Read njo ZÜNGDANGBA 4 Bible Online

ZÜNGDANGBA 4 - njo bible

ZÜNGDANGBA 4

²“Levi chirtem rongnungi Kohat jabasotem kidong, kidong aser kinunger shia züngdangang.

³Küm semer nungi tenem tain tashi parnokji züngdangang.

⁴Sentep süki temeshitiba oset-tsüsetji Kohat jabasotemi anebalutsü.

⁵Kodang tanendakji aenshidir, Aron aser par jabasotem telungi aitsü aser tetongdangba meibaji agizüka aji agi ozüng süngdenji nembangtsüla.

⁶Ibaji shiküp tajung agi meibangtsüla, iba manung anüng sentsü sü amungloktsü aser idakji süngra enoka yanglutsüla.

⁷“KIBUBA dang chiyungtsü tenlaba langbang manung parnoki anüng sentsü sü ka alemtsüla, iba manung aosu, chikok-chisang, susa tajemtsü tenla asoshi marok aser liangmesen arongba po ayutsüla, aser teti aliba amtsükji langbang manung alitsüla.

⁸Aser item madak parnoki jakjaa meremba sü amloktsüla, aser aji shiküp agi nembangtsüla aser iba manung süngra enoka ayutsüla.

⁹“Anüng sentsü sü ka agi tesangwa asoshi milendong, milen, mijepru, misü ayuba aser totzü bongdang ajak dena parnoki nembanga ayutsüla.

¹⁰Ajiser oset-tsüset ajakji shiküp agi nembanga ayutsüla, aser aji tapuba satem ka nung ayutsüla.

¹¹“Hon tenladak manung parnoki anüng sentsü sü ka alemtsüla aser aji shiküp agi nembangtsü aser süngraji enoktsü.

¹²Tekülemdak amshiba chipo-anpo ajakji parnoki abentsüla, aji anüng sentsü sü ka nung aleper shiküp agi nembanger satem manung ayutsüla.

¹³Tekülemdak nungi autji parnoki endoktsüla, aser nakrema meremba sü ka iba manungji lemloktsüla.

¹⁴Iba manung tenladak amshiba chipo-anpo ajak miteptsü shijok, tateptsü aser susaji ayutsüla. Item ajakji shiküp agi nembangtsü aser süngraji enoktsü.

¹⁵Kodang tanendakji aenshidir, Aron aser par jabasotem tekülemdak amshiba temeshi oset-tsüset ajakji nembanga renemdir, Kohat jabasotemi arua aji abentsüla. Saka parnok süadoka lir ta tekülemdakji parnoki mekongshitsüla. Kohat jabasotemi sentep süki nung aliba oset itemji abentsüla.

¹⁶“Aron putir jabaso Eliazari tesangwa asoshi totzü, teronem menemba liangmesen, teti aliba chiyungtsü, aser temezütsüba totzü item ajakji anebalutsüla. Tekülemdak süki aser iba nung oset ajak madak pai ketdang asütsüla.”

¹⁷KIBUBAi Mosa aser Aron dang ashi,

¹⁸“Levi nunger rongnung Kohat kinungertem tejentokma.

¹⁹Saka parnok kodang temeshitiba osettem anasai arudir, parnok masütsü asoshi yamai inyakang: Aron aser pa jabasotem aitsü aser nisung shia nem pei mapa aser khu agüjang,

²⁰saka Kohat kinungertemi putirtemi khu renembaji reprangi ira, parnok asütsü.”

²¹Aser KIBUBAi Mosa dang ashi,

²²“Gershon jabaso kidong kidong, kinunger kinunger, tenüng züngdangang,

²³sentep süki nung mapa inyaktsü apusoa airtem küm semer nungi tenem tashi tain nai parnok züngdangang,

²⁴Tenzükba aser khu abenba nung ya Gershon kinunger mapa lir:

²⁵Parnok tekülemdak süki teyindangba, sentep süki temeiba aser iba temalen aliba shiküp tenembangba, sentep süki kikümbang tetongdangba;

²⁶aser kimalen iloka alibatem, kimalen kiküm lenmang tetongdangba koba nung tekülemdak süki aser tenladak dena lir, aser item lisü, aser iba mapa atema oset ajak item jagi kechisa inyaktsü ali, iba nung parnok tenzüktsüla.

²⁷Gershon jabasotem teinyaktsü mapa ajak, parnoki abentsü khu ajak nung aser parnoki inyaktsüba ajak nung, Aron aser par jabasotemi melaba kübok alitsü aser nenoki parnok nem par khu ajak nungloka yujang.

²⁸Sentep süki nung Gershon jabaso kinunger mapa ibai lir; aser Aron putir jabaso Ithamar kübok parnok ketdang kümdaktsütsüla.

²⁹“Merari jabasotem asoshi parnoki kidong-kidong, kinunger-kinunger nai parnok züngdangang.

³⁰Sentep süki nung mapa inyaktsü mapai air nisung shia küm semer tema nungi küm tenem tashi tain nai parnok züngdangtsüla.

³¹Sentep süki nung parnok khuji ya: tekülemdak süki süngtsüktem, iba tarütangtsü, tongshi, aser item tesembangtsütem,

³²aser kimalen meketa tongnütem, aser item tesembangtsü aser tazüngtsü, aser item lisü, oset-tsüset ajak item asoshi kechisarena dena, aser parnok mapa tenüng jaa parnoki abentsü khu nenoki ashitsüla.

³³Aron putir jabaso Ithamar kübok Merari jabaso kinungertemi sentep süki nung inyaktsüba parnok mapa ajakji ya lir.”

³⁴Mosa, Aron aser telok tanishirtemi Kohat nunger kidong-kidong, kinunger-kinunger züngdang.

³⁵Sentep süki nung mapa asoshi, mapai air nisung shia küm semer nungi temalen küm tenem tashi,

³⁶aser shirnok kinungertem züngdang, itemji meyirijang ana, noklang tenet ser tenem liasü.

³⁷Mosa teka ajanga KIBUBAi melaba ama, Kohat kidongtem sentep süki nung mapa inyaker ajak Mosa aser Aron nati züngdangba parnok itemi lir.

³⁸Gershon jabasotem parnok kidong-kidong, kinunger-kinunger züngdangbaji,

³⁹sentep süki nung mapa inyaktsü asoshi mapai air nisung shia küm semer nungi tema küm tenem tashi tain,

⁴⁰oda parnok kidong-kidong, kinunger-kinunger züngdangba meyirijang ana, noklang trok ser semer liasü.

⁴¹KIBUBAi melaba ama sentep süki nung tenzüker ajak Gershon jabasotem parnok kidong-kidong, kinunger-kinunger Mosa aser Aron nati züngdangba itemi lir.

⁴²Merari jabasotem parnok kidong-kidong, kinunger-kinunger züngdangbaji,

⁴³sentep süki nung mapa inyaktsü asoshi mapai air nisung shia küm semer nungi tema küm tenem tashi,

⁴⁴oda parnok kidong-kidong, kinunger-kinunger züngdangbaji meyirijang asem, noklang ana liasü.

⁴⁵Mosa teka ajanga KIBUBAi melaba ama Merari jabasotem parnok kinunger-kinunger Mosa o Aron nati züngdangba itemi lir.

⁴⁶Mosa, Aron aser Israel nunger tanishirtemi Levi nunger kidongkidong, kinunger-kinunger ajak züngdang,

⁴⁷Sentep süki nung khu abentsü mapa, tenzüktsü mapai air nisung shia küm semer tema nungi küm tenem tain tashi,

⁴⁸oda parnok züngdangba meyirijang ti noklang pungu ser tir liasü.

⁴⁹KIBUBAi Mosa ajanga melaba ama nisung shia pei mapa aser kechi khu abentsü aji parnok nem lemsa-a agütsü. Yamaji KIBUBAi Mosa dang melaba ama parnok züngdang.