Read njo ZÜNGDANGBA 8 Bible Online

ZÜNGDANGBA 8 - njo bible

ZÜNGDANGBA 8

¹Idangji KIBUBAi Mosa dang ashi,

²“Aron dang shiang, kodang ni milen tenetji tsüklokdir milendong atalokdak tejaklenji tesangwa agütsütsüla.”

³Aser Aroni yamaji inyak; KIBUBAi Mosa dang melaba ama, milendong tejaklen sangwatsütsüsa pai milenji tsüklok.

⁴Tang milendong yanglubaji yamai; temtsüng nungi naro tashi hon agi tsünga liasü. Milendongji KIBUBAi Mosa dang sayuba tereprangtsü kasa nung yanglu.

⁵KIBUBAi Mosa dang ashi,

⁶“Israel chirtem rongnungi Levitemji piladakja parnokji meshitetjang.

⁷Parnok merükdaktsütsü asoshi nai parnok dang yamai inyakang: temenen pungdoktsü amshiba tzü parnok dak rüklokjang, aser parnok temang ajak kusünok agi ongdokjang, aser parnok süoshi shitokjang aser parnok sasa merüktetdakjang.

⁸Ajiser parnok nashi pungchi chanu ka agia, aser iba chiyungtsü tenla asoshi totzü den meyoktepba amzü tanük aser nai temenen tenla asoshi nashi pungchi chanu ka agitsüla.

⁹Levitemji sentep süki madangi anir arua, Israel chirtem telok ajak adenshia alidakji noktakdaktsütsüla.

¹⁰Nai Levitemji KIBUBA madangi anir arutsüla aser Israel ajaki; Levitem dak teka agi nemettsüla.

¹¹Aroni Levitemji Israel ajak nungi KIBUBA madang tayipshiba tenla ka ama agütsütsüla, anungji parnokji KIBUBA asoshi mapa inyaktsü renemtettsü.

¹²Aser Levitemi nashi pungchi ana kolak nungji parnok teka agi nemettsüla; itemji parnok temenen pungitsü asoshi ka, aser kaji tarongba tenla asoshi KIBUBA dang tenlatsüla.

¹³Levitemji Aron aser par jabasotem madang noktakdakjang, aser parnokji KIBUBA madang tayipshiba tenla asoshi agütsüdakjang.

¹⁴“Yamaji nai Levitemji Israel chirtem nungi piladakjang, aser Levitemji kü meyong alitsü.

¹⁵Nai parnok meshitettsü, aser tayipshiba tenla asoshi parnokji tenlar külen, iba sülenji Levitemi sentep süki mapa inyaktsü aitsüla.

¹⁶Kechiyong Israel nunger nungi ni asoshi tenzüktsü parnok shimteta lir. Israel pur mezüng asoba ajak, shirnoki tamasa nu menden lapok, parnok melena ni asoshi parnok ni agiogo;

¹⁷ kechiyong nisung aser shiruru mezüng anguba anapronglaji Israel chir rongnung ajak kü meyong lir. Ijip lima nung mezüng asoba tepsetba anogo nungi ni parnok ni atema meshiteta yuogo.

¹⁸Aser Israel chir rongnung mezüng asoba ajak melena ni Levitem agiogo.

¹⁹Israel pur tekülemdaki anasa arudang parnok dak temerenshi agi matongtsü, aser Israel chirtem temenen pungdoktsü asoshi sentep süki nung Israel chirtem mapa inyaktsü Israel chir rongnungi ni Levitem Aron aser pa jabaso nem tenzüktsü agütsüogo.”

²⁰Yamaji Mosa aser Aron, aser Israel pur ajaki Levitem dang inyak. Levitem indang KIBUBAi Mosa dang melaba amaji Israel purtemi inyak.

²¹Aser Levitem parnok sasa temenen nungi merükteta parnok pei süoshi shitok, aser KIBUBA madang Aroni tayipshiba tenla asoshi parnok tenla.

²²Ajiser Aron aser pa jabasotem madang sentep süki nung mapa inyaktsü Levitemi ai. Levitem indang KIBUBAi Mosa dang melaba amaji parnoki parnok dang inyak.

²³KIBUBAi Mosa dang ashi,

²⁴“Levitem asoshi ibai ozüng alitsü: parnok küm metsürpungu tain nungi temalen tashi sentep süki nung mapa inyaktsü,

²⁵saka küm tenem abensarbo parnok mapa inyakba nungi anentsüla.

²⁶Parnoki pei adianutem sentep süki nungi mapa inyakertem yaritsü akok, saka parnoki mapaji meinyaktsüla. Yamaji nai Levitem asoshi mapa lemsa-a agütsütsüla.”