Read njo ZÜNGDANGBA 36 Bible Online

ZÜNGDANGBA 36 - njo bible

ZÜNGDANGBA 36

¹Gilead kidong tanishirtem, Yosef semchirtem Manase jabaso Makir jabasotem Mosa aser Israel chir kidong tanishirtem madangi arua ashi,

² “Kodang KIBUBAi alinükji senmangtsü asoshi Israel chirtem nem an toktanga agüjang ta kü kibur dang ashi, onok adianu Zelofehad senmangji par jalatem nem agütsütsü pai ne dang melaogo.

³Saka parnoki tangar kin ka den ki yimra, onok tebu senmang nungi parnok shilem agizüka bener oa shir kin den parnok lidir par meyongji kümadoktsü.

⁴Kodang Israel nunger jubilee küm mungdir, idangjibo parnok senmangji shirnok kiyi parnok ao par meyong nungji adentsü, aji oda onok tebu senmang nungi parnoki par meyong senmang bener oadoktsü.”

⁵Idangji KIBUBA o ama Mosai Israel chirtem dang mela-a ashi, “Yosef kidongi kechi shiogo aji shitak lir.

⁶Zelofehad jalatem indang KIBUBAi melabaji ya lir, parnok shir kiyi oner, odakjang saka parnoki tebu kidong kinunger kiyi dang aotsü.

⁷Israel nung senmang kecha kin kati bener aotsü makok, kechiaser Israel chirtem pei tebu kidong senmang amangtsü.

⁸Tetsür shirnoki senmang amangdir, lai pei tebu kin aser kidong nungi kar den kiyi ayimtsüla, anungji Israel chirtemi pei tebu meyong senmang amangtsü.

⁹Senmang kecha kin ka nungi kin kati aotsü makok; kechiaser Israel kin shia pei senmang amangtsüla.”

¹⁰Anungji KIBUBAi Mosa dang melaba ama Zelofehad jalatemi inyak.

¹¹Mahla, Tirza, Hogla, Milka aser Noa, Zelofehad jalatemi par tebu tenu chirtem ki-i ai.

¹²Parnoki Yosef jabaso Manase kidong dangi ao, aser parnok senmang tebu kinunger kin den liasü.

¹³Item tzü-züng-ozüng ya KIBUBAi Israel chirtem nem Mosa ajanga Moab lenten Yordan anasa Yeriko nung agütsü.