Read njo ZEKARIA 8 Bible Online

ZEKARIA 8 - njo bible

ZEKARIA 8

¹Temeranger KIBUBA O kü dangi ya oda aru,

²Yamai Temeranger KIBUBAi ashir, “Zion asoshi tenükmi tulu agi ni nükmir, aser la asoshi ain tulu adoka ni nükmia lir.”

³Yamai KIBUBAi ashir, “Ni Zion dangi meyipa arutsü lir, aser Yirusalem nung alitsü aser Yirusalem dang, atangji yimti ta ajatsü; aser Temeranger KIBUBA tenem dang, Temeshi tenem ta ajatsü.”

⁴Yamai Temeranger KIBUBAi ashir, “Yangji tamburtem aser tantsürtem, Yirusalem yimdong nung amentsü, nisung shia pei mechi teka nung amer anogo jenti alitsü.

⁵Aser yimti yimdong sünga, tebur chanutem aser tetsür chanutem yangji asaya-a alitsü.”

⁶Yamai Temeranger KIBUBAi ashir; “Item anogo nung iba nübur anünga alir nükdang aji tesüngmangtsü süra, aji ano kü nükdang tesüngmangtsü asütsü asü?” ta Temeranger KIBUBAi ashir.

⁷Yamai Temeranger KIBUBAi ashir; Ajiang, ni kü nübur anüdoklen lima nungi, aser anüolen lima nungi kümzüktsü.

⁸Aser ni parnok anir arutsü, aser parnok Yirusalem nung alitsü, aser parnok kü nübur asütsü, aser atangji aser temeshiba nung ni parnok Tsüngrem asütsü.

⁹Yamai Temeranger KIBUBAi ashir, “Oda tenla ki yanglutettsü atema ainkartem shirnok Temeranger KIBUBA ki yangerba anogo nung liasü, parnok bang nungi item o item anogo nung angashirtem, nenok teka tashi ita liang.

¹⁰Kechiyong item anogo matongdangbo nisung shia mesüra shiruru asoshi taa agiba mali asü; mesüra tsükchir aliba yong shir tugudir aser aitdir pa asoshi kecha tesünep maliasü, kechiyong ni nisung shia pei kiyonger anema toktsü.

¹¹Saka tangbo mezüng anogotem ama tanüngba iba nübur dang ni mebenshitsü” ta Temeranger KIBUBAi ashir.

¹²Kechiyong tesünep süngjang proktsü, tsükmenatzü dongi pei tejang agütsütsü aser ali-i pei nungi adokba agütsütsü aser anüngtemi parnok azüngtsü agütsütsü; aser tanüngba iba nübur nem ni item tesem amangdaktsütsü.

¹³“Oh Yihuda kidong aser Israel kidong, kin rongnung nenok atakatemba ka küma liasü, anungji ni nenok kümzüktsü, aser nenok temoatsü ka südaktsütsü, tetsübu, saka nenok teka tashi ita liang.”

¹⁴Kechiyong Temeranger KIBUBAi yamai ashir, “Nenok tsüraburtemi ni ain adoka jashidaktsüdang ni nenok dak tamajung inyaktsü bilemba nungi ni temulung memeyip,” ta Temeranger KIBUBAi ashir.

¹⁵Anungji tanaben item anogo nung Yirusalem dang, aser Yihuda kidong dang tajung inyaktsü ni bilema lir, nenok tsübua teli.

¹⁶ Itemi nenoki inyaktsüba mapa lir, nenok nisung shiai pei kiyonger den ochi jembiang, nenok süngkhüm nung ochi o bendangang, aser yimjung yangluang;

¹⁷aser nenok shingaia pei kiyonger anema temulungjang nung tamajung teshisa aser tiyazü züngyazüngku tesü, kechiyong item mapa ajakji ni sempar” ta Temeranger KIBUBAi ashir.

¹⁸Temeranger KIBUBA O kü dangi ya oda aru;

¹⁹Yamai Temeranger KIBUBAi ashir, “Ita pezübuba nung lumibaji, aser ita pungububa nung lumibaji, aser ita tenetbuba nung lumibaji, aser ita terbuba nung lumibaji, Yihuda kidong asoshi tepela aser jangratemtsü aser telungso benjong alitsü, anungji ochi aser yimjung meimang.”

²⁰Yamai Temeranger KIBUBAi ashir; “Ano ya ataloka arutsü, oda kintem aser yimti tulutem nung alir nisung jenti arutsü;

²¹aser yimti ka nung aliri ya oda shia tanga kati aotsü, KIBUBA yimli mepishitsü, aser Temeranger KIBUBA bushitsü asenoki kara-a odi; nibo taor.

²²Hau, nisung jenti aser tashi tait kintemi Yirusalem nung Temeranger KIBUBA bushitsü aser KIBUBAr yimli mepishitsü arutsü.”

²³Yamai Temeranger KIBUBAi ashir: “Item anogo nung ya oda ataloktsü, kintem oshi ajak nisung ter-i Yihuda nunger ka dak sü nung soter ashitsü, onok nenok den aotsü, kechiyong Tsüngrem nenok den lir ta onoki angashiogo.”