Read njo ZÜNGDANGBA 23 Bible Online

ZÜNGDANGBA 23 - njo bible

ZÜNGDANGBA 23

¹Idangji Balaami Balak dang ashi, “Yangi kü nem tenladak tenet yanglujang, aser kü nem nashi pungchi tenet aser san tepung tenet renemjang.”

²Balaami ashiba ama Balaki inyak, aser tenati tenladak shia nashi pungchi ka ka aser san tepung ka ka tenla.

³Idangji Balaami Balak dang ashi, “Na tarongba tenla anasa noktaka liang, aser ni aenshia odi, ashiko KIBUBAi kü den ajuruteptsü arutsü südi. Pai kü dang kechisa jungkai adoka sayudir, ni ne dang ashitsü.” Anungji pai tenem kati atu.

⁴Tang Tsüngremi Balaam ajurutsü aru, aser pai pa dang ashi, “Ni tenladak tenet renemogo, aser tenladak shia ni nashi pungchi ka ka aser san tepung ka ka tenlaogo.”

⁵Idangji KIBUBAi Balaam tebang nung o ka enoktsü aser ashi, “Balak dangi meyipang aser iba o pa dang shiang.”

⁶Anungji pai Balak dangi meyipa ao aser Moab tongtipurtem ajak pa den tarongba tenla anasa noktaka angu.

⁷Idangji Balaami ainkar o jembi: “Aram nunger Balaki ni anir aru, anüdoklen tenem nungi Moab chuba, arung, ni asoshi Yakob atakatemjang, arung aser Israel atakatemjang!

⁸Tsüngremi atakatem masüba ni kodaser atakatemtsü? KIBUBAi atakatem masüba ni kodaser atakatemtsü?

⁹Tenem kolak nungi ni parnok angur, Tenemtem nungi ni parnok angur. Balaka pila-a aliba nisungtemji reprangang, aser kintem rongnung züngdangtsü makokba!

¹⁰Shibai Yakober auyi züngdangtettsü? Mesüra Israel aut züngdangtettsü? Ochishir tasüba ama ni südakjang, aser kü tatembang parnok ama lidakjang!”

¹¹Idangji Balaki Balaam dang ashi, “Nai kü dang kechi inyak? Kü tsükchir anema atakatemtsü ni na anir aru, saka ajiang, nai parnok ang moatsüogo.”

¹²Pai langzü, “KIBUBAi kü bang nung kechi enoktsü aji dang ni kümdanga mejembitsü no?”

¹³Idangji Balaki pa dang ashi, “Kü den tesem kati arung, yang nungjagi parnok ajaksa mesüaka na anasa alibaji angutsü. Aser yang nungjagi nai parnok ni asoshi atakatemjang.”

¹⁴Anungji pai pa Zofim moapui anir ao Pisga tenem kolaki atu, aser pai idakji tenladak tenet yanglu tenladak shia nashi pungchi ka ka aser san tepung ka ka tenla agütsü.

¹⁵Aser Balaami Balak dang ashi, “Na tarongba tenla anasa liang aser ni yangji KIBUBA ajurutsü.”

¹⁶Idangji KIBUBAi Balaam den ajurutep aser pa tebang nung o ka enokja ashi, “Balak dangi meyipa oang aser yamai pa dang jembiang.”

¹⁷Anungji Balak dangi meyipa aru, aser Moab tongtipurtem den külemi pa tarongba tenla anasa noktaka liasü.

¹⁸Idangji Balaami ainkar o jembi: Aramesoang, Balak, aser angang; Zippor jabaso, kü dang angang!

¹⁹Tsüngremji nisung ama tiyazü jembitsüsa masü, mesüra pa temulung melenshitsüsa nisung chir ka ama masü. Pai jembir aji pai meinyaktsü no? mesüra pai jembir aji pai matalokdaktsütsü asü?

²⁰Ajidang moatsütsü asoshi ni temelaba ka nguogo; pai moatsüogo, aser aji ni melenshitsü makok.

²¹Yakob dak tia tamajung majitet, mesüra Israel dak timtem kecha mangu. Parnok Tsüngrem KIBUBA parnok den lir; aser chubai ayimtenba parnok rongnung lir.

²²Tsüngremi parnok Ijip nungi anitet; paji parnok atema arem sümong tezü amai lir.

²³Yakob anema arasenba kecha mali, mesüra Israel anema an tokdangba kecha mali. Tang Yakob aser Israel atema ya oda ashitsü, reprangang, Tsüngremi kechi inyak!

²⁴Reprangang, nisungtemji molusongzü tetsü ama lir, aser molusongzü ama parnok sasa noktaka lir; tetepsetba shiruru machi tashi aser iba zü majem tashi ontaka malir.

²⁵Idangji Balaki Balaam dang ashi, “Parnokji atakatema tesü, mesüra temoatsüa temoatsü!”

²⁶Balaami langzü, “KIBUBAi kechisa shidir ni aji inyaktsü ta ni ne dang meshika ma?”

²⁷Idangji Balaki Balaam dang ashi, “Arung, ni na tenem kati anir odi. Ashiko yang nungjagi ni atema parnok atakatemtsü Tsüngremi melatsüa kar.”

²⁸Anungji Balaki Peor tenem kolak koba nungi lisem limaji reprangzüka yoker ajagi Balaam anir aru.

²⁹Balaami Balak dang ashi, “Yangi Kü nem tenladak tenet yanglujang, aser kü nem nashi pungchi tenet aser san tepung tenet renemjang.”

³⁰Balaami ashiba amaji Balaki inyak, aser tenladak shia nashi pungchi aser san ka ka tenla.