Read njo ZÜNGDANGBA 30 Bible Online

ZÜNGDANGBA 30 - njo bible

ZÜNGDANGBA 30

¹Idangji Mosai Israel chirtem kin shia tanishirtem dang KIBUBAi melabatem metetdaktsü.

² “Kodang nisung kati KIBUBA dang langka atemzükdir mesüra langka azüngashidir, pai pei oji meraksatsüla saka pai jembizükba o ajakji inyaktsüla.

³“Kodang tetsür kati pei tebu kidang lia langka atemzükdir mesüra tatemzükba ka kübok la lidir,

⁴aser la tebui lai atemzükbaji angashir la dang kecha meshira, idangji lai atemzükba aser tenangzükba kobasa lai nangzük, item ajak memelenshitsü.

⁵Saka lai atemzükba aser la tenangzükbaji tebui angashia aji memelara, la tatemzükba aser tenangzükbatem ajakji kecha magitsü; KIBUBAi la dang tai atoktsü kechiaser tebui la dang aji memela.

⁶“Lai mebilemdangi la tebangmechi-i jembizüka yokba yong tatemzükba kübok aliba mapang la kiyi ora,

⁷aser la kinungpui aji angashia la dang kecha meshira, idangji lai tatemzükba aser nangzükba ajakji meraksatsü.

⁸Saka la kinungpui aji angashir la dang aji memelara, lai mebilemdangi atemzüka akaba tenangzükba ajakji paidoktsü, aser KIBUBAi la dang tai atoktsü.

⁹“Saka amitsüri mesüra tepalaba tetsüri kechi atemzükdir aji agi la alena alitsü.

¹⁰Tetsür ka kinungpu den lia lai langka atemzükra aser tenangzükba ka kübok la lira

¹¹aser lai kinungpui aji angashir la dang kecha meshira, idangji lai atemzükba ajak kübok la alitsü.

¹²Saka la kinungpui aji angashia la dang itemji memelara, idangji lai atemzükba o ajak paidoktsü. La kinungpui aji memela aser KIBUBAi la dang tai atoktsü

¹³“Tatemzükba aser tenangzükba koba kübok la ajemalua alir, aji la kinungpui inyaktsü mesüra paidoktsü akok.

¹⁴Saka la kinungpui aji angashiba anogo nung la dang kecha meshira, idangji lai atemzükba ajak lai inyaktsü.

¹⁵Saka pai aji angashir mapang tatsüka lir ang aji paidoktsüra, idangji la temenen lai abentsü.”

¹⁶Kinungpu aser kinungtsü na tsüngda tebu den aliba mapang tebu aser jala aser par kidang aliba ajak asoshi KIBUBAi Mosa ajanga agütsüba ozüng ibai lir.