Read njo HABAKUK 1 Bible Online

HABAKUK 1 - njo bible

HABAKUK 1

¹Ainkar Habakuki anguba mangdang.

²KIBUBA, kopiga ni ayimtentsü, saka nai mangashitsü? Ni ne dang teka yitepba indang ayimten, aser nai mekümzüker.

³Kechiba tai inyakba nai kü dang ngudaktsür, aser kü nem timtem reprangdaktsür? Kechiyong teraksatsüba aser teka yitepba kü madang lir; aser tetoktepba lir, aser tatsütepba adoker.

⁴Anungji ozüng chilaa lir aser ochiba madokdaktsür, kechiyong tamajungpuri temeshipur meketbanger, anungji o bendangba mashileni adoker.

⁵ Kintem madak repranga yokang aser ajiang, aser kanga süngmangseta liang! Kechiyong ni nenok tendak mapa ka inyaker, koba nenok dang shiakasa aji nenoki mamangtsü.

⁶ Kechiyong angang, ni Kaldi nunger, tesashi aser tekara kin mesotsü; aser talidak koba parnok meyong masü aji agitsü alima sema parnoki jajar.

⁷Parnokji tetsübutsü aser tajemtsü kin; parnok obendangba aser uluba parnok pei sasa nungi adokdaktsür,

⁸parnok kortem merok keyi dang nungi tekaraba, aser nikongdang tzünütem dang nungi tali tesashiba, aser parnok kor temerangertem parnok sasa kümtetkümrar; hau, parnok kor temerangertem talang nungi arur; mongzüi temeyoktsü, asoshi kara-a ayima ama parnoki yimzür.

⁹Parnok ajak tashiyim mapa asoshi arur; parnok tejak yongyaseta tejaklen shia lir, aser parnoki tepuokertem lisem ama bendener.

¹⁰Parnoki chubatem sensatsür, aser yimsüsürtem parnok madang asayatsür, aser mitsa ajak parnoki menütsür; kechiyong parnoki ali mejungketa ananger aser aji agir.

¹¹Idangji parnoki mopung ama aoner aser süia aor, tai aketba nisungtem; parnok tashiji pei tsüngrem kümdaktsür.

¹²Oh KIBUBA, kü Tsüngrem, kü Temeshisang, na tatem makadak nungi masü no? Onok masütsü, Oh KIBUBA, nai parnok o bendanger kümdaktsü; aser na, Oh Lung, parnokji merenshitsü asoshi yanglu.

¹³Tamajung dak rangloktsü ne tenük onsara temerük lir, aser tai inyakba dak nai rangloktsü makok; ajangla nai kechiba külakkübonga benshirtem dak ang repranger, aser tamajungeri nisung shiba pa dang nungi temeshiba lir, pa meyok dang kechiba ola madoker?

¹⁴Kechiaser nai tzüyim ango aser ayazüba shiruru, shirnok madak yimsüsüsür mali parnok ama nisungtem kümdaktsür.

¹⁵Pai parnok ajak boroki agi atsüteter, aser pai pa zütsük nung parnok apur, aser pa zütsük nung atsütener; anungji pa pelar aser ulur.

¹⁶Anungji pai pa zütsük nem tetepsetba tenla agütsür, aser pa zütsük nem teronem menentsü tarongba tenla agütsür; kechiaser item ajanga pa shilem tulu aser pa chiyungtsü talubosa lir.

¹⁷Anungji pai kintem tepsettsü asoshi zütsükji maneni azüngteta alitsü no?