Read njo MALAKI 1 Bible Online

MALAKI 1 - njo bible

MALAKI 1

¹KIBUBA shin o Malaki ajanga Israel dangi.

²“Ni nenok meim,” ta KIBUBAi ashir. Aji saka nenoki ashir, “Kechi nungsa nai onok dang meim? Yakob tediji Esau masü no?” ta KIBUBAi ashir, aji saka ni Yakob meim;

³saka ni Esau sempa, aser pa tenemtem azüngmeyakdak kümdaktsü, aser pa senmang arem nung shirongtem nem agütsü.

⁴Aji saka Edomi ashir, “Onok laoa lir, saka onoki teraksaji tanaben yanglutsü;” yamai Temeranger KIBUBAi ashir, “Parnoki yanglutsü, saka ni laodaktsütsü aser nisungi parnok dang tamajung linük aser anema KIBUBA ain adokba teti aliba nüburtem ta ajatsü.

⁵Aser nenok tenüktemi angutsü, aser nenoki Israel linük atena oa KIBUBA uluang” ta ashitsü.

⁶“Techiri pei tebu, aser kiliri pei kibur tushir: ni tebu ka süra, kü tetushi kong lir? Aser ni kibur ka süra, kü dang tsübuba kong lir?” ta Temeranger KIBUBAi nenok dang ashir, “Oh kü tenüng sensatsüba putirtem.” Aser nenoki ashir, “Kechi nung onoki ne tenüng sensatsü?”

⁷Nenoki kü tenladak temenen amtsük tenlar aser nenoki ashir, “Kechi nung onoki na menentsü?” Iba nungji nenoki ashir, “KIBUBA langbang tetilutsü lir.”

⁸Aser kodang nenoki tetsüng tatsük aser shirangbatem tenladir,aji tamajung masü no? Aser kodang nenoki tsüngtsüker aser shiranger tenladir, aji tamajung masü no? Tang aji ne governor nem agüjang; aji agi pa pelatsü asü? Mesüra pai na agizükdi ma?” ta Temeranger KIBUBAi ashir.

⁹Tang, ni nenok dang mepishir, Tsüngremi asenok dang aochia litettsü asoshi pa yimli sayutsü mepishiang; ya nenok ket agi tenlaba lir, pai nenok dang aochia lidi ma? ta Temeranger KIBUBAi ashir.

¹⁰“Oh nenoki kü tenladak amajok nung mi metsükloktsü asoshi nenok rongnung kati kishitem shibanglasang! Ni nenok dak tepela mali, ta Temeranger KIBUBAi ashir, mesüra ni nenok ket nungi tenla magizüktsü.

¹¹Kechiyong anüdok nungi anülu tashi bendanger rongnung kü tenüng tulu alitsü; aser ajaklen kü tenüng asoshi teronem menemtsü aser temerük tenla tenlar, kechiyong bendanger rongnung kü tenüng tulu alitsü,” ta Temeranger KIBUBAi ashir.

¹²Saka nenoki aji menentsür, angji nenoki ashir, KIBUBA langbang menena lir, aser iba nungi adokba süngjang, oda pa chiyungtsü sensamasa lir.

¹³Ano nenoki ashir, ‘Ya kechi talaktsüka lir! Aser nenoki kü dak teni asükloktsü’ ta Temeranger KIBUBAi ashir. Aser nenoki tashiyim agi tetsüng tatsük aser shirangertem bener aru, yamaji nenoki tenla abener; ni ibai nenok ket nungi agizükdi ma? ta KIBUBAi ashir.

¹⁴Tashioktsür, shiba san telok rongnung tepung ka lir, aser pai aji atemzüka ayur, saka tetepsettsü tarak aketba ka KIBUBA nem tepseta tenlar pa atakatem sang, kechiaser ni chuba tulu ka lir, aser bendanger rongnung kü tenüngji tetsübutsü ka lir,” ta Temeranger KIBUBAi ashir.