Read njo HABAKUK 3 Bible Online

HABAKUK 3 - njo bible

HABAKUK 3

¹Habakuk ainkari Shigionot nung sarasademba:

²Oh KIBUBA, ni ne indang angashiogo, aser ne mapa ni tsübur. Oh KIBUBA, küm tsüngda nung ne mapa asentenshidakjang; Küm tsüngda nung aji metetdakjang; raradang taochi bilemtetang.

³Teman nungi Tsüngrem aru aser Paran tenem nungi Temeshisang aru. Selah Pa sentsüwangshi agi anüng nembang, aser alima pa nüngsang agi sünga liasü.

⁴Tesangwa ama pa sentsüpranga liasü; Pa teka nungi anütsüng adok; aser yangji pa ain miima ayu.

⁵Pa jakdang wara ao, aser pa tsüngdang mi ama temerenshi ao.

⁶Pai noktak aser alima asadang, Pai reprang aser kintem anokshidaktsü, teti tatem makaba tenemtem jenshidaktsü; teti aliba ungsemtem manga-a alu; Pai inyakba teti tatem maka.

⁷Ni Kushan sükitem timtem nung angu; Midian lima nung teyindangba sü atenten.

⁸Ayongtem anema KIBUBA mepelai liasü asü? Ne ain adokba ayongtem anema liasü asü? Mesüra tzüyim anema terasaba liasü, oda kortem manung, aser takok talungtsü manung amentsüsa?

⁹Ne lijakbong nungi lijak agitet, aser lisü nung lijakjang atemok; kintem dang ashiba atangji liasü. Selah Nai ayongtem agi alima sadangtsü.

¹⁰Tenemtemi na angur, aser tsübua liasü; tzü tashi tulu süia ao. Taroki pei ola adokdaktsü, aser pa teka temaleni ajungket.

¹¹Ne lijaktem yima aodang ne prangshiba nü sentsü nung, anü aser itai pei talidak marakzüi noktaka ali.

¹²Nai mit adokba linük ajanga jaja, nai kintem ain adokba nung ajemshi.

¹³Ne nübur tekümtet asoshi ne teshimtet pur asoshi na ao; tamajunger ki nung nai tekolak yirutsü, tepi nungi tekong tashi mangsa yutsü. Selah

¹⁴Par temerangertem tekolak nai pei nülak agi tsüngpoktsü. Ni prokshidaktsütsü parnok kü dangi Tsüngrem mopung amai aru. Parnok pelatepbaji miima sensakertem meyoktsüba indang liasü.

¹⁵Nai ne kortem agi tzüyim tzülok tulu dak ajemshi.

¹⁶Ni angashi aser kü mangi atenten; ola agi kü tebangmechi atentener; kü tereti tashitsü atu aser kü talidak nung ni atenten; oda parnok amaktsü nüburtem anema aruba timtem anogo asoshi ni atasa-a alitsü.

¹⁷Kechiyong munguzünu tepen mepungaka, Tsükmenatzü dong tejang meliaka; oliv süngdongi tejang metangja-aka, aser alui chiyungtsü madokdakja-aka, san telok nungi san lepdokja-aka, aser nashi ki nung nashi telok meliaka;

¹⁸Aji saka ni KIBUBA nung pelaseta alitsü, ni kü tekümtet Tsüngrem dak pelatsü!

¹⁹ Tsüngrem KIBUBAji kü tashi lir; aser pai kü tsüng mesü tsüng ama kümdaktsü, aser kü nem tenem manung jajadaktsür.