Read njo ZÜNGDANGBA 5 Bible Online

ZÜNGDANGBA 5 - njo bible

ZÜNGDANGBA 5

¹KIBUBAi Mosa dang ashi,

²“Zütsüra aketer mesüra pei mang nungi langka yima aluba mesüra tasümang dak kongshiba agi menena akümba, yamala nisungtemji tanendak nungi aridokang ta Israel nungertem nem ozüng agüjang.

³Tebur saka tetsür saka tanendak kimalen parnokji aridokang, anungji tanendak koba nung ni lir, aji parnoki memenentsütsü.”

⁴Israel nungertemi yamaji inyak, parnok tanendak kimaleni yokadok. KIBUBAi Mosa dang ashiba ama parnoki inyak.

⁵ KIBUBAi Mosa dang ashi,

⁶“Israel nunger dang shiang, tebur mesüra tetsür kati tangar nisung anema aibelenra aser KIBUBA anema tamang makatettsüsa inyakra iba nisungji tai alitsü,

⁷aser pai pei tai nangzüktsüla. Pai pei tai ajak menoktsüla, aser shiba dak pai tamajung inyak pa nem shilem pungu nung ka tali enoksemer agütsütsüla.

⁸Saka shiba nem tai asoshi temenok agütsütsü ali, iba nisung sosem melira temenok agütsübaji KIBUBA meyong alitsü, aser aji putir nem agütsütsüla. Iba den pa temenen pungitsü asoshi san tebong ka alitsü.

⁹Israel nungertemi temeshi oset kobasa putir dangi bener arur aji pa meyong alitsü.

¹⁰“Nisung shia temeshi sempettemji pa meyong alitsü, saka putir nem koba agütsüogo, ajibo putir meyong alitsü.”

¹¹KIBUBAi Mosa dang ashi,

¹²“Israel nungertem dang shiang, nisung ka kinungtsü aibelena oa pa anema temenen menara,

¹³oda tangar den nüktapangtara aser aji pei kinungpu nungi miima lira, la menena kümaka la anema kuli melira kechiaser la jeptaka mapu,

¹⁴saka la kinungpui la dak tenük merema la menena meliaka la dak temulung melemra

¹⁵idangji pai pei kinungtsüji putir dangi anir aotsü; pai barley am seret ka la asoshi tenla abentsüla. Iba nungji totzü meshioktsüla mesüra liangmesen meinoktsüla, kechiaser ibai temulung malemba chiyungtsü tenla lir, oda temenen bilemtetdaktsütsü chiyungtsü tenla lir.

¹⁶“Putiri la anasa anir arua KIBUBA madang yutsütsü;

¹⁷aser putir jagi ali po ka nungi temeshi tzüji agitsü, aser tekülemdak süki atem nung aliba auyijia agitsü aser aji tzü nungji enoktsütsü.

¹⁸Putir jagi tetsürji KIBUBA madang noktaka yutsür, la kolak nung kuji saladaktsütsü, aser tebilemtettsü tenla, tenük meremba chiyungtsü tenlaji la ket nung amdaktsütsü, aser atakatem kümdaktsüba tzü takuji pa teka nung ama atatsü.

¹⁹Idangji putiri tetsürla nemji azüngashidakja la dang ashitsü, Tebur shingaia ne den memedemi lira, aser nebuba kübok lira nai aibelena melira, iba atakatem bener aruba tzü yagi ne dak tamajung kecha tatokdaktsü.

²⁰Saka nebuba den lia nai aibelena lira aser tangar tebur den medemba agi na menena lira;

²¹putiri tetsürla nemji atakatem aser azüngashidakji ashitsü, KIBUBAi na tansütsü ka kümdakjang, ne tepi kongrepa aser ne tepok awakba agi na nübur rongnung atakatem kümdakjang.

²²Tang iba atakatemtsüba tzü ya ne tepi kongrepba aser ne tepok waka ne nu mendeni idakjang, aser tetsür jagi langzütsü, ‘Ni mulunger, KIBUBAi yamaji inyakangma.’

²³“Putiri item atakatemji kaketlong ka nung zülutsü aser aji tzü taku nungji shitoktsü.

²⁴Aser atakatem kaoba tzü takuji la nem jemdaktsütsü, aser la dak aji agi kangshidaktsütsü.

²⁵Putir jagi temulung malemba chiyungtsü tenlaji tetsürla teka nungi agitsü, aser KIBUBA madang chiyungtsü tenlaji ayipshitsü, aser aji tenladaki bener arutsü.

²⁶Aji bilemtettsü asoshi putir jagi chiyungtsü tenlaji tekapu ka sünga amtsü aser aji tenladak arongtsü, aser tesülen tzüji tetsürla nem jemdaktsütsü.

²⁷Kodang pai la nem tzüji jemdaktsüdir, la menena lira aser la kinungpu anema tai mena-a lira, atakatemdaktsüba tzüji la daki aitsü aser taku akümtsü, aser la tepok awaktsü aser la tepi kongrepa akümtsü; aser tetsürji pei nübur rongnung atakatem ka alitsü.

²⁸Saka tetsürji memeneni meshiteta lira, la dak kecha masütsü, aser lai ano tanur asotsü.

²⁹“Kodang kinungtsüi pei kinungpu kübok lir nung mashileni oa menena kümdir, ibai temulung malemba ozüng lir.

³⁰Mesüra tebursang dakji temulung malemba shisatsü ka arua, pai kinungtsü dak temulung melemi kümdir, idangji pai tetsürji KIBUBA madang yutsütsüla aser putir jagi iba ozüng ajak la dak inyaktsü.

³¹Kinungpuji iba nungi merükteta alitsü saka tetsürlai aibelena lira iba taiji lai abentsü.”