Read njo ZEFANIA 1 Bible Online

ZEFANIA 1 - njo bible

ZEFANIA 1

¹ Yihuda chuba, Amon chir Yosia tendak KIBUBA o Kushi chir Zefania dangi aru; Kushiji Gedalia chir, Gedaliaji Amaria chir, Amariaji Hezekia chir.

²Ali jak nungi ni ajak meshimeshia samatsütsü ta KIBUBAi ashir.

³Ni nisung aser shiruru samatsütsü, anüng ozütem aser tzüyim angotem samatsütsü, aser ni tamajunger laodaktsütsü; ali jak nungi ni nisung ajak leptokadoktsü ta KIBUBAi ashir.

⁴Yihuda madak aser Yirusalem nung alir madak ni kü teka mekangtsü; aser iba talidak nungi ni Baal tatemsa anüngba aser süngyanglu külemba putirtem tenüng;

⁵aser kilem manung anüng petinu telok dang apudakertem, aser shirnoki KIBUBA madang azüngashia apudaker aser ano Milkom agia azüngashir,

⁶aser shirnoki KIBUBA sülen anitakba nungi meyipa oadok, aser shirnoki KIBUBA mebushi mesüra pa dang masüngdang, parnok leptokadoktsü.

⁷Na KIBUBA Tsüngrem madang ajem ajema liang; kechiyong KIBUBA anogo anasa lir! Kechiyong KIBUBAi tetepsetba tenla ka renema lir, pai par aenertem meshiteta yua lir.

⁸KIBUBA tetepsetba tenla anogo nung ya oda asütsü, oda ni tongtipurtem aser chuba chirtem, aser bendanger sobutsü sobuba nisung shia merenshitsü.

⁹Shirnoki kimalen pungtener aser kibur ki teka yitepba aser külakkübong agi süngdaktsür, parnok ajak ni iba anogo nung merenshitsü.

¹⁰KIBUBAi ashir, “Iba anogo nung Ango Süngkhüm nungi ayimtenba ola ka adoksü, aser tanabuba talidak nungi jebtepba aser ungsemtem nungi teraksaba ola tulu alitsü.”

¹¹Jebtepang, nenok shishilemba dak alirtem! Kechiyong shishilembar nisung ajak samatsü; taribi abener ajak leptokadoktsü;

¹²Iba mapang nung ni milen amer Yirusalem bushitsü; shirnok sadok sadoka süngjemshia lir, oda shir mulungjang nung “KIBUBAi tajunga meinyaktsü mesüra tamajunga meinyaktsü” ta ashir.

¹³Parnok rongsen tesamaba akümtsü aser parnok kitem azüngmeyaka akümtsü; hau, parnoki ki yanglutsü saka item nungji malitsü, aser parnoki tsükmenatzü lu ayimtsü saka iba nungi yi majemtsü.

¹⁴KIBUBA anogo tulu anasa lir, oda KIBUBA anogo ola taku aser aji anasa lir aser kanga karaa arur; yangji temeranger nisungi kanga ayimtener.

¹⁵Iba anogoji terasaba anogo ka alitsü, timtemtsü aser tejashitsü anogo teraksaba aser tesamatsüba anogo, mepet aser tammang anogo,

¹⁶mitsa yangluba yimtitem aser mit sabang talang anema jangzü apuba aser tongbang washiba anogo ka alitsü.

¹⁷Nisungtem madak, nükpokertem mesüka jajatsü ni tejashitsü bena arutsütsü, kechiaser parnoki KIBUBA anema temenen mena; aser parnok zü auyi ama shidoktsü aser parnok shi scü ama alitsü.

¹⁸KIBUBA terasaba anogo nung par taribi mesüra hon agi parnok kümzüktsü makoktsü, saka linük ajonga pa tenükmiba mi agi meyokadoktsü, kechiyong linük nung alir parnok ajak pai tatembang, hau, tetsübutsü tatembang ka kümdaktsütsü.