Read njo ZÜNGDANGBA 22 Bible Online

ZÜNGDANGBA 22 - njo bible

ZÜNGDANGBA 22

¹Idangji Israel nungertem apusoa Moab lenten Yordan anüdoklen külen tsütsü Yeriko nung anen.

²Tang Zippor jabaso Balaki Amor nunger dang Israeli inyakba ajak angu.

³Aser nisungtemji jenti asünung Moabi tsübuadok. Israel chirtemji ngua Moab tetsübu agi asüng.

⁴Anungji Moabi Median tamburtem dang ashi, “Nashi pungchi-i moapu rem arepba ama iba telok yagi asen meketa aliba menakreptsü.” Anungji Zippor jabaso Balak shiba Moab nung chuba liasü,

⁵pai Beor jabaso Balaam, shiba Eufrata ayong anasa Pethor nung pei linük nisungtem den liasü; pa dangi osangbener par nübur linük dangi pa tajai yoka ashi, “Ajiang Ijip nungi adokba nisungtem yangi lir! Parnok alijak sünga kü jakdang anena lir.

⁶Aji asünung tang arung aser iba nübur ni asoshi atakatemang, kechiaser parnokji ni asoshi onsara tashi tulu. Ashiko ni parnok akoktsü aser linük nungi parnokji aridoktettsü südi, kechiaser nai shiba moatsüdir pai moar, aser shiba atakatemdir pa atakatemer ta ni metet.”

⁷Anungji Moab aser Median tamburtemi parnok den arasenba mapa taa bener apuso, kodang parnoki Balaam dangi aru, parnoki Balaki pa dang ashiba ajak ashi.

⁸Balaami parnok dang ashi, “Taonung yangi liang, aser KIBUBAi kü dang jembiba o ni nenok dangi bener arutsü.” Anungji Moab tamburtemi Balaam den anen.

⁹Idangji Balaam dangi Tsüngrem arua ashi, “Ne den aliba nisungtemji shir?”

¹⁰Balaami langzü, “Moab chuba Zippor jabaso Balaki kü dangi osang yok:

¹¹Ajiang, nisung telok ka Ijip nungi arua yagi alijak sünga lir. Tang arung aser ni asoshi item nisungtemji atakatemjang. Ashiko ni parnok den raratsü aser parnokji aridoktettsüa kar.”

¹² Saka Tsüngremi Balaam dang ashi, “Na parnok den maotsüla, nai iba nübur madak atakatem masütsüla, kechiaser parnokji moaja lir.”

¹³Tasüngnepji Balaam shishir Balaker tongtipurtem dang ashi, “Nenok pei linüki oang, kechiaser KIBUBAi ni nenok den aotsü songtemogo.”

¹⁴Anungji Moab tongtipurtem Balak dangi meyipa oa ashi, “Balaami onok den maruli asür.”

¹⁵Idangji Balaki mezüng yokba tongtipurtem dang nungi teimba aser nüngtuguba tongtipurtem yok.

¹⁶Parnoki Balaam dangi arua ashi, “Zippor jabaso Balaki yamai ashi, yimlibilema na kü dangi arutsü kecha agia tenokdangdaktsüma;

¹⁷kechiaser ni na kanga tushidaktsütsü, aser nai kechisa shidir ni inyaktsü. Yimlibilema arung aser ni asoshi iba nübur atakatemangma.”

¹⁸Saka Balaami parnok dang langzü, “Balaki par chuba ki taribi aser hon agi sünga kü nem agüjaka, KIBUBA kü Tsüngrem temelaba dak alema tuluka süaka tilaka süaka ni inyaktsü makok.”

¹⁹Anungji tang KIBUBAi ano kü dang kechi shidir ni aji metettsü taonung nenok yangi anenang ta ni nenok dang mepishir.

²⁰Paonungji Tsüngrem Balaam dangi arua ashi, “Item nisungtem na ajai arur süra, parnok den oang, saka ni ne dang kechi shidir aji dang nai inyaktsüla.”

²¹Anungji Balaami anepdang shishi aser pai gado nung mener Moab tongtipurtem den ao.

²²Saka pa aoba yong Tsüngrem ain adok, aser KIBUBA tenyari lenmang nung pa anema noktak. Tang pa pei gado nung mener kilir anati meiner ao.

²³Kodang gadoi KIBUBA tenyarji pei ket nung nok atsüteta amer lenmang nungji angu, lai lenmang nungjagi meyip aser aremi ai. Saka gadoji lenmang jagi meyipdaktsütsü Balaami azük;

²⁴Idangji KIBUBA tenyari tsükmenatzü lu ana tsüngda anatsülen jara alidak noktak.

²⁵Kodang gado jagi KIBUBA tenyarji angu, lai jara nungji tsüket aser Balaam tetsüng jara nungji menüng, anungji pai la dak azük.

²⁶Ano KIBUBA tenyar jagi tatsüka or külen tajichilena tabelena meyipshitsü makadak temesüdak ka noktak.

²⁷Kodang gadoi KIBUBA tenyarji angu, lai Balaam kübok mepitakadok, aser pai ajok jagi gado dakji azük.

²⁸Idangji KIBUBAi gado tebang lapoktsü aser lai Balaam dang ashi, “Tan yagi asemben tashi nai kü dak azüktsüsa ni ne dang kechi inyak?”

²⁹Balaami gado dang langzü, “Kechiaser nai ni sensatsü, kü ket nung nok ka ali asübo ni na tepseter lila.”

³⁰Gadoi Balaam dang ashi, “Ne taküm tepiyong tanü tashi nai amenba ne meyong gadoji ni masü no? Ni iba amai ne dang benshidang asü?” Pai langzü, “Masü.”

³¹Idangji KIBUBAi Balaam tenük lapoktsü, aser pai KIBUBA tenyarji nok atsüteter lenmang nungji angu. Anungji pai pei kolak mechioka pa jakdang apudak.

³²Aser KIBUBA tenyari pa dang asüngdang, “Kechiba nai ne gado dak tan yagi asemben tashi azüker? Ajiang na noktangtsü arubaji ni lir, ne lenmangji kü madang tejashitsü lir.

³³Saka ne gadoi ni ngua asemben tashi kü madang nungi meyip. Lai kü madang nungi memeyip asübo ni na tangibo tepseter lila, saka labo taküm lila.”

³⁴Balaami KIBUBA tenyar dang ashi, “Ni temenen menaogo, kechiaser ni anema na lenmang nungji liasü ta ni memeteti liasü. Ajangla tang ya ne tsüngdang tepelatsü masü süra ni meyipa odi.”

³⁵Saka KIBUBA tenyar jagi Balaam dang ashi, “Nisungtem denji oang, saka ni kechi o shidir aji dang nai jembitsüla.” Anungji Balaami tongtipurtem denji ao.

³⁶Kodang Balaki Balaam arudagi ta angashi, pai pa ajurutsü atema arrtsü tatembang Moab yimti Arnon tashi lenji ao.

³⁷Balaki Balaam dang ashi, “Ni na tajai ilunga meyok no? Kechiba nai kü dangi maru? Ni na tushitsü makok no?”

³⁸Balaami langzü, “Ajiang ni ne dangi arua lir! Ni ne dang langka ashitsü tashi kar ma? Tsüngremi kü bang nung enoktsüba o dang ni jembitsü akok.”

³⁹Idangji Balaami Balak den Kiriath-huzoti ao

⁴⁰Balaki nashi pungchi aser san tepseta Balaam aser pa den aliba tongtipurtem nem agütsü.

⁴¹Tasüngnepji Balaki Balaam Bamoth Boali anir atu, aser yang nung jagi pai nisungtemji tesadangka angu.