Read njo ZEKARIA 11 Bible Online

ZEKARIA 11 - njo bible

ZEKARIA 11

¹Oh Lebanon, ne cedar süngdongtem, mi agi meyoktsüsa ne kishitem lapokang.

²Jebtepang, Oh fir süngdong, kechiyong cedar süngdong laoa lir; kechiaser sentsüwangshia alirtem raksa-a lir; jebtepang, Oh nenok Bashan sülemdong, kechiyong arem min lenrepa lir.

³Angang, sannükertem asatepba ola ka! Kechiyong parnok sentsüwangshi raksa-a lir, angang, molusongzü pungtu arüba ola ka! Kechiyong Yordan khonang raksa-a lir.

⁴Yamai KIBUBA kü Tsüngremi ashir, “Tetepsettsü san telok mesüang;

⁵talirtemi parnok tepseter, aser parnok sasa tai maka ta alir, aser parnok alirtemi ashir, KIBUBA temoatsü sang, kechiyong ni takar lir; aser parnok pei sannükertemi parnok maochir.

⁶Kechiyong linük nung alir dang ni joko maochitsü, ta KIBUBAi ashir, saka angang, nisungtem shia ni par kiyonger ket nung aser par chuba ket nung bendanga agütsütsü; aser parnoki linükji agitsü, aser parnok tashi nungi ni parnok mekümzüktsü.”

⁷Anungji tetepsetba san telok, atangji alashiba san telok, ni mesü. Aser ni mechi ana ama, ka dang ni Taochi ta aja, aser ka dang Telungjem ta aja, aser ni san telokji mesü.

⁸Aser ita ka nung ni sannüker asem tepsetadok; kechiyong kü nelai parnok den taremzük makai aküm, aser parnokia ni maginü.

⁹Idangji ni ashi, “Ni nenok memesütsü, kechi tasütsü lir asütsü akok, kechi tesamatsü lir samatsü akok, aser anünga alirtem shiai pei kiyonger shi achitsü.”

¹⁰Aser ni kü mechi taochi koba agi nübur ajak den kü tezüngzüktepba yangluba ni raksatsü asoshi, aji ni ana küma lepdang.

¹¹Aser iba anogo nung aji raksa aser yamaji ala-ashia aliba san telok kü dang anga-a alirtemi ibaji KIBUBA O ta meteta liasü.

¹² Aser ni parnok dang ashi, “Nenoki junger ta bilemra kü taa kü nem kua aser aji oda mesüra aji oda tokjang.” Anungji parnoki kü taa asoshi taribi shekel semer ozüktsü.

¹³“Aser parnoki kü jenjang tulu agütsübaji, terizüngdak enokjang,” ta KIBUBAi kü dang ashi. Anungji ni taribi shekel semerji KIBUBA kidang terizüngdak enoktsü.

¹⁴Idangji Yihuda aser Israel tsüngda nung sosemtepba raksatsütsü asoshi kü tanabuba ajok, Telungjem ni ana küma lemdangtsü.

¹⁵Idangji KIBUBAi kü dang ashi, “Ano nai tamashi sannükertem meyong oset ne sasa agiang.

¹⁶Kechiyong angang, ni sannüker ka linük nung adokdaktsütsü, kechiyong koba sama-a lir pai mebushitsü, koba prokshia lir pai repranga maotsü, mesüra raksa-a alibaji maneptsütsü; mesüra kobasa junga lir pai memesütsü, saka pai teyira shi achitsü, aser parnok temupu anüka raksatsütsü.

¹⁷San telok toktsüba metemsüba sannüker aiatai! Pa tepen aser pa tajichi tenük nok agi yirutsütsü; pa tepen meshimeshia kongrepadoktsü, aser pa tajichi tenük ajonga pokadoktsü.”