Read njo ZÜNGDANGBA 3 Bible Online

ZÜNGDANGBA 3 - njo bible

ZÜNGDANGBA 3

¹Sinai tenem nung KIBUBAi Mosa dang jembiba mapang Aron aser Mosa pututem ya lir.

² Aron jabaso pezü liasü: tambusang tenüng Nadab, Abihu, Eleazar aser Ithamar.

³Parnokji putir mapa nung tenzüktsü asoshi mezüja shimtet.

⁴ Saka Nadab aser Abihu nati tim masüba memeshiba mi agi KIBUBA dang Sinai tenem nung tenla dang KIBUBAi parnok tepset. Parnok techir maliasü; anungji Eleazar aser Ithamar nati Aron taküm ali tashi putir mapa inyak.

⁵KIBUBAi Mosa dang ashi,

⁶“Levi kidongji tejakleni anir arua, Aron putir tenzüktsü asoshi pa madang yujang.

⁷Tekülemdak süki mapa ajak inyaktsü asoshi parnoki Aron aser telok ajak asoshi mapa inyaktsü.

⁸Tekülemdak amshiba osettsüset ajak parnoki anebalutsü, aser Israel nungertem ajak atema tekülemdak mapa ajak parnoki inyaktsü.

⁹Aron aser par jabasotem nem Levi nungerji bendanga agüjang, kechiaser Israel nunger rongnungi ni tenzüktsü parnok shimteta lir.

¹⁰Aron aser par jabasotem putir mapa inyaktsü nai shimang, nisung kari aji inyaktsü merangra pabo südaktsütsü.”

¹¹KIBUBAi Mosa dang ashi,

¹²“Israel tsürtemi asoba mezüng jabaso ajak melena ni Levi kidongji shimtetogo; parnokji kü meyong alitsü.

¹³ Kechiaser mezüng asoba ajak kü meyong lir. Ijip lima ni mezüng asoba ajak tepsetba anogo nung Israel nung mezüng asoba nisung aser shiruru ajak ni asoshi meshitet; parnokji kü meyong alitsü. Ni KIBUBA lir.”

¹⁴KIBUBAi Sinai lisem lima nung Mosa dang ashi,

¹⁵“Levi kidongji kinunger shia züngdangang, tebur shia ita ka tain nungi temalen züngdangang.”

¹⁶KIBUBA o amato Mosai parnokji züngdang.

¹⁷Itemi Levi jabasotem: Gershon, Kohat aser Merari.

¹⁸Itemi Gershon dak jakzükba kidong: Libni aser Shimei.

¹⁹Kohat dak jakzükba kidong: Amram, Izehar, Hebron aser Uzziel.

²⁰Merari kidong: Mahli aser Mushi. Itemji Levi kidongtem kinunger shia balala.

²¹Libni kidong aser Shimei kidongji Gershon nungi jakzük.

²²Ita ka tain nungi temalen züngdangba tebur yongsük ajak agi meyirijang tenet ser noklang pungu liasü.

²³Gershon kidongtemji tekülemdak süki tesülen anüolen tsütsü anentsü.

²⁴Gershon kidong tanishir Lael jabaso Elisaf alitsü.

²⁵Sentep süki, iba nembangba sü aser kishi tetongdangbaji parnoki reprangtsüla,

²⁶aser kimalen teyindangbatem, tekülemdak süki aser tenladak dena kimalen aliba kishi asoshi tetongdangba, iba lisü aser iba mapa asoshi ajak reprangtsü.

²⁷Kohat nungi Amram kidong, Hebron kidong aser Uzziel kidong jakzük.

²⁸Ita ka tain nungi temalen tashi tebur ajak züngdangba yongsük ajak agi meyirijang ti ser noklang trok;

²⁹parnokji süki anüolentip tsütsü anentsüla.

³⁰Parnok tanishibaji Uzziel jabaso Elizafan alitsü.

³¹Tezüngzüktepba süngden, langbang, milendong atalokdak, tenla sabang, putiri temeshidak amshiba osettsüset, tetongdangba aser iba asoshi mapa ajak parnoki reprangtsüla.

³²Levitem rongnung Aron putir jabaso Eleazar tekülemdak repranger ajak madak tanishir tongtiba alitsü.

³³Merari nungi Mahli kidong aser Mush jakzük.

³⁴Ita ka tain nungi temalen tashi tebur ajak züngdangba yongsük ajak agi meyirijang trok ser noklang ana.

³⁵Merari kidong tanishir Abihal jabaso Zuriel, tekülemdak süki anüdoklentip tsütsü parnok anentsü.

³⁶Süki süngtsük, iba tarangtsü, iba tongshi, tesembangtsü aser osettsüset ajak aser mapa ajak;

³⁷kimalen meketa tongshitem, tesempangtsü, tazüngtsütem aser item lisü Merari jabasotemi reprangtsü.

³⁸Mosa, Aron aser par jabasotem parnoki süki anüdoklen tsütsü anentsü. Israel nunger ajak tenüng nung parnoki tekülemdak mapa inyaktsü. Nisung kari iba mapa inyaktsü merangra pabo südaktsütsü.

³⁹KIBUBAi Mosa dang melaba ama Levi kidong ita ka tain nungi temalen tashi tebur yongsük ajaki meyirijang metsür ana liasü.

⁴⁰KIBUBAi Mosa dang ashi, “Israel nunger mezüng asoba tebur ita ka tain nungi temalen ajak züngdangang aser parnok tenüng züluang.

⁴¹Israel nunger rongnung mezüng asoba ajak melena Levitemji agiang, aser Israel nunger mezüng mepuba kiset shiruru melena Levitem meyong kiset shiruruji agiang.”

⁴²KIBUBAi melaba ama Mosai Israel nunger yongsükji züngdang,

⁴³Mezüng asoba Israel nunger ita ka tain nungi temalen parnok ajak agi meyirijang metsürana noklang ana ser neter asem liasü.

⁴⁴KIBUBAi Mosa dang ashi,

⁴⁵“Israel nunger mezüng asoba ajak melena Levitem aser parnok kiset shiruru shimtetang. Levitemji kü meyong alitsü. Ni KIBUBA lir.

⁴⁶Mezüng asoba Israel nunger shirnok Levitem dang nungi noklang ana neter asem agi timba lir, parnoki alangzüktsüla.

⁴⁷Nisung shia asoshi shekel pungu sarutsü,

⁴⁸aser aji Aron aser par jabasotem nem agütsütsüla.”

⁴⁹Levitem dak tali koba nütsüng liasü, parnok alangzükba senji Mosai agi,

⁵⁰Israel nunger mezüng asoba nungi pai senji agi aser aji shekel meyirijang ka noklang asem ser roker pungu liasü

⁵¹Mosai iba senji Aron aser par jabaso nem agütsü.