Read njo MATHI 12 Bible Online

MATHI 12 - njo bible

MATHI 12

¹Iba mapang nungji Yisui amungnü alutem ajanga ao. Aser pa nütsüngtem ya-a liasü. Aser parnoki tsükjong mittsü tenzük aser achi.

²Farisitemi ya ngua Yisu dang ashi, “Ajiangjo, amungnü kechi inyaktsü tim masü, aji ne nütsüngtemi inyaker.”

³ Yisui parnok dang ashi, “Dawid aser pa den alirtem ayadang, pai kechi inyak nenoki aji mezüngdang ama?

⁴ Pai Tsüngrem kidangi ai aser, Tsüngrem madang ayuba amtsük parnoki achi, kechi putirtem dak alaka, pa mesüra pa den alirtemi achitsü tim masü.

⁵ Mesüra amung

⁶Saka Tenla kidang nungia tuluba ka yangi lir ta ni nenok dang ashir.

⁷ Lai nung ashir, ‘Ni tenla masü, taochi aginür.’ Nenoki iba tetezüji kechiar metet asübo, tai makaba nem nenoki tai magütsüla.

⁸Kechiaser Nisung Chirji Amungnü Kibuba lir.’ ”

⁹Pai yang nungjagi pila ao aser parnok sinagogi ai.

¹⁰Aser ajiang, teka ashirepba nisung ka yangji liasü. Pa aitsütsü asoshi parnoki pa dang asüngdanga ashi, “Amungnü nung anebtsütsü tim asü?”

¹¹ Yisui parnok dang ashi, “Nenok rongnung shiba san ka aka, ibaji amungnü nung kangla ka nung tsükra pai aji ameter matsütettsü ama?

¹²Ajangla san ka dang nungi nisung kaji koda taoba! Anungji amungnü tajung inyaktsü tim dang lir.”

¹³Idangji pai nisungba dangji ashi, “Ne teka songtokang.” Pai aji songtok, aser aji külen amaji anebadok.

¹⁴Saka Farisitemi kimai tugu aser parnoki pa koda samatsütsü pa anema parnoki tasa asa.

¹⁵Yisui aji meteta yang nungjagi ao, aser nisung aikati pa sülen anitak: aser pai parnok ajak anebtsü.

¹⁶Aser pa nüngsang memetetdaktsütsü pai parnok nem ozüng agütsü.

¹⁷Isaia ainkar ajanga jembiba ya ataloktsü asoshi liasü:

¹⁸ “Ajiang, kü tenzüker shiba ni shimtet, kü meimba shiba dak kü mulung achir; ni pa dak kü nela yutsütsü. Kintem dang obendangba pai sangoktsütsü.

¹⁹Pai meraratsü mesüra mayimtentsü; shingaia yimdong nung Pa ola mangashitsü.

²⁰Obendangbaji takok ngua pai meyok tashi; nenrepa aliba tzütok ka pai mesükdangtsü, aser mokozü alongba milen kata pai meremseptsü,

²¹aser pa tenüng nung kintemi yimlatsü.”

²²Idangji Yisu madangi temenen tanelai apuba, tenük tapok suwar ka anir aru aser, Yisui pa anebtsü, anungji suwar jagi jembi aser angu.

²³Aser telok ajaki süngmanga ashi, “Ibai Dawid Chirji asütsü südi na?”

²⁴Saka Farisitemi aji angashidang yamai ashi, “Temenen tanelatem rongnung tongtiba Belzebuli iba nisung nem ain-tashi agütsüba ajanga dang pai temenen tanelatem aridoker.”

²⁵Saka parnok tebilemba meteta Yisui parnok dang ashi, “Koba yimlisa pei anema lemsadir laor, aser yimti mesüra kibong kobaisa pei anema lemsadir menoktaktettsü.

²⁶Satani Satan aridokra pai pei anema lemsar, ajangla pa yimli koda noktaktsü.

²⁷Aser ni Belzebuli agütsüba ain-tashi ajanga temenen tanelatem aridokra, nenok chirtemi shiba ain-tashi ajanga parnok aridoker? Anungji parnok nenok obendangertem asütsü.

²⁸Saka Tsüngrem Tanela ajanga ni temenen tanelatem aridokra, ajangla Tsüngrem yimli nenok dangi aruogo.

²⁹Nisung kati tamasa tashi tait nisungbaji alena meyura, pai koda sür tashi tait nisungba kidang jagi ia par rongsen rakzükraktemtettsü? Pai tashi tait nisungbaji tamasa alena yutet nung dang pai par kidang rakzükraktemtettsü.

³⁰ Shibasa kü den mali paji ni anema lir, aser shibai kü den külemi mebendener pai prokshir.

³¹Ibayongji ni nenok dang ashir, temenen aser tatalaba ajak nisungtem dang atoktsü saka Tanela anema atalababo matoktsü.

³² Shibaisa Nisung Chir anema jembidir, aji pa dang atoktsü, saka shibaisa Tanela Temeshi anema jembidir, iba lima nung süshia mesüra tarutsü lima nung süshia aji pa dang matoktsü.

³³ “Süngdong jungra iba süngjang ajungtsü; saka süngdong mejungra iba süngjangjia majungtsü; kechiaser süngdong kaji pei süngjangtem agi meteter.

³⁴ Nenok per chirtem, nenok mejungi yur nenoki koda tajung jembitettsü? Kechiaser kechi temulung nung sünga lir aji tebang agi jembir.

³⁵Nisung tajungi pei akaba tajung nungi oset tajung agiteter, aser nisung tamajungi pei akaba tamajung nungi oset tamajung agiteter.

³⁶Aser ni nenok dang ashir, nisungi kechi amajok o-sa jembidir, parnoki iba o indangji o bendangba anogo nung langzütsü.

³⁷Kechiaser ne o agi na metentsü, aser ne o agi na aitsü.”

³⁸Idangji Farisitem aser tezülurtem kari Yisu dang ashi, “Tesayur, onoki na nungi temaitsü ka aginür.”

³⁹Yisui parnok dang langzü, “Tamajung aser nüktapangtaba putui temaitsü bushir, saka Yona ainkar temaitsü dak alema iba putu nem temaitsü kecha magütsütsü.

⁴⁰ Kechiaser Yona anogo asem aser aonung asem ango tulu pok nung aliba ama, nisung Chira anogo asem aser aonung asem ali telung nung alitsü.

⁴¹ Ninevi nungeri o bendangdak iba putu den noktaktsü aser iba putu aitsütsü, kechiaser Yonai sayutsüngi nung parnoki temulung meyip; aser ajiang, Yona dang tuluba ka yangi lir.

⁴² Anüdoklentip chubatsüri iba putu den o bendangdak noktaktsü, aser iba putu aitsütsü; kechiaser lai ali tatem nungi Solomon shisatsü angatsü aru, aser ajiang, Solomon dang tuluba ka yangi lir.

⁴³“Saka Kodang temenen tanelai nisung ka nungi adoker, tesüngzük bushia tzü malidak takong linük ajanga aor.

⁴⁴Saka kodang pai bushibaji mangur idangji pai ashir, ‘Kü ki koba nungi ni adok ajagi ni meyipa odi.’ Pa arur aser pai aji azüngteta oktoker tobur junga kümdaktsür angur.

⁴⁵Idangji pai aor aser pei dang kanga agi tamajungba tangar temenen tanela tenet anir air aser yangji alir; aser iba nisung tesülen tia mezüng tia dang nungi tamajungba akümer. Anungji iba tamajung putu asoshia yamaji alitsü.”

⁴⁶Yisu ano teloktem den jembia alidang, ajiang, pa tetsü aser tenu nungertem pa den jembinüa kima noktaka liasü.

⁴⁷Nisung kati Yisu dang ashi, “Ajiang netsü aser nenu nungertemi ne den jembinüa kima noktaka lir.”

⁴⁸Yisui pa dang langzü, “Kütsü shiba, aser künu nungertem shir?”

⁴⁹Aser pai pei nütsüngtem tsütsü shir teka songtoka ashi, “Kütsü aser künu nungertem itemi lir.

⁵⁰Kechiaser shiri kotak nung aliba kü Bui mulungba inyakdir paji künu, küyi aser kütsü lir.”