Read njo ZÜNGDANGBA 32 Bible Online

ZÜNGDANGBA 32 - njo bible

ZÜNGDANGBA 32

¹Tang Reuben aser Gad kintem kiset shiruru jenti liasü. Parnoki Yazar aser Gilead linükji parnok kiset shirurutem atema tetemsü ta angu,

²anungji parnoki Mosa o Eleazar putir aser telok tanishirtem dangi arua ashi,

³“Atarot, Dibon, Yazer, Nimra, Heshbon, Eleale, Nebo aser Beon,

⁴alinük koba KIBUBAi Israel telok nem kokdaktsü, ya kiset shirurutem asoshi tetemsü lir, aser ne kilirtem kiset shirurutem jenti kar.

⁵Onok ne nükdang yimlibilem ngura, item linük ya ne kilirtem senmang asoshi agüjangma; Yordan ayongji ajanga onok tani ma.”

⁶Mosai Reuben aser Gad chirtem dang ashi, “Nenok adianutem rarai aodang nenokbo yangi mena alitsü no?

⁷Kechiba KIBUBAi agütsüba limai aotsü atema Israel chirtem tezü tangdaktsür?

⁸ Linük reprangtsü asoshi Kadesh-barnea nungi ni parnok yokdang nebu nungeri yamai inyak.

⁹Kechiaser kodang parnoki Eshkol lenteni tur alinükji penzü, KIBUBAi Israel chirtem nem agütsüba lima jagi parnok maitsüla ta parnok tasü maiti kümdaktsü.

¹⁰ Iba anogo nungji KIBUBAi ain adoka ya oda azüngashi:

¹¹‘Kechiaser parnok temulung ajak agi kü sülen manitak nung, ni Abraham, Isak aser Yakob dang azüngashia nangzükba lima jagi Ijip nungi adoker küm metsü nungi temalen shingaia aji mangutsü,

¹²oda Keniz nunger Yefune jabaso Kaleb aser Nun jabaso Yihusua dak alema; kechiaser tenati dang temulung ajak agi KIBUBA sülen anitak.’

¹³Israel anema KIBUBA ain adok aser pa madang tamajung inyakertem ajak mesama tashi pai parnok küm lir tashi arem nung nemzüdaktsü.

¹⁴Aser tang Israel anema KIBUBA tetsübutsü ain adokba tali kümdaktsütsüsa yangi nebu nunger melen temenen telok ka nenok adoka lir.

¹⁵Pa sülen manitaki nenoki meyipa ora, pai tanaben nenok arem nung toktsütsü, aser parnok samaba khu ajak nenoki abentsü.”

¹⁶Idangji parnoki Mosa dangi arua ashi, “Onoki kiset shirurutem asoshi aser tetsür tanurtem asoshi idaki yimti yanglutsü,

¹⁷saka Israel chirtem parnok talidaki anir maru tashi parnok jakdang onok aotsü onok renema lir, saka linük nisungtem nungi kümzüka alitsü atema onok tetsürtem aser tanurtem yimti atsü kübok lidaktsütsü.

¹⁸Israel chirtem shia pei senmang melemzük tashi onok meyipa maotsü.

¹⁹Yordan külenji onoki senmang kecha magitsü, kechiaser onok meyong senmang Yordan len anüdoklen tsütsü lir.”

²⁰Anungji Mosai parnok dang ashi, “Nenoki ya inyakdi süra, nenoki KIBUBA madang raratsü renema lira,

²¹aser nenok ajaki pei tsükchir maridok tashi Yordan ajanga KIBUBA madang odi süra,

²²aser kodang KIBUBA madang alinükji maktetdir, nenok meyipa oa KIBUBA aser Israel chirtem tsüngdang nungi tai makai alitsü aser iba linük ya KIBUBA madang nenok senmang alitsü.

²³Saka iba mapa nung nenoki tamakok ngura, ajiang nenoki KIBUBA anema temenen menar aser nenok temenen asoshi nenok merenshitsü ta metetang.

²⁴Nenok tetsürtem aser tanurtem asoshi yimti aser kiset shirurutem asoshi ki yangluang, saka nenoki kechi nangzükogo aji inyaktsüla.”

²⁵Gad aser Reuben chirtemi Mosa dang ashi, “Onok kiburi ashiba ama ne kilirtemi inyaktsü.

²⁶Onok tanurtem, kinungtsürtem aser onok nashi aser san telok Gilead yimti tem nung alitsü.

²⁷Saka ne kilirtem ozü kiburi ashiba ama KIBUBA madang tongbangi ayongji ajanga rarayonga aotsü.”

²⁸ Idangji Mosai Eleazar putir, Nun jabaso Yihusua aser Israel kidong tanishirtem dang parnok atema iba ozüng ya agütsü.

²⁹Pai parnok dang ashi, “Gad aser Reuben chirtem nisung shia tongbang asoshi KIBUBA madang nenok den Yordan ayongji ajanga arura, aser kodang alinükji nenoki maktetdir, parnok nem Gilead limaji senmangtsü asoshi agüjang.

³⁰Saka parnoki nenok den ayongji ajanga rarai marura, parnok senmang Kanan lima nung nenok den lemzüktsüla.”

³¹Idangji Gad aser Reuben chirtemi langzü, “KIBUBAi kechisa shiogo, ne kilirtemi aji inyaktsü.

³²Onoki KIBUBA madang ayongji ajanga Kanani nok o nü bener aitsü, saka onok senmangtsü asoshi kechi ngudir ajibo Yordan ajanger dang alitsü.”

³³Anungji Mosai Gad aser Reuben chirtem aser Yosef jabaso Manase chirtem tesadang ka nem Amor nunger chuba Sihon yimli aser Bashan chuba Og yimli, item yimtitem aser parnok meketa aliba linük ajongaji agütsü.

³⁴Aser Gad chirtemi Dibon, Atarota, Aroer yanglu,

³⁵Atarot, Shofan, Yazer, Yogbeha,

³⁶Beth Nimra aser Beth Haran jara yimtitemji yanglushi, aser parnok kiset shirurutem asoshi ki yanglu.

³⁷Aser Reuben chirtemi Heshbon, Eleale, Kiriathaim,

³⁸aser ano Nebo aser Baa-meon item tenüngji melenshir aser Sibma parnoki yangluba tenüng tanga aja.

³⁹Aser Manase jabaso Makir chirtemi Gileadi oa yangji aliba Amor nunger nungi aji rakzüka agi.

⁴⁰Anungji Mosai Manase jabaso Makir chir nem Gileadji agütsü, aser yangji parnoki ali.

⁴¹Manase semchir Jair-i oa item yimtsüngtemji atsüngtet, aser item tenüng Havvoth-Yaira ta aja.

⁴²Aser Nobai Kenat aser iba temeket yimtsüngtem agi aser iba tenüngji pa nüngten Noba ta aja.