Read njo ZÜNGDANGBA 27 Bible Online

ZÜNGDANGBA 27 - njo bible

ZÜNGDANGBA 27

¹Idangji Yosef chir Manase kidong nungi Manase jabaso Makir aser semchir Gilead chir Hefer jabaso Zelofehad jalatem tejakleni aru. Itemi pa jalatem tenüng lir: Mahla, Noa, Hogla, Milka, aser Tirza.

²Parnoki Mosa, Eleazar putir, tanishirtem aser telok ajak madang sentep süki kiküm nung noktaka ashi,

³“Obala arem nung asü, saka KIBUBA anema noktakba telok rongnung pa maten; saka pa pei temenen nung asü, aser par jabasotem maliasü.

⁴Pa jabaso maliyong kechiba onok tebu tenüng par kidong rongnungi endoktsü? Obala adianutem rongnungi onok nem senmangji kua.”

⁵Anungji Mosai parnok o KIBUBA dangi bener aru.

⁶Idangji KIBUBAi Mosa dang ashi,

⁷ “Zelofehad jalatemi kechi jembiogo aji shitak lir. Atangji nai tebu kinunger den senmangtsü agütsütsüla, aser nai parnok tebu senmangji parnok nem amangdaktsütsüla.

⁸Ano nai Israel chirtem dang yamai ashitsüla, Nisung ka jabaso metoktsüi süadokra, pa senmangji pa jala dangi odakjang.

⁹Aser pa jala melira idangji pa senmangji pa adianu nem agüjang.

¹⁰Pa adianu melira, idangji pa tebu adianu nem senmangji agüjang.

¹¹Aser tebu adianu melira, idangji pa anasatiba sosem nem senmangji agütsütsüla.”

¹² Idangji KIBUBAi Mosa dang ashi, “Abarim tenemi tuang aser ni Israel chir nem agütsüba linükji ajiang.

¹³Kodang nai aji ngudir na-a nedi Aron ama pei pur den adentsü;

¹⁴Kechiaser nenapronglai Zin lisem lima arem nung kü ozüng anema apuso. Kodang telok ajaki Meriba nung ni anema noktak, nai kü temeshi tenüng anema apuso.” (Itemi Zin lisem lima arem nung Meriba-kadesh tzü lir.)

¹⁵Idangji Mosai KIBUBA dang ashi,

¹⁶“KIBUBA meimchir ajak tanela metetsang Tsüngremi telok madak tanishir ka shimjangma.

¹⁷Parnok jakdang oli aruli ta asütsüsa pai parnok anir aotsü aser anir arutsü, anungji KIBUBA nüburtemji sannüker maliba san telok ama masütsü.”

¹⁸ Anungji KIBUBAi Mosa dang ashi, “Nun jabaso Yihusua shiba dak tanela tajung lir, nai pa agiang aser ne teka agi pa dak nemetang;

¹⁹aser pa Eleazar putir aser telok ajak madang noktakdakjang; aser parnoki ngua bendanga agüjang,

²⁰Aser nai pa nem ne mapa kar agüjang, anungji Israel chirtemi pa dang angatsü.

²¹ Pa Eleazar putir madang noktaktsü aser putir jagi pa asoshi KIBUBA madang Urim agi lemtettsü asüngdangtsü. Yamaji Eleazari Yihusua aser Israel nunger telok ajak aotsü indang ashitsü.”

²²KIBUBAi pa dang melaba ama Mosai inyak. Pai Yihusua anir arua Eleazar aser telok ajak madang noktakdaktsü.

²³ Aser KIBUBAi melaba ama pa teka agi Yihusua dak nemet aser bendanga agütsü.