Read njo ZEFANIA 2 Bible Online

ZEFANIA 2 - njo bible

ZEFANIA 2

¹Nenok sasa külemi sentepang, hau, külemi sentepang, Oh taaktsü maketba kin;

²Mopungi tsüksü oner aoba ama na maridokdang, KIBUBA tetsübutsü mit adokba na anema madokdang, KIBUBAi tetsübutsü mit adokba anogo ne madaki marudang.

³KIBUBA bushiang, nenok alima nung ajemalur ajak, shirnoki pai melabatem inyaker; temeshiba bushiang, ajemaluba bushiang, ashiko KIBUBA ain adokba anogo nung nenok miimbangtsü.

⁴ Kechiyong Gaza senzüka toktsütsü, aser Ashkelon tesama akümtsü, anüngdang parnoki Ashdod aridoktsü, aser Ekron tera den atsütetadoktsü.

⁵Tzüküm anasa aliba nisungtem Keret nunger kin aiatai! KIBUBA o nenok anema lir, Oh Kanan, Filistia nunger lima, yangji nisung malitsüsa, ni na samatsütsü.

⁶Aser tzükümji chiyimdak, sannükertem asoshi lungpok aser san telok asoshi talidak alitsü.

⁷Tzükümji tanüngzükba Yihuda kidong asoshi alitsü; yangji parnok shiruru chiyimdaktsütsü; Ashkelon nunger kidang parnok nikongtsütsü ontaka alitsü, kechiyong KIBUBA par Tsüngremi semdangtsü, aser tanaben parnok tia yanglushitsütsü.

⁸ Moabi arütsüba, Ammon chirtemi atalaba, koba agi parnoki kü nübur arütsü, aser parnok litsü nung alir anema pei sasa ulu, ni angashiogo.

⁹ Anungji Israel Tsüngrem, Temeranger KIBUBAi azüngashia ashir, Atangji Sodom ama Moab aser Gomora ama Ammon chirtem akümtsü, temongtsü aser metsü ongken alidak, aser teti asoshi azüngmeyakdak; tanüngzükba kü nüburtemi parnok dak rakzükraktemtsü, aser anünga aliba kü kintemi parnok agitsü.

¹⁰Parnok asüakümba asoshi parnok tia ibai alitsü, kechiaser Temeranger KIBUBA nüburtem anema parnoki mezüngmeshi aser parnok sasa ulu.

¹¹Parnok anema KIBUBAji tetsübutsüka asütsü, kechiyong alima tsüngrem ajak pai yasatzüra agi samatsütsü, aser nisungtemi, aser nisung shia pei talidak oda tzüküm nung aliba kin ajaki pa dang apudaktsü.

¹² Nenok Ethiopia nungera kü nok agi tepsettsü.

¹³ Aser anüdoklentip anema pa teka mekangtsü aser Asiria samatsütsü; aser pai Ninevi azüngmeyakdak, lisem lima ama takong tejendok ka kümdaktsütsü.

¹⁴Aser nashi telok la matsüngdang aser moapu shiruru ajak ondaka alitsü, hogon aser jepjui la tongshitem nung amungtsü; pokpoi kechiba nung asatsü, kikümdang waroi asatsü; kechiyong la cedar süng bembitemji mapaji temdaka yutsütsü.

¹⁵Pei sasa dang kümzüka aliba yimtiji ya lir, Ni alir aser ni alema shinga mali, ta La sasa ashi. Tang la koda raksa-a lir, la koda azüngmeyakdak arem shiruru amungdak küma lir, la anasa süir shiai la sensatsür aser pei tekabu ajetreper metongloktsür.