Read njo MATHI 4 Bible Online

MATHI 4 - njo bible

MATHI 4

¹Idangji mojing nem atitangdaktsütsü asoshi Tanelai azüngmeyakdak lisem limai Yisu anir ao.

²Pa lirnü aser lir aonung lumiseta lir külen, pa yaadok,

³aser tatitangba jagi arur pa dang ashi, “Na Tsüngrem Chir süra, item lung agi amtsük kümang ta shiang.”

⁴ Saka Yisui langzü, “Ya zülua lir, nisungi am tesa agi dangbo taküm malitsü, saka Tsüngrem bang nungi adokba o shia agi alitsü.”

⁵Idangji mojingi pa temeshi yimti-i anir atu. Mojingi Yisu tenla ki kilem kolak nung mendaktsü;

⁶ aser pa dang ashi, “Na Tsüngrem Chir süra, ne sasa tsükang, kechiaser yamai zülua lir, ‘Na atema Tsüngremi pei tenyartem dang melatsü, aser ne tetsüng lung ka nunga memetsüdaktsütsüsa parnok kabu nung na ajungkettsü.’ ”

⁷ Yisui pa dang ashi, “Ano ya zülua lir, ‘Nai Kibuba ne Tsüngrem tatitang.’ ”

⁸Ano mojing jagi pa tenem kanga talang kati anir atu, aser pa dang alima yimlitem ajak aser item sentsüwangshi sayu;

⁹aser pai Yisu dang ashi, “Nai apudaker ni külemra, item ajak ni ne nem agütsütsü.”

¹⁰ Idangji Yisui pa dang ashi, “Satan, yang nungi oadokang; kechiaser ya zülua lir, ‘Nai Kibuba ne Tsüngrem külemang aser paji dang nai tenzükang.’ ”

¹¹Idangji mojingi pa toktsü, aser ajiang kotak tenyartem aru, aser parnoki pa tenzük.

¹²Kodang Yohanji puogo ta Yisui angazük, pai Galili pila ao.

¹³Aser Yisui Nazaret toktsür oa Zebulun aser Naftali linük nung tzüyimküm nung aliba Kapernaumi arua ali.

¹⁴Ibai ainkar Isaiai shinba o ataloktsü asoshi liasü,

¹⁵ “Bendanger meyong Galil, Yordan ajanga or, tzüyim tsütsü aliba, Zebulun lima aser Naftali lima,

¹⁶ammang nung mena alirtemi tesangwa tulu ka angu, aser tasür lima aser tasüba akhüm nung mena alir dangi tesangwa adok.”

¹⁷ Iba mapang nungjagi Yisui sayutsüngitsü tenzük, aser ashi, “Nenok temulung meyipang, kechiaser kotak yimli anasa lir.”

¹⁸Aser Galil tzüyim anasa Yisu jajadang pai adianu ana angu: Simon shiba dang Peter ta aja aser pa tenu Andria. Parnok tzüyim nungji zütsük onya liasü; kechiyong parnok angopurtem liasü.

¹⁹Aser pai parnok dang ashi, “Arung, kü sülen anitakang, aser ni nenok nisung apurtem kümdaktsüdi.”

²⁰Idangyongjisa parnoki zütsüktem toktsür Yisu sülen anitak.

²¹Ano yang nungjagi oa tangar adianu ana, Zebedier jabaso Yakob aser pa tenu Yohan, rong ka nung parnok tebu Zebedi den parnoki zütsük yanglushia pai angu; aser pai parnoka aja.

²²Aser idangyongjisa parnoki rong aser pei tebu toktsür pa sülen anitak.

²³ Yisui Galil ajak sema, parnok sinagogtem nung sayua aser Kotak Yimli Osangtajung indang sayutsüngia, nüburtem rongnung tashitak tapu tapu aser shirangba tapu tapu anebtsüyonga ao.

²⁴Aser Yisu nüngsang indang Siria ajak nung sangdong; aser tashitak aser timtem tapu tapu agi atonger shirangertem, temenen tanelai apubatem, nashira aketertem aser togimra aketertem ajak parnoki Yisu dangi anir aru; aser pai parnok anebtsü.

²⁵Aser Galil, Dekapoli, Yirusalem aser Yihuda nungi, aser Yordan külen nungi telokti jenti Yisu sülen anitak.