Read njo MATHI 23 Bible Online

MATHI 23 - njo bible

MATHI 23

¹Idangji Yisui telok aser pa nütsüngtem dang ashi,

²“Tezülur aser Farisitemi Mosa menden nung mena lir.

³Anungji parnoki nenok dang kechisa shidir; itemji inyakang aser benshiang. Saka parnok mapa ama nenoki teinyak, kechiaser parnoki jembir, saka meinyaker.

⁴Hau, parnoki khu taret aser maremtettsüba alenbanger nisung tapubang nung benloktsür, saka parnoki pei sasa temeyong agia mekongshir.

⁵ Saka parnok mapa ajak nisungi angutsü asoshi parnoki inyaker; kechiaser parnoki temeshi temaitsü tululu alenloker aser sütsüng talanglang ayur.

⁶Aser parnoki benjong nung yakbang nung mener, aser sinagog nung temaba menden aginer,

⁷aser shishidak salem aginür aser nisungtemi parnok dang tesayur ta jadaktsünür.

⁸Saka nenok dang tesayur ta tejadaktsüma, kechiaser nenok tesayur ka lir, aser nenok ajak adianu.

⁹Aser alima nung nenok shinga danga nenok tebu ta tejama kechiaser nenok Tebu ka, kotak nung lir.

¹⁰Mesüra nenok dang tanishirtem ta tejadaktsüma, kechiaser nenok tanishir ka oda Khrista lir.

¹¹Saka nenok rongnung shiba tulutiba lir, pa nenok tenzüker asütsü.

¹² Aser shibaisa pei sasa uludir pa tila akümtsü, aser shibaisa pei sasa tila kümdir pa ulutsü.

¹³“Saka nenok tezülurtem aser Farisitem, anemsübatem aiatai! Kechiaser nenoki Kotak Yimliji nisungtem nungi shibangadoker; kechiyong nenoki nenok sasa-ka mair, aser tangar taitsü alibatema meidaktsür.

¹⁴Nenok tezülurtem aser Farisitem aiatai! Kechiaser nenoki amitsür kitem meyoker, aser tangari angutsüsa talanglang sarasademer; anungji nenok tai tali angutsü.

¹⁵“Nenok tezülurtem aser Farisitem aiatai! Kechiaser nenoki nisung ka Yihuda nunger kümdaktsütsü asoshi tzüyim aser alima meketa senzür, aser pa yamaji akümdang nenoki pa nenok dang anasü agi tali molumi chir kümdaktsür.

¹⁶Nenok tenük tapok lenirtem aiatai! Nenoki ashir, ‘Shibai tenla ki atema züngyazüngkudir, aji kecha masü, saka shibai tenla ki hon atema züngyazüngkudir, pa sentsütsür lir’

¹⁷Nenok tamashi aser nükpokertem, koba taoba, hon asü mesüra tenla ki, kobai honji meshiteta kümdaktsür?

¹⁸Ano nenoki ashir, shibai tenla dak atema züngyazüngkudir aji kecha masü, saka shibai iba manung aliba sempet atema züngyazüngkudir pa sentsütsür lir.

¹⁹“Nenok nükpokertem! Kechiaser sempet asü, sempet meshiteta kümdaktsüba tenladak taoba?

²⁰Anungji shibai tenladak atema züngyazüngkudir, tenladak aser iba manung aliba oset ajak atema züngyazüngkur.

²¹Aser shibai tenla ki atema züngyazüngkudir tenla ki atema aser iba nung shiba ali pa atema züngyazüngkur.

²² Aser shibai kotak atema züngyazüngkudir, Tsüngrem menden atema, aser iba manung shiba amener pa atema züngyazüngkur.

²³ “Nenok tezülur aser Farisi anemsübatem aiatai! Kechiaser nenoki napa aser tzüma mersü aser an-menemtsü tashi nungi ter shilem tenla agütsür, aser ozüng nung aketba tongtibang mapatem, oda tim o bendangba, aser yimlibilem, aser tamang, item nenoki meinyaki yutsü. Saka nenoki itemi inyaker alitsüla, aser tangajia meinyaki meyutsütsüla.

²⁴Nenok tenük tapok lenirtem, nenoki yimobo senzüker, saka utbo meyoker.

²⁵“Nenok tezülur aser Farisi anemsübatem aiatai! Kechiaser nenoki marok aser su tema shidoker, saka telunglenbo ambangyim aser yi mesepba agi sünga lir.

²⁶Tenük tapok Farisitem, nai tamasa marok aser su telunglen shidokang, ajagi temalena merüka akümtsü.

²⁷ “Nenok tezülur aser Farisi anemsübatem aiatai! Kechiaser nenok leper temesüng mesüker, koba temalen tereprangtsü tajung, saka telunglen tasür teret aser kechisarena memerükba agi sünga lir.

²⁸Yamaji tema nung nenok nisung madang temeshi ama, saka telunglen nenok anemsüba aser ozüng raksaba agi sünga lir.

²⁹“Nenok tezülur aser Farisi anemsübatem aiatai! Kechiaser nenoki ainkartem leper yanglur, aser temeshipurtem leper tobur junga yanglur.

³⁰Aser ashir, ‘Ozü tebou nunger tendak onok ali asübo, ainkartem tepsetba nung parnok den onok medenla.’

³¹Anungji nenoki pei sasa ainkartem tepseter chirtem ta kuli agütsür.

³²Ajangla nenok tetsü-teboutem tenzükba abensajang.

³³ Nenok pertem, per chirtem nenoki kechi koda molumi o bendangba nungi jenbutsü?

³⁴Aser ni nenok dangi ainkartem, tezülurtem aser shisakartem nenok rongnung yoktsü, shirnok nenoki kar tepsettsü aser kar kangki nung angenloktsü; aser kar dak sinagog nung azüktsü, aser yimti nungi yimti tashi arishitsü.

³⁵ Aji asünung alima nung temeshipur zü tokshiba ajak, oda temeshi Abel zü nungi temeshidak o tenladak na tsüngda tepsetba Barakia chir Zekaria zü tashi nenok madak alatsü.

³⁶Atangji ni nenok dang ashir, item ajak iba putu dak ataloktsü.

³⁷“O Yirusalem, Yirusalem, ainkartem tepsetba, aser pa dangi yokertem lung agi onsetba! An tetsüti-i pei techanu tashikang kübok anitener amukbangba ama, ni kwiben ner chirtem külemi anitennü, saka nenoki memulung.

³⁸ Ajiang, nenok ki nenok nem azüng azünga toktsür.

³⁹ Kechiaser ni nenok dang ashir, ‘Kibuba tenüng nung shiba arur pa sangang’ ta nenoki mashi tashi tang nungi nenoki ni mangutsü.”