Read njo ZEKARIA 3 Bible Online

ZEKARIA 3 - njo bible

ZEKARIA 3

¹ Idangji KIBUBA tenyar madang temaba putir Yihusua noktaka pai kü dang sayu, aser tajichilen pa anemer asütsü Satan noktaka liasü.

² KIBUBAi Satan dang ashi, “Oh Satan, KIBUBAi na arüjang, KIBUBA shibai Yirusalem shimtet pai na arüjang! Ibai mi nungi sütetba milungsang ka masü no?”

³Tang Yihusua pa kotak tenyar madang noktaka alidang, arü aketba süoshi abena liasü.

⁴Aser tenyar jagi pa madang noktaka alirtem dangji ashi, “Arü aketba süoshiji pa nungi agizükang.” Aser pa dang ashi, “Ajiang, tai menaba na nungi ni bener ogo, aser ni na asoshi süoshi tajung abendaktsütsü.”

⁵Aser ni ashi, “pa tekolak nung kolakjen temerük ka semokjang.” Anungji parnoki pa tekolak nung kolakjen temerük ka semoktsü, aser süoshi abendaktsü, aser KIBUBA tenyarji anasa noktak.

⁶KIBUBA tenyari Yihusua dang ashi,

⁷Yamai Temeranger KIBUBAi ashir, “Nai kü lenmang nung jajadi süra, aser nai ni melaba benshidi süra, idangji nai kü kidang o bendangtsü, aser ano kü o bendangdak ayutsü, aser anasa noktaka alir rongnung senzütsü temelaba ni ne nem agütsütsü.

⁸ Tang angang, Oh temaba putir Yihusua, na aser ne madang amener medemertem; kechiyong parnok temaitsü aliba nisungtem lir, kechiyong ajiang, ni kü tenzüker Kongsang adokdaktsütsü.

⁹Kechiyong ajiang, Yihusua madang ni yutsüba tejak tenet aketba lung ka manung, tezülubaji angentsü ta Temeranger KIBUBAi ashir, aser ni iba lima tai kenüyongi agientsü.”

¹⁰ Iba anogo nung Temeranger KIBUBAi ashir, “Nenok nisung shiai pei kiyonger tsükmenatzü aser munguzünu dong küboki ajatsü.”