Read njo ZEFANIA 3 Bible Online

ZEFANIA 3 - njo bible

ZEFANIA 3

¹Anema noktakba aser menena akümba, rishikangshiba yimti, la asoshi aiatai!

²Lai olaji manga, metongshitsüba lai magizük, lai KIBUBA dak mamang, lai la Tsüngrem anasai maru.

³La tongtipurtem, la madang arr-a aliba molusongzütem lir; lar o bendangertem aonung tzünütem lir; parnoki anepdang asoshi kecha anünga metoktsür.

⁴La ainkartem samesa aser tamang makaba nisungtem; lar putirtemi temeshidak menentsü; ozüng makaba nisungtem; ozüng dak parnoki teka air.

⁵La dak aliba KIBUBAji temeshi lir, pai tai meinyaker, anepdang shia pai pei o bendangba bener arur, anogo shia pai tamakok maludaktsür; saka ochi mashiribo maksü memeteter.

⁶Ni kintem leptokogo, parnok mitsatem teraksa lir, shinga mejajatsüsa ni parnok yimdong raksaja lir; parnok yimtitem nung alitsü nisung shinga malitsüsa raksa-a lir.

⁷Ni ashi, “Atangji pai ni tsübutsü, pai ni metongshitsüba agizüktsü, anungji la talidak meraksatsü; saka ni la merenshi, saka parnoki yakta arameso aser parnoki inyakba ajak menentsü.”

⁸Anungji temerenshitsü ni apusoba anogo matong tashi nenoki ni asoshi ata-a liang ta KIBUBAi ashir, kechiyong kü temulungtetbaji kintem anitentsü, ni yimlitem sentepdaktsütsü oda kü tetsübutsü ain adokba ajak parnok madak meküploktsütsü asoshi lir; kechiyong alima ajak kü tenükmiba mi agi meyoktsü.

⁹Kechiyong idangjiang, kenbangobang ka agi pa tenzüktsü, oda parnok ajaki KIBUBA tenüng nung ajatsüsa ni nüburtem o temerüktet kümdaktsütsü.

¹⁰Ethiopia ayongtem atena or alima talang nung prokshia aliba kü jalatemi kü dangi tenla bener arutsü.

¹¹Iba anogo nung kechi nungsa nai ni anema ozüng raksa, nai inyakba ajak asoshi na akseta malitsü; kechiyong idangji ni nenok rongnung asüküma ulurtem bener odaktsütsü, aser joko na kü temeshi tenem nung asüküma malitsü.

¹²Kechiyong ni nenok rongnung timtem tekangshiba aser sensaker nübur yutsütsü aser parnoki KIBUBA tenüng nung amangtsü.

¹³Anünga aliba Israel puri tai memenatsü, mesüra tiyazü mejembitsü, mesüra parnok bang nung ashioktsüba temeli mangutsü; kechiyong parnoki chiyungtsü aser mepitaka alitsü, aser shingaia parnok metsübudaktsütsü.

¹⁴Oh Zion jala ken tenang, Oh Israel, ayimtenang; ne temulung ajak agi pela-ang aser pelaseta liang. Oh Yirusalem jala.

¹⁵KIBUBAi ne o bendangba bener ogo, pai ne tsükchir aridoktsüogo; Israel chuba oda KIBUBA, ne den lir; joko nai tamajung metsübutsü.

¹⁶Iba anogo nungji Yirusalem dang ashitsü, “Tetsübu, Oh, Zion, ne teka anüanüa telidaktsüma.

¹⁷KIBUBA ne Tsüngrem tashi tulusangi ne nem takok agütsütsü ne den lir, tepela agi pai ne madak pelaseta alitsü, pai pa temeim nung anisüngzüka alitsü, ne madak pai ken tena pelatsü.

¹⁸Benjong anogo nung pelatepba ama, ni nenok tejashi agientsü anungji nenoki joko iba khuret mabentsü.

¹⁹Ajiang iba mapang nung nenok rishikangshir ajak dang ni inyaktsü, ni tsüngtsüker kümzüktsü, aser aridoka alirtem anitentsü, aser alima ajak nung maksüa alibatem ni parnok tushia kümdaktsütsü aser tenüng sangdaktsütsü.

²⁰Iba mapang nungji ni nenok bener arutsü, aser iba mapang nungji ni nenok anitentsü; kechiyong kodang nenok tepuokdak nenok nükdang ni tanaben bener arudir, ni nenok nüngtugu kümdaktsütsü aser alima nübur ajak rongnung tenüng sangdaktsütsü” ta KIBUBAi ashir.