Read njo MIKA 2 Bible Online

MIKA 2 - njo bible

MIKA 2

¹Shirnoki tai-temenen shisadanger aser yipten nung tamajung tasa asar, parnok asoshi aiatai! Anepdang sangwadang parnoki aji inyaker, kechiaser aji parnok ket tashi nung lir.

²Parnoki alu azüabunger aser itemji rakzüker, parnoki kidang alir timtemdaktsür aser itemji bener oadoker. Anungji parnoki aluyimer aser par ki, nisung ka aser par senmang raksatsür.

³Anungji KIBUBAi yamai ashir, “Ajiang iba kibong anema ni tamajung tasa asadagi, koba nenoki nenok tekong nungi agientsü makoktsü, mesüra nenoki metong metonga jajatsü makoktsü, kechiyong aji tamajung mapang asütsü.

⁴Iba anogo nung parnoki nenok anema o-entepba ka bena arutsü aser temenungraba mangyim ken yamai atentsü, onok kanga mejungi raksatsüogo; pai kü nübur shilem melentsüogo, pai aji kü dak nungi koda piladaktsür! Bangdak anema apusor nem ozü lu pai lemsatsüogo.”

⁵Anungji KIBUBAr telok sentepdak an toktangba agi lisü mesangtsü na nisung shinga malitsü.

⁶“Teshin ta par ainkartemi ashir, ibala indang sayutsüngi masütsüla; maksü agi asenok memeneptsü, ta parnoki yamaji sayutsüngir.

⁷Oh Yakob kidong, ya oda shidi ma? KIBUBA tanela taremzük maka asü? Itemi pai inyakbatem asü? Shibai indang indanga jajar, pa dang kü o agi tajung meinyaker no?

⁸Saka tawabo tsükchir ka amai kü nüburtem ni anema apuso, süngjemsüngjema alir nungi nai sobutsü sepzükadoker, rara indang kecha mebilemi shirnoki tamang kaa anasa süia aor parnok nungi sepzükadoker.

⁹Kü nübur tetsürtem nenoki parnok ki tajung nungi aridoker, parnok tanurtem nungi teti asoshi kü sentsüwangshi nenoki bener oadoker.

¹⁰Nenok shishiang aser oang, kechiyong ya nenok anisüngzükdak masü! Kechiaser memerükba yong, nenok tejashitsü tesamatsü agi samatsü.

¹¹Nisung kati tiyazü aser olulu jembia, ni ne dang yi aser mejemtzü indang shintsü, ta shira, pa iba nübur ainkar asütsü!

¹²“Oh Yakob, nenok ajak, ni atangji sentepdaktsütsü; atangji ni Israel tanüngba anitentsü; santem ama ni parnok külemi toktsütsü, aser chiyimdak telok ama, nisung telok aliba agi parnoki ola tulu adoktsü.

¹³Parnok jakdang teraksatsür tuogo, parnoki süngkhüm rakpoktsü aser iba jagi aotsü; parnok madak KIBUBA leniba sür, parnok chuba parnok jakdang süia aotsü.”