Read njo MATHI 19 Bible Online

MATHI 19 - njo bible

MATHI 19

¹Kodang Yisui item o jembima, pai Galil toktsü aser Yordan külen aliba Yihuda linüki aru.

²Telok jenti pa sülen anitak aser idakji pai parnok anebtsü.

³Farisitem pa dangi aru aser pa atitanga asüngdang, “Teburi pei bilemba meshi-i kuli kar atema pei kinungtsü palatsü tim asü?”

⁴ Pai langzü, “Tetenzük nungi teyangluri meimchir tetsür o tebur-na yanglu ta nenoki mezüngdang no?”

⁵ Aser pai ashi, “Ibayongji teburi pei tebu o tetsü-na toktsür pei kinungtsü den lungjema alitsü aser tenaprongla shi ka dang akümtsü.

⁶Anungji joko parnok ana masü, saka shi ka dang. Anungji Tsüngremi kechi lungjemdaktsü aji nisungi tepiladaktsü.”

⁷ Parnoki pa dang ashi, “Ajangla tepalatsü shiti agütsür pala-ang ta Mosai kechiba mela?”

⁸Yisui parnok dang ashi, “Nenok temulung merang nungji Mosai nenok dang pei kinungtsü palatsü mela, saka tetenzük nungi yamaji mali asü.

⁹ Aser ni nenok dang ashir, ‘Shibaisa nüktapangta dak alema pei kinungtsü palar tangar tetsür agidir, pai nüktapangtar.’ ”

¹⁰Nütsüngtemi pa dang ashi, “Tebur pei kinungtsü den yamaji sentaktepa ali süra, ki mayimang tajungba.”

¹¹Yisui parnok dang ashi, “Aji nisung ajaki agizüktetba ka masü, saka shir Tsüngremi ya asoshi shimtetogo, parnok asoshi dang alitsü.

¹²Kechiaser karbo tetsü nu menden nungi yanglur asoba teyangluba nisung lir, aser karbo tangari yanglutsüba, teyangluba nisung lir, aser karbo kotak yimli asoshi pei sasa yangluba nisung lir. Shibai ya agizüktsü akok pa nem agizükdakjang.”

¹³Idangji pa teka agi nemeta sarasademdaktsütsü asoshi tila tanurtem pa dangi anir aru; saka nütsüngtemi parnok arütsü.

¹⁴Saka Yisui ashi, “Tila tanurtemji oda tokjang, parnok kü dangi arutsü tesongtem; kechiaser kotak yimli ibala meyong lir.”

¹⁵Aser pai parnok dak teka agi nemet aser yang nungjagi pa pila-a ao.

¹⁶Aser ajiang nisung ka pa dangi arua asüngdang, “Tesayur, teti taküm angutsü asoshi ni kechi mapa tajung inyaktsüla?”

¹⁷Pai pa dang ashi, “Kechi tajung lir iba indangji kechiba nai kü dang asüngdanger? Tajungbo ka dang lir. Nai taküm daki inürabang temelaba ozüngtem benshiang.”

¹⁸ Aser pai pa dang ashi “Kobala?” Yisui ashi, “Nai nisung tetepset, nai nüktapangta tebenshi, nai tauya, nai tiyazü kuli teyi,

¹⁹ nebu aser netsü akhüm tsübuang; aser nai ne kiyonger dang pei ama meimang.”

²⁰Asangur jagi pa dang ashi, “Item ajak ni benshia aruogo; ni ano kechi agi matoksa?”

²¹Yisui pa dang ashi, “Nai tabensa kümnüra, oang, na akaba yokang, aser sensaker nem agüjang aser kotak nung ne rongsen akatsü; aser arung kü sülen anitakang.”

²²Saka asangur jagi ya ashiba angashidang, pa jashia oadok, kechiaser pa rongsen tulu akaba nisung ka liasü.

²³Yisui pa nütsüngtem dang ashi, “Atangji ni nenok dang ashir, takari kotak yimli-i aitsü tasak lir.

²⁴Ano tanabena ni nenok dang ashir, takar nisung kati Tsüngrem yimli-i aitsüba dang nungibo ajem ki ka ateta ut aotsü temelaba.”

²⁵Nütsüngtemi aji angashidang kanga süngmangadok, aser ashi, “Ajangla shiba-ang kümzüktsü?”

²⁶Yisui parnok dak ranglok aser ashi, “Nisungtem asoshi ya tamakoktsü, saka Tsüngrem asoshibo ajak takoktsü.”

²⁷Idangji Peteri langzüa pa dang ashi, “Ajiang, onoki ajak toktsür ne sülen anitak; ajangla onoki kechi angutsü?”

²⁸ Idangji Yisui parnok dang ashi, “Atangji ni nenok dang ashir, tasen yangluba nung, kodang Nisung Chir pei sentsüwangshi menden nung mendir, idangji nenok kü sülen anitakertema, Israel kidong terana o bendanga, chuba menden terana nung amentsü.

²⁹Aser shibaisa ki süshia, chirnur süshia, lim süshia, kü nüng asoshi toktsüogo, pai noklangbena angutsü, aser teti taküm senmang amangtsü.

³⁰Saka tamapur aika tesü akümtsü, aser tesüpur aika tama akümtsü.