Read njo ZÜNGDANGBA 9 Bible Online

ZÜNGDANGBA 9 - njo bible

ZÜNGDANGBA 9

¹ Israel chirtem Ijip lima nungi adoka tanabuba küm mezüng ita Sinai lisem lima nung KIBUBAi Mosa dang ashi,

²“Israel chirtem süia aoba benjongji mapang shitak nung amungtsüla.

³Iba ita anogo terpezünü buba nikongdang mapang shitak nung, yimsü ozüngi melaba amato nenoki ibai amungtsüla.”

⁴Anungji Israel chirtem süia aoba benjongji amungtsüla ta Mosai ashi.

⁵Aser tanabuba küm mezüngbuba ita anogo terpezünü buba nikongdang Sinai arem nung parnoki süia aoba benjongji amung. KIBUBAi Mosa dang melaba amato parnoki inyak.

⁶Saka parnok rongnung kari tasümang dak kongshiba agi memerüki küma alinung, parnoki kasa anogo nungji iba Benjong makatettsüsa aküm. Anungji iba anogo nungji parnoki Mosa aser Aron dangi arua,

⁷Mosa dang ashi, “Tasümangdak kongshiba agi onok memerüki lir, saka mapang shitak nung Israel chirtem den külemi KIBUBA dang tenla agütsütsüsa kechiba onok sota ayutsü?”

⁸Mosai parnok dang langzü, “KIBUBA nungi nenok indang kechi shidir aji ni mangashi tashi ata-a liang.”

⁹Idangji KIBUBAi Mosa dang ashi,

¹⁰“Israel chirtem dang shiang: nenok mesüra nenok semchisemnur kari tasümang dak kongshiba agi memerüki kümaka mesüra aenlen oagi lira, parnoki KIBUBA süia aoba benjongji amungtsüla.

¹¹Parnoki aji tanabuba ita anogo terpezünü buba nikongdang amungtsüla, piyazü meinokba amtsük aser süngo taku den aji achitsüla.

¹² Ibaji parnoki anepdang tashi kecha mayutsüla, mesüra teret kecha meraksatsüla. Süia aoba benjongji yimsü ozüng amato parnoki aji benshitsüla.

¹³Saka nisung shiba merüka lir aser aenleni oa mali, saka süia aoba benjong mamunger iba nisung pei nübur nungi jentoktsüla kechiaser mapang shitak nung pai pei tenla KIBUBA nem magütsü. Iba nisungi pei temenen abentsüla.

¹⁴“Ne den amunger bendanger kari KIBUBA dang süia aoba benjong kanüra, yimsü ozüng amato aji inyaktsüla. Bendanger aser linük senso anaprongla asoshi yimsü ka dang alitsüla.”

¹⁵Tekülemdak süki renemba anogo nung, tekülemdak Ozüng Süngden ayudakji mepet agi sübang; aji nikongdang nungi anepdang tashi mi ama süki manung mepetji liasü.

¹⁶Aser aji teti, oda anüngdang mepet agi aser aonung aji mi ama liasü.

¹⁷Kodangsa süki nungjagi mepetji ajungketdir, idangji Israel chirtem apusoa ao; aser kong mepetji anendir, yangji parnoki anen.

¹⁸KIBUBAi melaba ama Israel chirtemi apusoa ao, aser KIBUBAi melaba ama parnoki anen. Kopiga tekülemdak süki nungji mepetji lidir papigaji parnoki anena liasü.

¹⁹Aser kodang mepetji tekülemdak süki manung anogo aika lidir, idangji Israel chirtemi KIBUBAi melaba ama apusoa mao.

²⁰Aser khen khenbo mepetji tekülemdak süki manung anogo ishika dang liasü; idangji KIBUBAi melaba ama parnoki anena ali, aser KIBUBAi melaba ama parnoki apusoa ao.

²¹Khen khenbo mepetji nikongdang nungi anepdang tashi dang liasü, aser kodang mepetji anepdang ajungketdir, parnoki apusoa ao, mesüra aji anüngdang nungi aonung tashi lira, kodang mepetji ajungketdir idangji parnoki apusoa ao.

²²Anogo ana süshia, mesüra ita ka, mesüra küm ka mepetji tekülemdak süki manung süloka alidang Israel chirtemi anena ali, aser apusoa mao; saka aji ajungketdang parnoki apusoa ao.

²³KIBUBAi melaba agi parnok anena ali, aser KIBUBAi melaba agi parnoki apusoa ao. Mosa ket ajanga KIBUBAi melaba ozüng parnoki benshia liasü.