Read njo MIKA 3 Bible Online

MIKA 3 - njo bible

MIKA 3

¹Ni ashi, Yimlibilema angang, nenok Yakob lenirtem, aser Israel kidong yimsüsürtem, ochiba metettsübaji nenok masü no?

²Nenoki tajung sempar aser tamajung meimer, nenoki parnok nungi parnok teküp aser parnok teret nungi parnok shi shizüker;

³ano nenoki kü nübur shi achir, aser parnok nungi parnok teküp asar, aser parnok teret raksatsür; aser nenoki anpo tongdaktsü ama, aser kürapo nung shi ama, parnok anük anüka rangsar.

⁴Idangji parnoki KIBUBA dang ayimtentsü, saka pai parnok dang melangzütsü, hau iba mapang nung, parnoki tamajung inyakba yari parnok nungi pa jak miima-adoktsü.

⁵Kü nübur mashileni aniba ainkartem, oda shirnoki tachitsü langka angudang, tesünep, ta ayimtener aser shirnoki parnok tebang nung langka meinoktsür, pa anema parnoki rara tenzüker! Parnok indang KIBUBAi yamai ashir.

⁶“Aji asünung, nenok asoshi mangdang makai aonung alitsü, aser nenoki metakzütettsüsa nenok asoshi kanga tammang alitsü. Aser ainkartem madak anü aitsü aser parnok madak anogo kanga tammang akümtsü.”

⁷Aser ainkartem aktsü aser tetakzürtem süngmangtsü, hau, parnok ajak tebangmechi nembangadoktsü! Kechiyong Tsüngrem nungi telangzüba maka.

⁸Saka Yakob kidong dang pa ozüng raksaba, aser Israel dang pa temenen indang metetdaktsütsü asoshi KIBUBA tanela agi aser ochiba aser tashi agi ni sünga lir.

⁹Yimlibilema ya angang, nenok Yakob kidong tanishir, Israel kidong yimsüsür; nenok ochi sempar aser shitaka paizüka yutsürtem,

¹⁰nenoki azü agi Zion, aser tai agi Yirusalem yanglur.

¹¹Tongtipuri süpokrem asoshi o bendanger, aser putirtemi taa agütsüba agi sayur, aser pa ainkartemi sen asoshi jembir. Aji saka parnoki KIBUBA dak metaloker, “Asen rongnung KIBUBA melika ma? Tia tamajung kecha agia asenok madak matongtsü” ta ashir.

¹² Anungji nenok meji, Zion alu ama angensatsü, aser Yirusalem teraksa jagi ali temejung ka akümtsü, aser tenlaki tenemji min tenem ama alitsü.