Read njo MALAKI 3 Bible Online

MALAKI 3 - njo bible

MALAKI 3

¹ “Ajiang, ni kü tenyar yoker aser pai kü jakdang lenmang renemtsü aser KIBUBA shiba nenoki bushir aoksa-a pei tenla kidangi arutsü aser tezüngzüktepba tenyar shiba dang nenoki pelar, ajiang, pa arur, ta Temeranger KIBUBAi ashir

²Saka shibai pa aruba anogo tonga arema litettsü? Aser pa adokdang shibai noktaktettsü? Kechiyong pa temeshitetba mi ama, aser sü yanglur taremba mozü ama lir.

³Taribi merükteter aser meshiteter ama pa amentsü aser Levi chirtem meshitettsü. Pai parnok hon aser taribi mesüka merüktettsütsü, anungji KIBUBA asoshi parnok temeshiba nung tenla bener aruba nisungtem akümtsü.

⁴Idangji alemli ama aser akhidang ama Yihuda aser Yirusalem tenlaji KIBUBA dang tepelatsü alitsü.

⁵Idangji ni nenok dangi o bendangtsü asoshi anasa arutsü, aser temezüngertem aser nüktapangtartem anema aser shiri tiyazü nung azüngashir, aser shirnoki ayangertem pei taa nung kangshir, amitsür aser lajar; aser shirnoki aener arua alir dang külak-kübonga benshir, aser ni metsübur, parnok anema ni tekara kuli asütsü” ta Temeranger KIBUBAi ashir.

⁶Ni KIBUBA memelenshir; anungji nenok, Oh Yakob chirtem, mesamadaktsüi lir.

⁷Nenok tsürabur anogo nungi nenoki kü tzüzüng-ozüng anema apuso, aser itemji mebenshi. Ni nenok dangi meyiptsü asoshi kü dangi meyipa arung, ta Temeranger KIBUBAi ashir. Saka nenoki ashir, Onoki koda meyiptsü?

⁸Nisungi Tsüngrem rakzükraktemdi ma? Aji saka nenoki ni rakzükraktemdagi. Saka nenoki ashir, onoki koda na rakzükraktem? Ter shilem aser tenla saruba nung!

⁹Atakatem ka agi nenok atakatemogo; kechiyong nenoki ni rakzükraktemdagi, iba kin ajongai.

¹⁰ Kü kidang chiyungtsü akatsü asoshi ter shilem ajonga terizüngdak kidangi bener arung, aser iba amai ni tendangang, ta Temeranger KIBUBAi ashir, aser ni nenok asoshi anüng kichiba lapoktsüdisü melapoktsülir, aser nenok asoshi temoatsü moshia mayim tashi meküpzüka yokdisü meyoklir reprangang.

¹¹Idangji ni nenok asoshi temeyoker arütsütsü, anungji nenok asoshi iba jagi ali nungi adokbatem mesamatsütsü, nenok alu nung tsükmenatzü dongi anojungi pei tejang jetzüka metsükdaktsütsü, ta Temeranger KIBUBAi ashir.

¹²Aser kin ajaki nenok dang temoatsü ta ajatsü, kechiyong nenok tepelatsü lima asütsü, ta Temeranger KIBUBAi ashir.

¹³“Ni anema nenoki o tulu jembi, ta KIBUBAi ashir. Saka nenoki ashir, Na anema onoki kechi jembi?

¹⁴Nenoki ashir, Tsüngrem tenzüktsü tenüngdaktsü maka; aser pai melaba benshitsü aser Temeranger KIBUBA madang mangyimer ama jajatsü ya kechi tajangzük lir?

¹⁵Saka tang, asenoki mezümekümer temoatsüba ta züngshir; atangji tamajung inyakertem azükarur; aser shirnoki Tsüngrem tendanger, parnok jenteter.

¹⁶Shirnoki KIBUBA akhüm tsübur, kati ka den jembiteper, KIBUBAi parnok dang anga aser parnok dang angashi, aser pa madang shirnoki KIBUBA dang akhüm tsübur aser pa tenüng shisadanger parnok indang tebilemtettsü kaket ka zülua liasü.

¹⁷Anungji ni inyakba anogo nung kü pei rongsen ama parnok kü meyong asütsü, ta Temeranger KIBUBAi ashir, aser oda kümzüka yutsür, iba ama ni parnok kümzüka ayutsü.

¹⁸Idangji temeshiba aser tamajungba tsüngda nung, shibai Tsüngrem tenzüker aser shibai pa metenzüker, tetsüngda nung nenoki tanaben bendangtsü.”