Read njo ZEKARIA 7 Bible Online

ZEKARIA 7 - njo bible

ZEKARIA 7

¹Darius chuba küm pezübuba, ita tukububa anogo pezünübuba nung aji Kislev ita nung, KIBUBA o Zekaria dangi aru.

²“Tang parnok Bethel nung aliri Sharezer, aser Regemmelek aser parnok nisungtem KIBUBA dangi yimli mepishitsü yok,

³aser Temeranger KIBUBA meyong kidong putirtem dang aser ainkartem dang ya oda jembitsü.” Tang ni küm aika inyakba ama ni ita pungububa nung ajebtsü aser lumitsü no?

⁴Idangji Temeranger KIBUBA o kü dangi ya oda aru,

⁵“Linük nung nübur ajak dang aser putir ajak dang ya oda jembiang. Taoba küm neter tashi nung ita pungububa aser tenetbuba nung kodang nenoki lumi aser mang ayim, aji ni asoshi nenoki akang akanga lumi asü?

⁶Aser kodang nenoki chidir aser jemdir nenoki pei sasa achir aser pei sasa ajemer masü no?

⁷Kodang Yirusalem nung nisung liasü aser azükarua liasü, aser la meketa yimtitem anüolentip tsütsü, aser ali lenten nung nisung liasü, alemli ainkari ayimtenba KIBUBA O ya masü no?”

⁸KIBUBA o ya oda Zekaria dangi aru,

⁹Yamai Temeranger KIBUBAi ashir, “Ochi obendangba inyakang, nisung shiai pei adianu dang yimlibilem aser taochi sayuang.

¹⁰Amitsür mesüra tebu malir aener mesüra sensaker tekangshi, aser nenok shingai pei adianu anema nenok mulungjang nung tamajung teshisa.

¹¹Saka parnoki manga, aser maa ta meyipadok aser mangashitsü asoshi parnok tenarong tangbangadok.

¹²Hau, parnoki ozüngji, aser Temeranger KIBUBAi pa tanela agi alemli ainkartem ajanga yokba otem, angashia lir ta parnoki pei mulungjang lung ama kümdaktsü. Anungji Temeranger KIBUBA nungi terasaba tulu aru.

¹³Ni aja aser parnoki mangaba ama, yamaji parnoki ajatsü aser ni mangatsü” ta Temeranger KIBUBAi ashi.

¹⁴Saka parnoki memetetba kin ajak rongnung ni mopung agi parnok prokshidaktsütsü. Yangji nisung shinga ajanga mesüi mesüra meyipa marui parnok sülenbo linükji azüngmeyaka aküm; kechiyong alinük tajungji parnoki teraksa kümdaktsü.