Read njo ZEKARIA 5 Bible Online

ZEKARIA 5 - njo bible

ZEKARIA 5

¹Ano ni kü tenük rangeta yok nung yimzüa aliba kaketlong ka angu.

²Aser pai kü dang ashi, “Nai kechi angur?” Aser ni langzü, “Ni yimzüa aliba kaketlong ka angur; iba metongji süklep metsü, aser lentenji süklep ter.”

³Idangji pai kü dang ashi, “Ibai linük ajak madang aoba atakatem lir, kechiyong tip külen zülua aliba ama shibai auyar pa iba nungi leptoktsü aser ano tip külen zülua aliba amaji shibai azüngashi pa iba nungi leptokadoktsü.

⁴Ni ibai yoktsü ta Temeranger KIBUBAi ashir, aser iba jagi auür aser kü tenüng agi tiyazü azüngashir ki shiai aitsü. Aser ibaji par kidang alitsü, aser süng aser lung dena samatsütsü.”

⁵Idangji kü den jembiba kotak tenyari tejaklen arua kü dang ashi, “Tang ne tenük rangketa yokang, aser tejaklen aobaji kechiar ajiang.”

⁶Aser ni ashi, “Aji kechi?” Aser pai ashi, “Ibai tejakleni aoba seret molok lir.” Pai ano ashi, “Linük ajak nungi tai menabaji ibai lir.”

⁷Aser ajiang, yangji tenembangba shesa yin telonglong ka ajungket aser yangji molok nungji tetsür ka mena liasü.

⁸Aser pai ashi, “Ibai tamajung mapa lir, aser pai la molok nungji nungoktsü, aser shisa yin iba bang nung enoktsü.

⁹Idangji ni kü tenük rangketa yok aser ajiang, yangji tetsür ana tejakleni aru, aser parnok tashikang nung mopung liasü; tang parnok tashikangtem tzü ozü tashikang mesüka liasü, aser alima aser anüng tsüngda nung parnoki seret aoba molokji ajungket.”

¹⁰Idangji kü den jembiba kotak tenyar dang ni ashi, “Seret aoba molok parnoki koleni bener aor?”

¹¹Pai kü dang ashi, “Shinar lima nung iba asoshi ki ka yanglutsütsü atema aser kodang aji yangludir, idakji aji yutsütsü.”