Read njo MIKA 7 Bible Online

MIKA 7 - njo bible

MIKA 7

¹Ni asoshi aiatai! Kechiyong mei süngjang bendenba ama, aser tsükmenatzü lu nung tsüktok ama ni lir; tachitsü tejep mali, kü nelai tamasa amenba munguzünu asoshi jangrar saka maka.

²Tsüngrem tsübuba nisung alima nungi samaogo aser nisung rongnung shinga indanga mali. Parnok ajaki azü tokshitsü mita atar; parnok nisung shiai sang bener pei adianu arishir.

³Tamajung inyaktsü nung toktoka parnok teka sotaka lir; tongtipur aser obendangeri süpokrem akhanger, aser tulur nisungi tamajung taginüba jembir, yamaji parnoki aji külemi lokteper.

⁴Parnok rongnung tajungtibaji jemben ai ama lir, ajak dang tindangsangji atsü atsüba ai dong tamajungba. Ne mitkar anogo, oda ne temerenshi anogo tongogo; tang parnok makmakshishia alitsü.

⁵Kiyonger dak nenoki temulung telem, akang tembar dak nenoki tamang teka; shiba ne teku nung lir la madang tebang shibangang.

⁶ Kechiyong jabasoi tebu metushir, jalai tetsü anema, aser rabitsüri tenü anema apusor. Nisung ka tsükchirtemji pei kibong nisungtem lir.

⁷Saka nibo, KIBUBA dak reprangtsü, ni kü Tsüngrem tekümtet asoshi atatsü, kü Tsüngremi angashitsü.

⁸Ni anema tepelatep Oh kü tsükchirtem, ni laoaka ni noktaktsü, ni tammang nung menaka, KIBUBAji ni asoshi tesangwa alitsü.

⁹Pai kü o mebendang tashi aser ni asoshi ochiba meinyak tashi ni KIBUBA ain adokba arema abentsü, kechiaser ni pa anema temenen mena; pai ni sangwadagi anitettsü, aser ni pa temeshi tekümzükba angutsü.

¹⁰Idangji kü tsükchiri aji angutsü, aser shibai KIBUBA ne Tsüngrem kong ali ta ashi, la maksü agi asüngtsü, kü tenüki la angutsü; joko yimdong nung lishi ama la ajemsatsü.

¹¹Ne atsü jara yanglushitsü anogo! Iba anogo nungji arrtsü talangka atsülangtsütsü.

¹²Iba anogo nung Asiria nungi Ijip tashi, aser Ijip nungi ayong tashi,aser tzüyim nungi tzüyim tashi, aser tenem nungi tenem tashi, parnoki ne dangi arutsü.

¹³Aji saka nisungtem aser parnoki inyakba süngjangtem asoshi alimaji azüngmeyaka alitsü.

¹⁴Ne senmang san telok, ne nübur shirnok atsü li tiyong nung alir, itemji nüka ne ajok agi anishiang; alemli mapang ama parnok Bashan aser Gilead nung mesüdakjang.

¹⁵Na Ijip lima nungi adokba anogo nung ama ni pa dang tesüngmangtsü mapa sayutsü.

¹⁶Kintemi angutsü aser parnok tashi ajak indang aaka akümtsü, parnoki pei teka agi tebang nung ataloktsü, parnok tenarong ajaktsü.

¹⁷Per ama parnoki auyi menaktsü, alima ayazüba shiruru ama parnoki tangbanga aliba pei talidak nungi atentena adoktsü; parnoki tetsübu agi KIBUBA asen Tsüngrem dangi arutsü, aser ne madang parnoki tsübutsü.

¹⁸Pei senmang tanüngba asoshi, aser ozüng raksaba züdoka yutsütsüsa tai temenen atokba na mesüka yutsütsüsa mesükba Tsüngrem shiba ali? Pai teti pei ain adoka malir, kechiaser pai yimlibilem nung pelar.

¹⁹Pai tanaben meyiptsü aser asen madak taochi akatsü; asen tai pai tetsüng kübok ajemzüka yokadoktsü, aser nai parnok temenen ajak tzüyim tarok nung enoktsütsü.

²⁰Aser alemli anogo nung nai ozü tsürabur dang azüngashiba ama, Yakob nem temulung alemba aser Abraham nem yimlibilem agütsütsü.