Read njo ZEKARIA 4 Bible Online

ZEKARIA 4 - njo bible

ZEKARIA 4

¹Kü den jembiba kotak tenyar kü dangi tanaben aru, aser nisung ka amua aoba nungi sakdaktsüba amato, ni sakdaktsü.

²Pai kü dang ashi, “Nai kechi angur?” Aser ni ashi, “Ni milendong ka ajak hon agi yangluba, iba kolak nung susa ka, aser iba nung aliba milen tenet ni angur, aser ajiang, milen shia dakji luli tenetnet iba kolak manung itemji lir.

³ Aser iba anasaji oliv süngdong ana, ka susa tajichilen, aser ka iba tabelen lir.”

⁴Aser kü den jembiba kotak tenyar dang ni ashi, “Itemi kechi kü kibur?”

⁵Idangji kü den jembiba kotak tenyari kü dang langzü, “Itemi kechi nai memetet no?” Aser ni ashi, “Memetet, kü kibur.”

⁶ Idangji Pai kü dang ashi “Ibai Zerubbabel dangi KIBUBA O lir. Tashi agi masü, mesüra ain agi masü, saka kü tanela agi” ta Temeranger KIBUBAi ashir.

⁷“Na shiba Oh tenem tulu? Zerubbabel madang na lenten ka akümtsü aser, iba dang aochiang, aochiang, ta ayimtenba agi tema lungji pai bener adoktsü.”

⁸Ano KIBUBA O ya oda shia kü dangi aru,

⁹“Zerubbabel teka agi iba ki kimung yanglutsü, ano pa teka agi ibai renemtsü; aser Temeranger KIBUBAi ni ne dangi yok ta nai metettsü.

¹⁰ Kechiyong shibai mapa tilatem indang anogo mezüngmeshidir parnok pelateptsü, aser Zerubbabel ket nung tindang asaba oset angutsü; oda item tenetji KIBUBA tenüktem lir; alima ajak ajanga parnoki oli aruli ta senzür.”

¹¹ Idangji ni langzüa pa dang ashi, “Milendong tajichilen aser tabelen tsütsü oliv süngdongtemji kechi?”

¹²Ano tanaben ni asüngdang, “Oliv kongsang ana koba hon luli ana agi hon totzü parnok sasa züoker itemi kechi asütsü?”

¹³Pai kü dang langzüa ashi, “Itemi kechi asütsü nai memetet no?” Aser ni ashi, “Memetet, kü kibur.”

¹⁴Idangji pai ashi, “Item ya alima ajak KIBUBA tenzüktsü asoshi mezüja meshitetbaji lir.”