Read njo MIKA 6 Bible Online

MIKA 6 - njo bible

MIKA 6

¹KIBUBAi kechi ashir, nenoki tang angang, aramesoang, tenemtem madang nai mepiang aser ungsemtemi ne ola angashidakjang.

²Oh nenok tenemtem, aser arishia aliba alima kimung, KIBUBA rongrong angang, kechiyong KIBUBA pei nübur den rongrong ka lir, aser pai Israel den o akatsü.

³“Oh kü nübur, ni ne dang kechi inyak? Kechi nung ni na belemdaktsü? Kü dang kuli langzüang.

⁴Kechiyong Ijip lima nungi ni na anizük, aser alar ki nungi na alangzük; aser ne jakdang Mosa, Aron, aser Miriam yok.

⁵ Oh kü nübur, Moab chuba Balaki kechi tasa asa, aser Beor chir Balaami pa dang kechi langzü, tang bilemtetang; oda KIBUBA temeshi mapa nenoki metettsü asoshi Shittim nungi Gilgal tashi atalokba bilemtetang.”

⁶Kechi bener ni KIBUBA madangi arutsü, aser kü sasa temaba Tsüngrem madang apudaktsü? Ni tarongba tenla den küm ka nashi chanu bener arutsü asü?

⁷San tepung meyisa meyi agi, mesüra totzü ayongtem meyi ter agi KIBUBA peladaktsütsü? Ni ozüng raksaba asoshi ni kü mezüng jabaso agütsütsü asü? Aser kü nela temerenshi asoshi ni züsentetba kü mang metsü agütsütsü asü?

⁸Oh nisung, kechi tajung pai ne dang sayuogo, aser ochishia inyaktsü, aser yimlibilem meimtsü, aser ne Tsüngrem den ajemalua jajatsüba dak alema ano KIBUBAi na nungi kechi akhanger?

⁹KIBUBA olai yimti dang ayimtener, aser shisa takari ne tenüng tsübutsü, Oh kin aser yim mungdang, angang!

¹⁰Tamajunger kidang tamajung rongsen aser seret dong matuba tesempatsü mapa ano lir ma?

¹¹Tai seret dong aser külaka ozükba juli amshia ni merüka lidi ma?

¹²Nenok takartem teka yitepba agi sünga lir, aser yangji nisungtemi tiyazü jembir aser parnok bang nung temeli tekülakoktsür lir.

¹³Anungji ni ne dak zübu tuluka agi azük, ne menen yong ni na azüngmeyaka toktsü.

¹⁴Nai achitsü, saka tipmatemtsü, aser ne tepok tazüng alitsü, nai rizüngtsü saka bendena mayutsü; aser nai kechi rizüngtet ni nok nem agütsütsü.

¹⁵Nai metsü proktsü saka marutsü; nai oliv süngjang dak ajemshitsü, saka nabo totzü memezütsü; aser nai tsükmenatzü dak ajemshitsü,saka yibo majemtsü.

¹⁶ Kechiaser nenoki Omri ozüng aser Ahab kidong mapa ajak benshir, aser parnok tasa nung nenok jajar. Anungji ni na azüngmeyaka kümdaktsütsü aser ner nisungtem hish ta asütsüsa kümdaktsütsü. Yamaji kintemi atalaba nenoki abentsü.