Read njo ZÜNGDANGBA 35 Bible Online

ZÜNGDANGBA 35 - njo bible

ZÜNGDANGBA 35

¹ Tang Moab lenten Yordan anasa Yeriko nung KIBUBAi Mosa dang ashi,

²“Israel nunger dang parnoki amangba senmang nungi Levi kidong nem talidak yimtitem agüjang ta shiang; aser yimti meketa chimdak dena Levi kidong nem nai agütsütsüla.

³Item yimtitemji parnok meyong alitsü; aser chiyimdak aliji parnok kiset shirurutem atema alitsü.

⁴Nai Levi kidong nem agütsüba yimti nung tangloka chiyimdak aliji yimti atsü temalen ajak meketa süklep meyirijang ka alitsü.

⁵Yimti temalen anüdoklen tsütsü süklep meyirijang ana; anüolentip meyirijang ana aser anüdoklentip tsütsü meyirijang ana, aser yimtiji tiyong nung alitsü. Parnok yimtitem asoshi aji chiyimdak asütsü.

⁶Nenoki Levi kidong nem agütsüba yimtitem rongnung yimti trok jenokdak yimti alitsü, koba nisung tepsetertem atema jenokdak alitsü; iba dak alaka ano parnok nem yimti lir-ana agütsütsüla.

⁷Nenoki parnok nem agütsüba yimti ajak agi lir-ti, idakji chiyimdak dena agütsütsüla.

⁸Israel nunger senmang nungi nenoki Levi kidong nem agütsüba yimtitemji telok tuluba nungi timba aser tilaba nungi ishiba ta parnok telok apir agütsütsüla.”

⁹ Idangji KIBUBAi Mosa dang ashi,

¹⁰“Israel chirtem dang shiang: kodang nenoki Yordan ajanger Kanan limai idir,

¹¹jenokdak yimti asütsü asoshi yimti kar shimtetang, idakji ajongbena nisung tepsetertem jenoktsü.

¹²Nisung tepseterji mungdang madang o bendangdak menoktak tashi mangyanger ket nungi jenbua idakji alitsü.

¹³Item yimti trok koba nenoki agütsü aji jenokdak yimtitem asütsü.

¹⁴Yordan ajanger külenji yimti asem agüjang aser Kanan lima nung yimti asem: itemji jenokdak yimtitem asütsü.

¹⁵Item yimti trokji Israel chirtem, semloka alirtem aser Bendangertem shirnoki ajongbena nisung tepseter, parnok atema jenokdak yimti asütsü.

¹⁶“Saka nisung kati kar dak merang oset agi zükra aser paji süadokra, paji nisung tepseter lir: nisung tepseterji atangji südaktsütsüla.

¹⁷Mesüra pa ket nung nisung asütsüsa lung ka ama lira aser pai nisung dakji onra aser paji süra paji nisung tepseter lir; nisung tepseterji atangji südaktsütsüla.

¹⁸Mesüra pa ket nung nisung asütsüsa süng ka lira, aser pai nisung dakji zükra aser paji süra, paji nisung tepseter lir: nisung tepseterji atangji südaktsütsüla.

¹⁹Azü mangyanger jagi nisung tepseterji südaktsütsü; kodang pai paji ajurudir pai paji südaktsütsü.

²⁰“Nisung kari tesempa agi tangar ka dak tsüngoktsüra mesüra mita atar pa dakji langka ondaktsüra, aser pa süadokra,

²¹mesüra tsükchitep agi pa dak teka agi zükra aser pa süadokra, nisung dak azüksangji idangji südaktsütsüla; paji nisung tepseter lir: kodang azü mangyangeri pa ajurudir pai paji südaktsütsü.

²²“Saka tsükchitep kecha makai dang aoksa-a pa dak tsüngoktsüra mesüra mita meli-i langka agi pa dak ondaktsüra,

²³mesüra mungui pa dak lung kar ondaktsüra, aser pa süadokra, aser pa tsükchir masü mesüra yirutsütsü mebushi,

²⁴idangji iba ozüng yagi teloki pa aser azü mangyanger na tsüngda o bendangtsü

²⁵Azü mangyanger ket nungi teloki pa agizüktsü aser pa jenoka alidak yimti nungji yutsütsü: aser temeshi totzü agi mezüja shimtetba temaba putir masü tashi pa yangji alitsü.

²⁶Saka pa jenoka alidak yimti arrtsü atena ora,

²⁷aser azü mangyanger jagi pa yimti atena ngua pa tepsetra, azü tokshiba asoshi mangyangerdak tai kecha malitsü.

²⁸Kechiaser temaba putir masü tashi pai jenokdak yimti nungji alitsü tim liasü, saka temaba putir sür külenang pa pei senmang bushia shilangtsü.

²⁹Itemi nenok tarutsü putu ajak nung teti atema yimsü ozüngji alitsü.

³⁰ “Shibaisa nisung tepsetdir nisung tepseter anema kulipur bang ajanga pa tepsettsü. Saka kuli ka kisüng ajanga nisung ka mesüdaktsütsüla.

³¹Tasütsü langa aliba nisung tepseter atema talangzükba sen magitsüla, saka paji atangji südaktsütsüla.

³²Jenokdak yimti nung alir temaba putir masüdang pai linüki meyipa arua alitsü asoshi talang sen agütsüra, aji magitsüla.

³³Nenok aliba limaji memenentsütsüla. Azü tokshiba agi alimaji menendaktsür, shibai azü tokshir pa zü agi mesüra tanga zü kecha agia alima nung azü tokshiba pungitsü makok.

³⁴Nenok kong alir, iba limaji temenendaktsü, kechiaser nenok kong alir iba nungji nia lir, kechiaser ni KIBUBA Israel chir rongnung alir”