Read njo ZEKARIA 9 Bible Online

ZEKARIA 9 - njo bible

ZEKARIA 9

¹ KIBUBA shin o Hadrak lima anema lir, aser iba Damaska dak metaloktsü, kechiyong nisungtem ajak aser Israel kin KIBUBA tsütsü lir.

²Aser arrtsü nung aliba Hamatha, Tair aser Sidon parnok kanga shisa taka dena lir.

³Aser Tair pei sasa mitsa yanglu, aser ali ama taribi nangten aser yimdong lishi ama hon nangten.

⁴Ajiang, KIBUBAi pa magitsü aser par rongsen tzüyim telungi zükoktsütsü, aser mi agi pa samatsütsü.

⁵ Askeloni angutsü aser tsübua alitsü, Gaza-a kanga shisa rama-a alitsü, ano Ekron, kechiaser pa teimla maksü kümdaktsür, aser Gaza nung chuba samatsü. Askelon nung nisung malitsü.

⁶Aser Ashdod nung temeyoktep kin ka alitsü, aser ni Filistia nunger mezümekümba leptokadoktsü.

⁷Aser ni pa tebang nungi pa zü aser pa tepu tsüngda nungi tesempatsü bener oadoktsü; aser ano pa asen Tsüngrem asoshi tanüngba asütsü; aser Yihuda nung pa tanishir aser Ekron Yebus ama asütsü.

⁸Aser shinga oli-aruli ta mesüitsü asoshi kü ki anasa ni tanüker ama menden yanglutsü; aser joko rishikangshir shingai parnok ajanga mesüitsü; kechiyong tangbo ni kü tenük agi nguogo.

⁹Oh Zion jala, kanga pelaseta liang; Oh Yirusalem jalatem, ayimtenang, ajiang, ne Chuba ne dangi arur, pa ochishir aser tekümzüker lir, ajemalua oda gado chanu dak sanger ne dangi arur.

¹⁰ Aser Efraim nungi ni talungtsü leptoktsü, aser Yirusalem nungi kor, aser tongbang lijak leptokadoktsü, aser kintem dang pai tesünep jembitsü; aser pa yimli tzüyim nungi tzüyim tashi aser ayong nungi ali tatem tashi alitsü.

¹¹ Ano, na asoshia na kü tezüngzüktepba azü yong, ne tepuokbatem tzü makadak ongken nungi ni salatsü.

¹²Nenok teimla aliba tepuokertem, mitsa bushia meyipang; tanüsa ni nenok nem anasü shia agütsütsü metetdaktsü.

¹³Kechiyong kü lijak mesüka ni Yihuda azüa aruogo, iba nung Efraim lijakjang alitsü; Oh Zion ne chirtem anema ne chirtem ni ajungmesotsü, Oh Grik, aser temeranger nok ama na kümdaktsütsü.

¹⁴Aser parnok madaki KIBUBA adoktsü aser pa lijakjang tsüngpret ama aotsü, aser KIBUBAi jangzü aputsü, aser anüolentip Tsüngrem mopung den aotsü.

¹⁵Temeranger KIBUBAi parnok kümzüktsü aser parnok meyoktsü, aser lung lijak nungi yokba lung nung ajemshitsü aser parnoki yi ama ajemtsü aser susa ama sünga alitsü tenladak ama lokjemtsü.

¹⁶Aser KIBUBA parnok Tsüngremi iba anogo nung pei nübur san telok ama parnok kümzüktsü; kechiyong chuba korang senti lung ama, par linük nung sentsüprangshia parnok alitsü.

¹⁷Kechiyong pa ajungba koda tulu, aser pa tobur ajungba koda tulu lir; asangurtem chi agi aser aiürtem yi tasen agi tashi ita kümdaktsütsü.