Read njo ZÜNGDANGBA 6 Bible Online

ZÜNGDANGBA 6 - njo bible

ZÜNGDANGBA 6

¹KIBUBAi Mosa dang ashi,

²“Israel nunger dang shiang, kodang tebur süshia tetsür süshia pei sasa KIBUBA asoshi bendanga taküm alitsü Nazirit tatemzükba, oda balaka atemzükba lidir,

³pai pei sasa yi aser mejemtzü nungi pilatsüla. Pai yi tasentzü mesüra mejemtzü tasentzü mesüra tsükmenatzü yi majemtsüla, mesüra tsükmenatzü tajem mesüra takong machitsüla.

⁴Pa meshiteta aliba anogo tepiyong tsükmenatzü süngjang agi yangluba; telung nung tejang nungi teküp tashi kecha pai machitsüla.

⁵“Pa meshiteta aliba tatemzükba anogo ajak nungji pa tekolak nung kusünok kecha mataloktsüla; anogo mabensa tashi koba nung pai pa sasa bendanga meshiteta KIBUBA asoshi lidir, pa temeshi alitsü. Pai pa ku talang küma adokdaktsütsüla.

⁶Pai KIBUBA asoshi bendanga meshiteta aliba anogo ajak pai tasü mang anasa maotsüla.

⁷Pai pei sasa tebu atema mesüra tetsü atema mesüra tedi tenu, mesüra teyi tenu atema parnok asüdang memerük makümtsüla. Kechiaser Tsüngrem atema pa pila-a ayuba temaitsüji pa tekolak nung lir.

⁸Pa bendanga meshiteta aliba anogo ajak nung KIBUBA dang pa temeshi lir.

⁹“Nisung kar aoksa-a pa anasa süadokra, aser pai meshiteta ayuba kuji menena kümdaktsüra, idangji pai pa meshitetba anogo nung tekolak sütoktsüla. Tenetnübuba nung pai aji sütoktsüla.

¹⁰Tinübuba nung guduru ana mesüra guduru chanu ana putir dangi sentep süki kishi jagi bener arutsüla.

¹¹Putir jagi ka temenen tenla asoshi, aser kaji tarongba tenla asoshi tenla-a pa asoshi temenen pungitsü, kechiyong tasümang agi pai pa tai mena. Panüjisa pa kolak meshitettsüla.

¹²Pa bendanga aliba anogo nung KIBUBA asoshi pa pila-a alitsüla. Aser san tepong küm ka chanu ka tai tenla asoshi pai bener arutsüla; saka temalen pai bendanga meshiteta aliba anogotemji pai menendaktsü nungji ajibo mezüngsemtsü.

¹³ “Nazirit atema ibai ozüng alitsü. Kodang pai pila-a aliba anogotemji abensadir, pai tenlaji sentep süki kikümbangi bener arutsüla.

¹⁴Aser pai KIBUBA nem pa tenla agütsütsüla. Tarongba tenla asoshi küm ka chanu san tepung tarak maket ka, aser küm ka chanu san tetsü tarak maket ka temenen tenla asoshi aser san tepung tarak maket ka yimjung tenla asoshi tenlatsüla.

¹⁵Piyazü meinokba amtsük molok ka, amzü tanük totzü den meyoktepba amtsük telong, aser totzü mezür piyazü meinokba amtsük tapu ka, aser iba den parnok chiyungtsü tenla aser parnok tajemtsü tenlatsüla.

¹⁶“Putir jagi itemi KIBUBA madang agütsütsü, aser temenen tenla aser tarongba tenla agütsütsü.

¹⁷San tepungji piyazü meinokba amtsük molok denji KIBUBA madang yimjung tenla tepseta tenlatsü. Iba jagi putiri ano chiyungtsü tenla aser tajemtsü tenla agütsütsü.

¹⁸Aser Nazariti pa bendanga meshiteta ayuba tekolakji sentep süki kishi züngdang sütoktsü, aser bendanga meshiteta aliba kuji yimjung tenla tepsetba kübok aliba mi manungji enoktsütsü.

¹⁹“Kodang Naziriti bendanga meshiteta ayuba kuji sütokdir, putiri pa nem san tepung shi soa aliba nungi tapu ka agiteta, molok nungi amtsük ka aser piyazü meinokba amtsükji agiteta agütsütsü.

²⁰Aser putir jagi itemji ayipshia tenla asoshi KIBUBA madang ayipshitsüla. Ayipshiba tenla teku aser sarutenba tepi dena putir asoshi ibai temeshi lir. Iba sülen jiang Nazirit jagi tsükmenatzü yiji ajemtsü akok.

²¹“Pa pila-a aliba mapang shibai KIBUBA dang tenla asoshi tatemzükba ayur Nazirit asoshi ibai ozüng alitsü. Nazirit ozüngi melaba ama pai atemzükbaji pai benshitsüla.”

²²KIBUBAi Mosa dang ashi,

²³“Aron aser pa jabasotem dang shiang, nenoki Israel nungertem moatsüdang yamai ashitsüla.

²⁴“KIBUBAi na moajang aser nüka liang;

²⁵KIBUBAi pa tejak ne dak yalokjang, aser ne dang yimlibilem sayuang;

²⁶KIBUBA tejak ne tsütsüi meyipdakjang, aser ne nem tesünep agüjang.

²⁷“Anungji parnoki Israel nungertem rongnung kü tenüng agi ajatsü, idangji ni parnok dang langzütsü.”