Read njo ZÜNGDANGBA 34 Bible Online

ZÜNGDANGBA 34 - njo bible

ZÜNGDANGBA 34

¹Idangji KIBUBAi Mosa dang ashi,

²“Israel nungertem dang ya mela-ang aser shiang, kodang nenok Kanan limai idir, nenoki amangtsüba lima artsüji yamai alitsü.

³Anüdoklentip tsütsü arrtsüji Zin lisem lima nungi Edom tashi. Anüolentip Metsü Tzüyim teküboklen tatembang nungi anüdoklen tashi,

⁴yang nung jagi anüolentip tsütsü Akrabbim leni atutsü aser Zin leni oa Kadesh-barnea, Hazar-adda aser maneni Azmon tashi aotsü.

⁵Aser aji Ijip arrtsü lenten tashi oa Tzüyim nungji atemtsü.

⁶“Anüolen arrtsüji Tzüyim tulu ayongküm tashi, ibai nenok anüolen arrtsü alitsü.

⁷“Anüdoklentip arrtsüji Tzüyim tulu nungi Hor tenem tashi temaitsü yangluang,

⁸Hor tenem nungi Lebo Hamad tashi, yang nung jagi Zedad tonga aotsü,

⁹Aser maneni Zifron aser Hazar Enan tashi oa idakji atemtsü. Ibai nenok anüdoklentip arrtsü alitsü.

¹⁰“Anüdoklen arrtsü asoshi Hazar Enan nungi Shefam tashi nenoki temaitsü yangluang.

¹¹Shefam Ribla tashi Ain anüdoklen tsütsü tashi alitsü: aser iba arrtsüji Kinneret Tzüyim tsütsü alipak nungji tangshia alutsü.

¹²Aser arrtsüji Yordan tashi lua Metsü Tzüyim nung atemtsü. Kinük ajaklen meketa itemji nenok agitsüba lima arrtsüji alitsü.”

¹³ Anungji Mosai Israel nunger dang mela ashi, “Kin tuku aser tesadang ka nem KIBUBAi senmang asoshi agütsütsü melaba limaji ibai lir. Alimaji nenok rongnung an tokdanga lemsatsüla.

¹⁴Kechiaser Reuben kin parnok kinüngertem, Gad kin parnok kinüngertem aser Manase kin nungi tesadang ka asoshi parnoki senmang agizükogo.

¹⁵Item kin ana aser tesadangji Yordan atener anüdoklen Yeriko tashi anüdok tsütsü parnok senmang agizükogo.”

¹⁶KIBUBAi Mosa dang ashi,

¹⁷“Nenok senmangtsü atema alinük lemsatsü atema lenirtem tenüngji itemi alitsü: Eleazar putir aser Nun jabaso Yihusua.

¹⁸Aser linük lemsatsüba nung yaritsü asoshi kin shia tanishir ka ka shimtetang.

¹⁹Parnok tenüngji itemi lir: Yihuda kidong nungi Yefune jabaso Kaleb;

²⁰Simeon kidong nungi Ammihud jabaso Samuel;

²¹Benjamin kidong nungi Kislon jabaso Elidad;

²²Dan kidong nungi Yogli jabaso Bukli;

²³Yosef chir Manase kidong nungi Efod jabaso Hamniel;

²⁴Efraim kidong nungi Shiftam jabaso Kemuel;

²⁵Zebulun kidong nungi parnok jabaso Elizafan;

²⁶Issakar kidong nungi Azan jabaso Paltiel;

²⁷Asher kidong nungi Shelomi jabaso Ahuhud;

²⁸Naftali kidong nungi Ammihud jabaso Pedahel.

²⁹Kanan lima nung Israel nunger nem senmangtsü asoshi linük lemsatsütsü KIBUBAi shimtetba linertemji itemi alitsü.”