Read njo ZEKARIA 10 Bible Online

ZEKARIA 10 - njo bible

ZEKARIA 10

¹Metsü tsüngkhüm mapang nung, KIBUBA shibai tsüngpret yanglur, pa nungi tzünglu asüngdangang; aser pai parnok nem tzünglupu, aser nisung shia nem moapu nung tsünütsü agütsütsü.

²Kechiyong süngyanglutemi amajok jembi aser temezüngertemi tiyazü mangdang angu, aser parnoki tiyazü pungmang shiogo; amajok nung parnoki süneptsür; anungji parnok santem ama nemzür, parnok rishikangshia alir, kechiaser sannükertem mali.

³Sannükertem anema kü ain aitdakja lir, aser tanishirtemji merenshitsü; kechiyong Temeranger KIBUBAi pei san telok Yihuda kidong semdangogo, aser pa tongbang kor tajung ama parnok kümdaktsütsü.

⁴Pa nungi kinük lung, pa nungi tangentsü kojal, pa nungi tongbang lijak, aser pa nungi yimsüsür ajak arutsü.

⁵Aser tongbang nung, yimdong lishi nung temerangertemi pei tsükchirtem ajemoka yokba ama asütsü, aser parnoki raratsü; kechiaser KIBUBA parnok den lir, aser kor nung asangertem mak asütsü.

⁶Ni Yihuda kidong tashi itshidaktsütsü, aser ni Yosef kidong kümzüktsü, ni parnok tanaben bener arutsü, kechiyong ni parnok madak taochi lir; aser ni parnok sentoka metoktsüba pur ama alitsü; kechiyong ni KIBUBA parnok Tsüngrem lir, aser ni parnok dang langzütsü.

⁷Aser Efraim temeranger ka ama alitsü; aser parnok mulungjang yi agi pelaba ama alitsü, hau, parnok chirtemi angutsü aser pelaseta alitsü; KIBUBA nung parnok mulungjang pelatsü.

⁸Ni parnok ajatsü, aser parnok anitentsü, kechiyong ni parnok alangzükogo; aser parnok akhi mapang ama parnok tali züintsü.

⁹Kintem rongnung ni parnok prokshijaka aji saka alinük talang nunga parnoki ni bilemtettsü; aser parnok chirtem den parnok alitsü aser meyipa arutsü.

¹⁰Ni ano tanaben Ijip linük nungi parnok anir arutsü, aser Asiria nungi parnok anitentsü, aser ni parnok Gilead aser Lebanon linüki anir arutsü; aser parnok asoshi talidak makai maküm tashi.

¹¹Aser parnoki Ijip tzüyim ajanga süitsü, aser tzüyim nung tzüsem dak parnoki azüktsü, aser Nile ayong tarok ajak kongadoktsü, aser Asiria nunger mezümekümba ajemaludaktsütsü, aser Ijip nungi chuba ajok piladaktsütsü.

¹²Aser ni parnok KIBUBA nung tashi itdaktsütsü; aser parnok pa tenüng nung jajatsü ta KIBUBAi ashir.