Read njo ZÜNGDANGBA 24 Bible Online

ZÜNGDANGBA 24 - njo bible

ZÜNGDANGBA 24

¹Kodang Israel moatsüba nung KIBUBA pelar ta Balaami ajitet, tanga mapang ama pai shin o bushia mao, saka pai pei tejak lisem lima leni meyip.

²Aser Balaami pei tenük roka asoa reprang aser Israel kin shia tanendak aliba angu, aser Tsüngrem tanela pa dangi aru,

³aser pai ainkar o jembi: “Beor jabaso Balaam ainkar o, shiba tenüki jangja-a angu, pa ainkar o.

⁴Tsüngrem otem shibai angashi item ainkar o. Shibai ajak Takoksang mangdang angur, shibai apudaker saka pa tenük saaka lir;

⁵Ner süki koda tajung, Oh Yakob, ne talidak, Oh Israel!

⁶Lenten talang songtoka aliba ama, ayong anasa aliba atsüki mesüka KIBUBAi atemba aloe dong mesüka, ayong anasa cedar dong mesüka;

⁷pa kongsang nungi tzü ayimtsü, aser par metsü atema tzü aika alitsü. Par chuba Agag dang nungi temaba asütsü, aser par yimti ajungkettsü.

⁸Tsüngremi parnok Ijip nungi anitet, paji parnok atema arem sümong tezü tashi amai alitsü; Parnok tsükchir kintem parnoki meyokadoktsü, parnok teret anüka menüngsatsü, par lijakjang agi ateta akatsü.

⁹ Molusongzü ama pai apudak aser mejang, molusongzü tetsü ama shibai pa mesotsü? Shibai nenok moatsür parnok moajang, aser shibai nenok atakatemer atakatem süang!”

¹⁰Idangji Balaki Balaam anema ain adok, aser pai teka anatsü maten; aser Balaki Balaam dang ashi, “Kü tsükchirtem atakatemtsü ni na aja, saka nai parnok asemben tashi moatsüogo.

¹¹Anungji tang na pei kidangi jenang! Ni na kanga tushitsütsü ta ashi, saka ajiang KIBUBAi na tetushi nungi sota ayu.”

¹²Balaami Balak dang langzü, “Nai kü dangi osangbener yokdang ni ya oda meshika ma?

¹³Balaki pa chuba ki taribi aser hon agi sünga agüjaka, KIBUBA kü Tsüngrem temelaba anema ni kecha inyaktsü makok.”

¹⁴Tang ni kü nübur dangi meyipa aor, saka arung, tarutsü nung iba nübur ne nütsüngtem dang kechi inyaktsü ali ni ne dang shidi:

¹⁵“Beor jabaso Balaam ainkar o, shiba tenüki jangja-a angu pa ainkar o;

¹⁶Tsüngrem otem shibai angashi pa ainkar o. Shibai ajak Takoksang mangdang angur, shibai apudaker saka tenük saaka lir;

¹⁷Ni pa angu, saka tang masü, ni pa repranger saka ana nung masü; Yakob nungi petinu ka adoktsü, Israel nungi chuba mechi ka adoktsü, aser pai Moab kolak ajasatsütsü, Seth[1] chirtem ajak raksatsütsü.

¹⁸Edom koktetadoktsü; pa tsükchiri Seir agiadoktsü, saka Israel tashi ita alitsü.

¹⁹Yakob nungi yimsüsür ka adoktsü, aser yimti nung anünga alibatem tepsettsü.”

²⁰Idangji Balaami Amalek dak reprang, aser ainkar o jembi: “Kintem rongnung Amalek mezüngbuba liasü, saka tatem nung pa samatsü.”

²¹Aser Ken nunger dak reprang aser ainkar o jembi: “Ne talidak tashi tait lir, ne tesep lung nung yanglua lir.

²²Aji saka Ken meshimeshia samatsü, kodang Ashuri na tepuodaki anir odir.”

²³Ano pai ainkar o jembia ashi: “Aiatai! Tsüngremi ya inyak dang shiba taküm alitsü?

²⁴Saka Kittim nungi rongtem arutsü; Aser parnok Ashur aser Eber timtemdaktsütsü, saka parnok tesama agi atongtsü.”

²⁵Idangji Balaami arameso aser pei talidaki meyip, aser Balaka pei lenmangi ao.