Read njo ZEKARIA 6 Bible Online

ZEKARIA 6 - njo bible

ZEKARIA 6

¹Tanaben ni kü tenük rangketa yok aser reprang, yangji tenem ana tsüngda nungi talungtsü pezü adok, aser tenemtemji yongmenyin tenemtem liasü.

² Mezüngbuba talungtsü nung kor temeremtem, tanabuba talungtsü nung kor tanaktem liasü.

³ Aser tasembuba talungtsü nung kor temesüng, aser pezübuba talungtsü nung kor tsükrapusatem liasü.

⁴Idangji kü den jembiba kotak tenyar dang ni ashi, “Itemi kechisa, kü kibur?”

⁵ Aser kotak tenyari kü dang langzü, “Itemi anüng mopung pezü lir, aser alima ajak KIBUBA madang parnok sasa sayur külen odagi.

⁶Talungtsü koba nung kor tanak lir anüdoklentip lima tsütsü aor, kor temesüngtemi parnok sülen anidaker, aser tsükrapusa anüolentip lima tsütsüi aor.”

⁷Kodang tashi tait kortemji temai adok, parnoki alima sema oli-aruli ta jajatsü bushi, aser pai ashi, “Nenok oang, alima sema oli aruli ta jajaang.” Anungji parnoki alima sema oli aruli ta jaja.

⁸Idangji pai kü madak ayimtena ashi, “Ajiang, anüdoklentip limai aobatem anüdoklentip lima nung kü nela anisüngzük agütsütsü.”

⁹KIBUBA O kü dangi ya oda shia aru.

¹⁰“Tepuokertem nungi Babilon nungi arua alir Heldai, Tobia, aser Yedaia nungi tenla agiang, aser iba anogo nungsa na arung, aser Zefania chir Yosia kidangi iang;

¹¹aser taribi aser hon agiang aser chuba korang ka yangluang aser aji temaba putir Yihozadak chir Yihusua kolak nung semokjang;

¹² aser pa dang shiang, Yamai Temeranger KIBUBAi ashir, Ajiang nisung ka tenüng agi Kongsang, aser pai pei talidak nungi meitsü, aser pai KIBUBA tenla ki yanglutsü

¹³Aser pai sentsüwangshi abentsü aser pa chuba menden nung amentsü aser yimsü asütsü, aser parnok anaprongla tsüngda nung tesünep tajung alitsü.

¹⁴Aser KIBUBA kidang tebilemtettsü asoshi chuba korangtemji Heldai, Tobia, Yedaia, aser Zefania chir Yosia asoshi alitsü.”

¹⁵“Ano nenoki ni Temeranger KIBUBAi ni nenok dangi yok ta metettsü asoshi shirnok talang nung ali parnok arutsü aser KIBUBA tenla ki yanglushitsü. Aser nenoki KIBUBA nenok Tsüngrem ola tenoktenoka angara ibai ataloka arutsü.”