Read njo ZEKARIA 14 Bible Online

ZEKARIA 14 - njo bible

ZEKARIA 14

¹Ajiang, nenok rongnung temakzükba osettem lemdangtsü KIBUBA anogo ka arudagi.

²Kechiyong tongbang raratsü ni kin ajak Yirusalem anema anitentsü, aser yimtiji agitsü, aser parnok kitem rakzükraktemtsü, aser tetsürtem raksatsütsü aser yimti tesadang ka tepuokdaki aotsü, aser anünga aliba nisungtemjibo yimti nungi meleptoktsü.

³Idangji KIBUBAi tongbang anogo nung raradang amato pa tejakleni aotsü aser item kin anema raratsü.

⁴Aser iba anogo nung anüdoklen Yirusalem jakdang aliba oliv tenem manung pa tetsüng noktaktsü, aser oliv tenemji anüdoklen nungi anüolen tashi lenten kanga tulu ka agi ana küma sadangtsü, aser tenem tesadang ka anüdoklentip aser tesadang ka anüolentip tsütsü aenshitsü.

⁵Aser nenoki Hinnom lenten leni ajentsü, kechiyong Hinnom lenteni Azel atongtsü; hau, Yihuda chuba Uzzia anogo nung menoknok madang nenok ajenba ama nenok ajentsü aser KIBUBA kü Tsüngrem aser temeshipur ajak pa den arutsü.

⁶Iba anogo nungji tesangwa, temokong mesüra rüjep malitsü.

⁷Aser anogo balaka alitsü, koba KIBUBAi dang metet, anüngdanga masü, aser aonunga masü, saka aonung mapang nung tesangwa alitsü.

⁸ Aser iba anogo nung taküm tzütem Yirusalem nungi yima adoktsü, parnok tesadang anüdoklen tzüyim tsütsü, aser parnok tesadang anüolen tzüyim tsütsü, aser aji mei aser tsüngkhüm nung maneni alitsü.

⁹Aser alima ajak madak KIBUBA chuba asütsü, iba anogo nung KIBUBA ka, aser pa tenüng ka asütsü.

¹⁰Geba nungi Yirusalem anüolentip, Rimmon tashi, linük ajak Araba ama akümtsü, aser pa ajungkettsü, aser pei alidak Benjamin süngkhüm nungi mezüngbuba süngkhüm alidak tashi, linük süngkhüm tonga aser Hananel lungki nungi chubar tsükmenatzü menüngdak tashi pa alitsü.

¹¹ Aser iba nung nisung alitsü, aser joko atakatemba malitsü; saka Yirusalem kümzüka alitsü.

¹²KIBUBAi kechi temerenshi agi Yirusalem anema raraba kintem dak azüktsü, aji iba wara agi alitsü; parnoki pei tetsüng agi noktaka lia parnok shi shizüka odaktsütsü, aser parnok temeli parnok tebang nung shizüka odaktsütsü.

¹³Aser iba anogo nung KIBUBA nungi rongrongshishi tulu parnok rongnung alitsü, aser parnok nisung shiai pei kiyonger teka nung amettsü aser pa teka pei kiyonger teka anema mekangtsü.

¹⁴Aser Yihudai Yirusalem anema raratsü, aser temeket kin ajak rongsen, hon, taribi aser süoshi jenti külemi bendentsü.

¹⁵Yamaji iba temerenshi mesüka kor, gado, ut, aser tanendak shiruru kechisa lidir ajak madak temerenshiji alitsü.

¹⁶ Kin ajak anüngja aliba nisung shia shiri Yirusalem anema aru, küm shia Temeranger KIBUBA Chuba külemtsü aser tekülemdak semtu benjong amungtsü atutsü.

¹⁷Yamai alitsü, alima nung kin kidong ajak shirnoki Temeranger KIBUBA Chuba külemtsü Yirusalemi matur, parnok madak tzünglu malitsü.

¹⁸Aser Ijip kinungeri tua parnok sasa medenra, parnok madak tznglu malits. KIBUBAi tekülemdak semtu benjong amungtsü marurtem merenshiba jagi merenshitsü.

¹⁹Ibai Ijip temerenshi aser tekülemdak semtu benjong akatsü matuba kin ajak temerenshi alitsü.

²⁰Iba anogo nungji kortem sangshi nung “KIBUBA dang temeshi” ta zülua alitsü, aser KIBUBA kidang chipotemji tenladak madang temeshi susatem amaji alitsü.

²¹Yirusalem nung aser Yihuda nung chipo shia Temeranger Telok KIBUBA madang temeshi alitsü, aser shirnokisa tepseta tenlatsü arudir item nungi agitsü; aser iba anogo nung Temeranger KIBUBA kidang shishilempar malitsü.