Read njo MIKA 4 Bible Online

MIKA 4 - njo bible

MIKA 4

¹Tarutsü anogo nung ya oda ataloktsü, oda KIBUBA ki tenem tematiba tenem küma yanglutsü, aser ungsem manung ajungkettsü, aser kintem aji agi sendentsü,

²aser kin aika arutsü aser ashitsü, “Arung, KIBUBA tenem aser Yakob Tsüngrem kidangi tudi, aser pai pa lenmang indang asenok dang sayutsü, aser pa lenmang nung asenok jajatsü; kechiyong Zion nungi ozüng aser Yirusalem nungi KIBUBA o sangdongtsü.”

³ Pai kin aika tsüngda nung o bendangtsü, aser talang nung tashi tait kintem indang lemtettsütsü, aser parnoki pei nok merütsüng küma, aser nü ninok küma atsüngtsü; kini kin anema nok memekangtsü, mesüra joko parnoki rara mangazüktsü.

⁴ Saka parnok nisung shia pei tsükmenatzü dong aser mungu dong kübok amentsü; aser shingaia parnok metsübudaktsütsü, kechiyong aji Temeranger KIBUBA bang agi jembiogo.

⁵Kechiyong kin ajaki pei tsüngrem tenüng nung jajar, saka asenoki asen Tsüngrem KIBUBA tenüng nung teti tatem maka jajatsü.

⁶KIBUBAi ashir, “Iba anogo nung ni tsüngtsüker anitentsü, aser shir aridoka lir, aser shir ni timtemdaktsü parnok sentepdaktsütsü.

⁷Tsüngtsükertemji ni tanüngba kümdaktsütsü, aser mindoka alirtemji tashi tait kin ka kümdaktsütsü, aser tang nungi aser teti tatem maka asoshi parnok madak Zion tenem nung KIBUBAi chubatsü.”

⁸Na, Oh telok lungki, Zion jala ungsem, mezüng chuba yimli yimsüsüba, Yirusalem jala yimli ne dangi arutsü.

⁹Tang na kechiba ola adoka tashi agi ajeber? Nenok rongnung chuba melika ma? Mesüra tetsür nusodang ama tekangshi agi nenok atongtsüsa, nenok nem shisa tajung agütsür sama asü?

¹⁰Oh Zion jala, tetsür nusodang kangshi ama, mesenzüang aser nüngang; kechiyong tang na yimti nungi aotsü, aser moapu nung alitsü, aser na Babilon tashia aotsü, yangji na kümzüktsü, yangji KIBUBAi na ne tsükchir ket nungi alangzüktsü.

¹¹Tang kin aika na anema atenshitsü, aser ashitsü, “La memeshi-i kümdakjang, aser asen tenük agi Zion dak rangketa ajidakjang.”

¹²Saka parnoki KIBUBA tebilemba memetet, parnoki pa sentong mangatet, kechiyong pai motsüngnem tsükpong ama parnok bendena lir.

¹³Aramesoang, aser netang, Oh Zion jala, kechiyong ni ne tezü merang kümdaktsütsü aser nai nisung jenti akoreptsütsü; aser parnok oset temakzükbatemji KIBUBA nem, aser parnok rongsen alima ajak KIBUBA nem bendanga agütsütsü.