Read njo ZÜNGDANGBA 28 Bible Online

ZÜNGDANGBA 28 - njo bible

ZÜNGDANGBA 28

¹KIBUBAi Mosa dang ashi,

²“Israel chirtem dang mela-ang aser shiang, nenoki kü dang chiyungtsü tenla teronem tanang asoshi mi agi tenlaba, item mapang shitak nung kü dang tenlatsü asoshi kümdangang.

³“Parnok dang shiang, KIBUBA dang nenoki mi agi tenlatsübaji ibai lir: anogoshia maneni tarongba tenla asoshi san tepung tarak maket küm ka chanu ana;

⁴san chanu ka anepdang tenlatsü aser ka nikongdang tenlatsü,

⁵iba den chiyungtsü tenla asoshi amzü tanük jangku ka, temenüngzükba oliv totzü süngti marok ka.

⁶Ibai maneni ronga aliba anogoshi tenla KIBUBA dang teronem asoshi mi agi tenlabaji koba Sinai tenem nung tentet.

⁷“Iba den tajemtsü tenlaji san chanu ka shia süngti marok ka, tekülemdak KIBUBA dang tajemtsü tenla asoshi shiloktsütsü.

⁸Nikongdang san tanabubaji tajemtsü tenla anepdang agütsüba amaji tenla-ang. Ibai KIBUBA dang teronem tanang asoshi mi agi tenlabaji lir.

⁹“Amungnü küm ka chanu tarak maket san chanu ana den chiyungtsü tenla asoshi amzü jangku ana totzü den meyokteper tenlatsüla.

¹⁰Ibai maneni ronga aliba aser tajemtsü tenla dak alema Amungnü tenlaji lir.

¹¹“Ita tasen mezüng anogo nung KIBUBA dangi küm ka chanu tarak maket nashi pungchi ana, san tepung ka, san tepung chanu tenet ta tenlatsüla.

¹²Nashi pungchi ka asoshi chiyungtsü tenla atema amzü tanük jangku asem totzü den meyokteper; aser san tepung asoshi amzü totzü den meyokteper jangku ana;

¹³aser san tepung chanu ka asoshi chiyungtsü tenla atema amzü tanük den meyokteper jangku ka. Aji teronem tanang asoshi KIBUBA dang mi agi tenlabaji lir.

¹⁴Nashi pungchi shia den tajemtsü asoshi süngti marok tesadang ka; san tepung den süngti marok shilem nung shilem ka; aser san tepung chanu asoshi süngti marok pezüsü shilem nung shilem ka. Aji ita tasen mezüng anogo nung küm tepiyong tenlaba lir.

¹⁵Iba den ano KIBUBA nem temenen tenla asoshi nabong tepung ka, maneni tarongba tenla aser tajemtsü tenla agütsüba dak alema tenlatsüla.

¹⁶ “Mezüngbuba ita anogo terpezübubaji KIBUBA meyong Süia aoba benjong akatsüla.

¹⁷ Iba ita anogo terpungunü buba nung benjong ka akatsü, anogo tenet tashi piyazü meinokba amtsük achitsü.

¹⁸Mezüngbuba anogo nung temeshi sentep ka akatsü, aser mapa kecha meinyaktsü.

¹⁹KIBUBA dang mi agi tenlaba tarongba tenla asoshi tarak maket nashi pungchi ana, san tepung ka aser küm ka chanu san tepung tenet agütsütsüla.

²⁰Chiyungtsü tenla asoshi nashi pungchi ka den amzü tanük totzü den meyokteper jangku asem aser san tepung ka den jangku ana.

²¹San chanu tenet shia jangku ka ka.

²²Aser ne menen pungitsü asoshi nabong tepung ka atentsüla.

²³Anepdang tarongba tenla koba teti asoshi ronga lir, iba dak alema nai itemi tenlatsüla.

²⁴Yamaji anogo tenetnü anogo shia mi agi tenlaba chiyungtsü tenla aser teronem tajung asoshi KIBUBA dang tenlatsüla. Ibai maneni ronga aliba tenla aser tajemtsü tenla dak alema tenlatsüla.

²⁵Anogo tenetnübuba nung nenok temeshi sentep ka akatsü, aser mapa kecha meinyaktsü.

²⁶ “Ano aluruba benjong mezüng anogo nung kodang nenoki KIBUBA dang chiyungtsü tasen agütsüdir; nenoki temeshi sentep ka akatsüla aser mapa kecha meinyaktsüla.

²⁷Teronem tajung asoshi nashi pungchi chanu ka, san tepung ka aser küm ka chanu tepung tenet KIBUBA dang tarongba tenla asoshi agütsütsüla.

²⁸Aser parnok chiyungtsü tenla asoshi amzü tanük den totzü meyokteper nashi pungchi ka den jangku asem, aser san tepung asoshi jangku ana,

²⁹san chanu ka ka asoshi jangku ka ka,

³⁰ne menen pungitsü asoshi nabong tepung ka.

³¹Maneni ronga aliba aser chiyungtsü tenla dak alema nai itemji tajemtsü tenla den külemi agütsütsüla. Ano shirurutemji tarak maket asütsüla.