema rara.

²⁴Saka Israeli pa nok agi tepset aser par linük Arnon nungi Yabbok tashi agi, oda Ammon nunger litsü tashi, kechiaser parnok arrtsü tashi ita liasü.

²⁵Israeli Amor nunger yimtitem ajak oda Heshbon aser iba temeket yimtitem agi aser parnok idakji ali.

²⁶Heshbonji Amor nunger chuba yimti, shibai taoba Moab chuba anema rara aser pa nungi alinük ajakji oda Arnon tashi rakzük.

²⁷Anungji ken atener jagi ya oda aten: “Heshboni arung aser aji yanglushidakjang, Sihon yimti yangerdakjang.

²⁸Kechiaser Heshbon nungi mi, Sihon nungi milak adokogo. Iba jagi Moab nung, aser Arnon tenem nung kiburtem meyokogo.

²⁹ Oh Moab! Na asoshi aiatai, nenok raksaogo Oh Khemos nisungtem! Pai par jabasotem tejenshir kümdaktsüogo, Aser par jalatem tepuoker kümdaktsüogo, Amor nunger chuba Sihon ket nung.

³⁰Saka onoki parnok kokogo; Heshbonji Dibon tashi lua raksatsüogo, onoki parnok Nofa nungi Medeba tashi oagi samatsüogo.”

³¹Aji oda Israeli Amor nunger linük nung ali.

³²Mosai Yazer ladangi yoker külen parnoki pai temeket nung aliba yimtitem makbang aser yangji aliba Amor nunger aritok.

³³Ajiser parnoki Bashan leni meyip, aser Bashan chuba Og-i parnok anema pei nisung ajak Edre-i nung raratsü adok.

³⁴Saka KIBUBAi Mosa dang ashi, “Pa tetsübu, kechiaser pa, par nübur ajak aser par linükji ni ne nem bendanga agütsüogo. Heshbon nung aliba Amor chuba Sihon dak inyakba ama pa daka inyaktsü.”

³⁵Anungji parnoki pa, par jabasotem aser par nisungtem ajak, oda kata anünga metoktsüi tepset. Aser parnoki par linük ajongaji agi.