Read njo HABAKUK 2 Bible Online

HABAKUK 2 - njo bible

HABAKUK 2

¹Ni kü mit sabang manung noktaktsü, aser kü sasa mitsa nung alitsü, aser pai kü den kechi jembidir, aser ni temulung machiba nung pai kechi langzüdir, ni repranga atatsü.

²Idangji KIBUBAi kü dang langzüa ashi, Mangdangji züluang, aser shibai züngdir pai züngtettsüsa lungpak nung jangja-a yujang.

³ Kechiyong mangdangji ano teshimtet mapang ka asoshi lir, aser aji tatembang leni ilunger, aser meyazütsü; aji menua liaka, iba asoshi ata-a liang, kechiaser aji arulanglang aser aji menua malitsü.

⁴ Ajiang, pa tanela asüküm lir, pa tejangraba mindang; saka temeshipur pei tamang agi alitsü.

⁵Ano talisa, yi agi chidiyungdir ashioktsür, anungji pei kidang malir; saka asüküm nisung shibai pei tejangraba asüyim, aser tasüba ama pa lir aser tiptema alitsü makok; saka pa dangi kin ajak anitener, aser pa dangi nisung ajak nungtendaktsür.

⁶Item ajaki pa anema o entepba ka aser pa anema tarütsüba apijemtsü ajanga ya oda mashitsü no? Shibai koba pei meyong masü, iba agi tali kaa kümdir pa aiatai! Kopiga akatsü? aser aji pei sasa apudenba agi amena abener.

⁷Ne dak angeptsü parnok ajongbena noktaktsü, aser na atsüshitsütsü asoshi saktsü, aser parnok madang na terakzükba oset akümtsü masü no?

⁸Kechiaser nai kin aika raksatsü nung aser nisungtem azü tokshidaktsü nung, linük nung aser yimti aser yangji alir ajak dak teka ayiba yong, tanüngba kin ajaki na raksadaktsütsü.

⁹Shibai pei kidangi tamajung tajangzük bena arur, oda tamajung teka nungi kümzüktettsü pei tesep temalen yanglur, pa aiatai!

¹⁰Kin jenti leptokba agi nai ne kibong asoshi maksütsü tasa asa, aser ne nela anema tai mena.

¹¹Kechiyong jara nungi lungi ayimtentsü, aser süng nungi pembi-i aji langzütsü.

¹²Shibai azü tokshiba agi yim ka yanglur, aser tai agi yimti yanglur, pa aiatai!

¹³Ajiang, kintemi mi asoshi inyakbaji, aser kintem amajok asoshi belembaji, Temeranger KIBUBA nungi masü no?

¹⁴ Kechiyong tzü agi tzüyim nembanga aliba ama, KIBUBA sentsüwangshi indang temetetba agi alimaji asüngtsü.

¹⁵Shibai pei kiyonger nem parnok maksü reprangtsü asoshi, tajemtsü koba nung ne mit shioker agütsür, aser ano mesepdaktsür, pa aiatai!

¹⁶Sentsüwangshi melena na maksü agi asüngtsü, na-a jemang aser memejeptoker ka ama liang. KIBUBA teka tajichi marok ne dangi meyiptsü; aser ne sentsüwangshi madak maksü arutsü.

¹⁷Kechiyong Lebanon dak teka aiba agi na nembangtsü, aser shirurutem samatsüba agi parnok tsübudaktsütsü, nisungtem azü tokshiba, linük nung teka yitepba, aser yimti nung aser angji alir ajak dang inyakba yong aji agi na nembangtsü.

¹⁸Süngyanglu noksa, teyangluri yangluba; mesüra temuluba süngyanglu, tiyazü tesayur, aji kechi tajangzük? Kechiyong shibai kodang suwar süngyanglu yanglur, pai iba nung tamang akar.

¹⁹Shibai süng dang “Sakang” ta; aser suwar lung dang “Shishiang” ta ashir, pa aiatai! Iba yagi sayutsü asü? Ajiang, aji hon aser taribi agi meyibanga lir, saka iba nung tangula mali.

²⁰Saka KIBUBA pa temeshi tenla kidang lir; alima ajaki pa madang ola madoki liang.