Read njo MATHI 3 Bible Online

MATHI 3 - njo bible

MATHI 3

¹Item anogo nungji Yohan Baptitsüba aru aser Yihuda lisem lima nung sayutsüngia ashi,

²“Nenok temulung meyipang, kechiaser kotak yimli anasa lir.”

³ Kechiaser Yohan indang ainkar Isaiai jembiba yamai lir, “Lisem lima nung kati ayimtenba ola, Kibuba lenmang renemang, Pa lenkong metong metonga yangluang.”

⁴ Iba Yohani ut-züng sü aben aser teperem nung shiküp nai; aser pa chiyungtsüji süngku aser arem ninang mojitzü liasü.

⁵Idangji Yirusalem aser Yihuda ajak, aser Yordan meketa aliba ajak pa dangi ao;

⁶aser parnoki pei temenen nangzüka, pai parnok Yordan ayong nung baptitsü.

⁷ Saka kodang Farisi aser Saduki pur aika pa dangi baptitsü asoshi aruba angu pai parnok dang ashi, “Nenok per chirtem tarutsü aliba ain adokba nungi ajentsü shibai nenok kümdangdaktsü?

⁸Anungji nenok temulung meyipba den putepa tejang tangdakjang;

⁹ aser, ‘Abrahamji ozü tebu lir’ ta nenoki tebilem, kechiyong ni nenok dang shidi, ‘Item lungtem nungi Tsüngremi Abraham chirtem adokdaktsütet.’

¹⁰ Aser tanga süngdongzüng nung puji ataloka lir, koba süngdong nungsa tejang tajung matanger aji lepzüktsü aser mi nung enoktsütsü.

¹¹Nenok temulung meyip ni nenok tzü nung baptitsür. Saka shiba kü sülen arudagi pa kü dang tuluba, shiba tsüngsem abentsü ni metemsü. Pai nenok Tanela Temeshi aser mi nung baptitsütsü.

¹²Pa ket nung aptoktsü ber am-a lir. Pai pei motsüngnem jungjunga oktoktsü aser pai pei tsük jendang bendentsü, aser pai tsüksü kodanga masepba mi nung rongtoktsü.”

¹³Idangji Yohan nem baptidaktsütsü asoshi Yisui Galil nungi Yordani aru.

¹⁴Saka Yohani pa songtema ashi, “Ni ang nai baptitsütsü tim sür nung, ano na ang kü dangi arur no?”

¹⁵Yisui pa dang langzü, “Tangbo odang sang, kechiaser temeshiba ajak ataloktsütsü asenokbo yamai asütsü tim.” Idangji Yohani pa dang hai-haura aka.

¹⁶Aser Yisu baptizükli pai idangyongjisa tzü nungi adok aser idangji ajiang kotak pa nem lapoktsü, aser Tsüngrem Tanela posü ka ama pa dak alua atemba pai angu;

¹⁷ aser kotak nungi ola kati ashi, “Ibai kü meimba jabaso, shiba dak ni kü mulung achir.”