Read njo ZÜNGDANGBA 31 Bible Online

ZÜNGDANGBA 31 - njo bible

ZÜNGDANGBA 31

²“Israel chirtemi Midian nunger dak mang yangang, iba sülen pa pei pur den atentsü.”

³Anungji Mosai nisungtem dang ashi, “Midian nunger anema KIBUBAi mangyangba aser parnok den raratsü asoshi nenok teburtem renemang.

⁴Israel kin shiai meyirijang ka ka yokang.”

⁵Anungji kin shia meyirijang ka ka shimteta parnok rarai aotsü asoshi meyirijang terana renem.

⁶Kin shia nungi meyirijang ka ka Mosai Eleazar putir jabaso Finehas den yok, shibai tekülemdak nungi oset-tsüset aser ar-asangtsü asoshi jangzü bener ao.

⁷KIBUBAi Mosa dang melaba ama parnoki Midian nunger den rara aser tebur shia tepset.

⁸Parnok tepsetertemji: Evi, Rekem, Zur, Hur, aser Reba: Midian chubatem pungu. Parnoki ano Beor jabaso Balaam-a nok agi tepset.

⁹Aser Israel chirtemi Midiantsürtem, tanurtem aser Midian nunger kiset shirurutem; san aser nashi telok, aser parnok oset ajak rakzüka agi,

¹⁰aser Midian nunger yimtitem aser parnok tanendak ajak parnoki mi agi rongdoktsü.

¹¹Parnoki makzükba oset, shiruru aser nisung ajak parnoki agi.

¹²Aser parnoki tepuokertem, terakzükba aser temakzükba oset ajakji Mosa aser Eleazar putir, aser Israel chirtem telok sentepi Yordan anasa Yeriko nung Moab lenteni bener aru.

¹³Mosa, Eleazar putir aser telok tanishirtem ajak tanendak nungi tugua parnok lenji ao.

¹⁴Aser Mosai temeranger telok tanishirtem meyirijang madak aser noklang madak arkotong, shir rara nungi meyipa shilang, parnok dang ain adok.

¹⁵Pai parnok dang asüngdang, “Tetsür ajak nenoki kümzükogo ma?

¹⁶ Ajiang item jagi Balaami shisatsü agütsüba ajanga Israel chirtem Peor nung KIBUBA anema aibelendaktsü, anungji KIBUBA nübur rongnung wara liasü.

¹⁷Aji asünung tang tebur ajak aser tetsür shirnoki tebur den medemdangogo, parnok ajakji tepsetang.

¹⁸Saka tebur den memedemba aiür chanutemji nenok asoshi taküm kümzükang.

¹⁹Aser nenok shibaisa nisung tepsetogo, aser tasü mang dak kongshiogo; tanendak kimalen anogo tenetnü liang. Anogo asemnübuba aser tenetnübuba nung nenoki puokbatem meshitettsüla.

²⁰Süoshi ajak aser shiküp agi yangluba, nabong tezüng agi yangluba mesüra süng agi yangluba oset ajak merüktetang.”

²¹Idangji rarai aor nisungtem dang Eleazar putiri ashi, “KIBUBAi Mosa dang melaba ozüng tentetji ya lir:

²²Hon, taribi, yongmenyin, merang, merang tanük, shesa yin,

²³aser kechisa mi agi merongsar, itemji mi agi merüktettsüla, idangji aji merükteta akümtsü. Aser kechisa mi agi rongsar itemji tzü agi merüktettsüla.

²⁴Tenetnübuba nung nenok süoshi shitokang ajiser nenok merüka akümtsü. Idangji ang nenok tanendaki arutsü.”

²⁵Idangji KIBUBAi Mosa dang ashi,

²⁶“Eleazer putir nena aser kidong shia tanishirtemi temakzükba nisung aser shiruru ajakji züngdangang.

²⁷Temakzükbaji tongbangi aor aser tanüngba telok asoshi kasa lemdangang.

²⁸Tongbangi aor shilem nungi KIBUBA asoshi alimelen agiang. Nisung, nashi, gado, san mesüra nabong shia noklang pungu shia ka ka.

²⁹Ibaji parnok tesadang nungi agizüktsü aser KIBUBA shilem asoshi Eleazar putir nem aji agüjang.

³⁰Israel chir nem tesadang agütsüba nungi nisung, nashi, gado, san, nabong mesüra tanga shirurutem nungi tenem shia ka ka. Itemji Levitem shir KIBUBA tekülemdak ketdangsertem lir parnok nem agüjang.”

³¹Anungji KIBUBAi melaba ama Mosa aser Eleazar putir nati inyak.

³²Tang temakzükba koba temerangertemi agiba nungi benden, aji san meyirijang noklang trok neter pungu,

³³nashi meyirijang neter ana,

³⁴gado meyirijang roker ka,

³⁵tebur den memedemba tetsür meyirijang semer ana.

³⁶Rarai aortem tesadang shilem nungi san meyirijang noklang asem semer tenet, noklang pungu,

³⁷iba nungi KIBUBA shilemji noklang trok neter pungu;

³⁸nashi meyirijang semer trok, iba nungi KIBUBA shilem neter ana;

³⁹gado meyirijang semer noklang pungu, iba nungi KIBUBA shilem roker ka;

⁴⁰aser nisung meyirijang ter trok, iba nungi KIBUBA shilem semer ana.

⁴¹KIBUBAi Mosa dang melaba KIBUBA shilem alimelenji Eleazar putir nem agütsü.

⁴²Israel chirtem shilem tesadang koba temerangertem den Mosai lemsatsü,

⁴³telok meyong tesadangji san meyirijang noklang asem semer tenet noklang pungu,

⁴⁴nashi meyirijang semer trok,

⁴⁵gado meyirijang semer, noklang pungu,

⁴⁶aser nisung meyirijang ter trok.

⁴⁷Israel chirtem shilem nungi nisung aser shiruru tenem shia ka ka Mosai shimtet. KIBUBAi pa dang melaba ama pai itemji Levitem shir KIBUBA tekülemdak ketdangsertem lir parnok nem agütsü.

⁴⁸Idangji temeranger telok tanishirtem meyirijang madak aser noklang madak arkotongtemi Mosa dangi ai

⁴⁹aser parnoki Mosa dang ashi, “Ne kilirtemi onok ket nung aliba temerangertem züngdangogo, aser onok ka danga mesamai lir.

⁵⁰KIBUBA madang onok temenen pungitsü asoshi onok nisung shiai bener aruba kisen, küri aser azük, item nungi KIBUBA dangi tenla bener arua lir.”

⁵¹Anungji Mosa o Eleazar putir nati parnok nungi hon aser tanga osettemji agizük.

⁵²Meyirijang aser noklang madang arkotongtemi KIBUBA nem agütsüba hon ajak agi shekel meyirijang ter trok noklang tenet tenem liasü.

⁵³Temerangertem ajak rara nung temakzükba oset pei asoshi agi.

⁵⁴Anungji Mosa o Eleazar putir nati temerangertem meyirijang aser noklang madak arkotongtem ket nungi honji agia sentep süki-i bener arua Israel chirtem asoshi KIBUBA madang tebilemtettsü asoshi ayu.