Read njo HAGAI 2 Bible Online

HAGAI 2 - njo bible

HAGAI 2

¹Ita tenetbuba anogo metsürka buba nung ainkar Hagai ajanga KIBUBA O ya oda aru,

²Yihuda nung governor Shealtiel chir Zerubbabel aser temaba putir Yihozadak chir Yihusua dang, aser tanüngba nübur dang tang ya oda shiang.

³ “Nenok rongnung iba ki mezüng sentsüwangshi nung angur shiba yangi anünga lir? Aser tang nenoki koda ajiteter? Ya nenok nükdang kecha masü südi?

⁴Aji saka tashi ita liang, Oh Zerubbabel, ta KIBUBAi ashir, aser tashi ita liang, Oh Yihusua, temaba putir Yihozadak chir; aser tashi ita liang, linük nung nenok nübur ajak, ta KIBUBAi ashir, aser inyakang; kechiyong ni nenok den lir” ta Temeranger KIBUBAi ashir.

⁵ “Nenok Ijip nungi adok dang ni nenok den züngzüktepba o bilemtetang, aser kü tanela nenok den lir. Nenok tetsübu.”

⁶ Kechiyong Temeranger KIBUBAi yamai ashir, “Ano tatsüka lir aser ni anüng, aser alima, aser tzüyim, aser ali takong anokshitsü.

⁷Aser ni kin ajak anokshitsü, aser kin ajak meyong rongsen bener arutsü, aser ni iba ki sentsüwangshi agi süngdaktsütsü” ta Temeranger KIBUBAi ashir.

⁸“Taribi kü meyong aser hon kü meyong,” ta Temeranger KIBUBAi ashir.

⁹“Mezüng dang nungi tesübuba sentsüwangshi tuluba alitsü” ta Temeranger KIBUBAi ashir, aser “Iba tali dak nung ni tesünep agütsütsü” ta Temeranger KIBUBAi ashir.

¹⁰Darius küm tanabuba ita tukububa anogo metsür pezübuba nung ainkar Hagai ajanga KIBUBA O ya oda aru,

¹¹Yamai Temeranger KIBUBAi ashir, “Putirtem dang ozüng indang tang ya oda asüngdangang.

¹²Kari pei teperemsü nung temeshi shi benra, aser pa teperem sü jagi amtsük dak, mesüra shitzü, mesüra yi, mesüra totzü mesüra shi kar dak kongshira aji temeshi akümtsü asü?” Putiri langzüa ashi, “Masü.”

¹³Idangji Hagai-i ashi, “Tasümang dak kongshia memerük akümba nisungi item dak kongshira, aji memerük alitsü asü?” Aser putirtemi langzüa ashi, “Aji memerük alitsü”

¹⁴Idangji Hagaii ashi, “Yamaji iba nübur lir, aser iba kin kü madang lir” ta KIBUBAi ashir, aser yamaji parnok teka mapa ajak lir; aser parnoki koba tenlar angji memerük lir.

¹⁵“Saka tang ni nenok dang mepishir, tanü nungi aser tang nungibo shisadangang. KIBUBA tenla ki nung, lung ka manung ka ataloka maliba mapang nungi tang tashi nung, nenoki kodasa inyak?

¹⁶Kodang kati tatakzük metsü ayudaki ao, yangji ter dang liasü; kodang kati yi ayudaki tatakzük tenem agitettsü aru, yangji metsü dang liasü.

¹⁷Ne teka mapa nung rürlung aser tarütsü aser tashitak mesen agi ni ne dak azük, aji saka nai kü dangi memeyip ta KIBUBAi ashir.

¹⁸Shisadangang ni nenok dang mepishir, iba anogo nungi aser tejaklen ita tukububa anogo metsür pezünü nungi, KIBUBA tenla ki yangerba anogo nungi shisadangang.

¹⁹Ano jendang metsü ali asü? Tsükmenatzü, munguzünu, jarem dong aser oliv dongtemi tang tashi kecha metangtsür no? Tanü anogo nungibo ni nenok moatsütsü.”

²⁰Ano KIBUBA o tanaben Hagai dangi anogo metsür pezünü nung ya oda aru,

²¹Yihuda governor Zerubbabel dang ya oda jembiang, “Ni anüngtem aser alima anokshitsü;

²²aser ni chuba yimlitem, chuba menden meküpdoktsütsü, aser ni kintem chuba yimli tashi raksatsütsü; aser talungtsütem aser yangji amenertem meküptoktsütsü, aser kortem aser parnok dak amenertem nisung shia pei adianu nok agi laodaktsütsü.

²³Iba anogo nung Oh Zerubbabel, kü tenzüker, Shealtiel chir, ni na agitsü, ta KIBUBAi ashir, aser ni na shitakba tajenba angoti ama kümdaktsütsü; kechiyong ni na shimtet” ta Temeranger KIBUBAi ashir.