Read njo HAGAI 1 Bible Online

HAGAI 1 - njo bible

HAGAI 1

¹ Darius chuba küm tanabuba ita trokbuba anogo mezüngnü nung, Yihuda nung governor, Shealtiel chir Zerubbabel dangi, aser putir Yihozadak chir Yihusua dangi ainkar Hagai ajanga KIBUBA o aru.

²Yamai Temeranger KIBUBAi ashir, “Iba nüburtemi ashir, KIBUBA ki yanglushitsü asenok asoshi ano mapang matong.”

³Idangji KIBUBA O ainkar Hagai ajanga ya oda aru,

⁴“Iba ki teraksa yutsür nenok taktang taktang yokba ki nung alitsü nenok asoshi iba mapang no?”

⁵Anungji tang Temeranger KIBUBAi yamai ashir, “Nenok lenmangtem bilemdangang.

⁶Nenoki jenti prok saka tera dang bena aru, nenoki chiyunger, saka nenok tepok masünger; nenoki ajemer saka tzüra matemer, nenoki süoshi abener saka shinga talembo mali, aser shibai sen aar juli tapok nung enoktsü aa arur.”

⁷Yamai Temeranger KIBUBAi ashir, “Nenok lenmangtem bilemdangang.

⁸Tenemi tuang aser süng bener alung, aser kiji yangluang; aser ni iba nung pelatsü aser ni sentsüwangshitsü” ta KIBUBAi ashir.

⁹“Nenoki jenti imla saka ajiang, aji tera dang liasü; aser aji nenoki kidangi bener aru, aser aji ni apudokadok. Kechiba? ta Temeranger KIBUBAi ashir. Kechiaser nenok nisung shia pei ki asoshi mazüngi inyakdang kü kibo teraksa nung lir.

¹⁰Anungji nenok madak anüngi pei azüngtsü sota lir aser alimai pei tejang sota lir.

¹¹Aser linük madak tenemtem madak, tsük madak, yi madak, totzü madak, aser ali nungi adokba madak, kiset shiruru madak, aser teka agi inyakba ajak madak tsüngsarusa asoshi ni aja.”

¹²Idangji Shealtiel chir Zerubbabel, temaba putir Yihozadak chir Yihusua aser tanüngba nübur ajaki, parnok Tsüngrem KIBUBA ola aser ainkar Hagai otem, KIBUBA parnok Tsüngremi pa yokba ama anga, aser nüburtemi KIBUBA dang tsübu.

¹³Idangji KIBUBA tenyar Hagaii KIBUBA osang nüburtem dang ya oda ashi, “Ni nenok den lir ta KIBUBAi ashir.”

¹⁴Aser Yihuda nung governor Shealtiel chir Zerubbabel tanela aser temaba putir Yihozadak chir Yihusua tanela KIBUBAi ajongmeso, aser parnok aru aser parnok Tsüngrem, Temeranger KIBUBA kidang,

¹⁵Darius chuba küm tanabuba ita trokbuba, anogo metsür pezünübuba nung mapaji inyak.