Read njo MATHI 5 Bible Online

MATHI 5 - njo bible

MATHI 5

¹Telokti ngua Yisui tenem jagi atu. Kodang pai amen, pa nütsüngtem pa dangi aru.

²Aser pai parnok dang yamai sayua ashi:

³“Tanela nung anünga alirtem temoatsüba; kechiaser Kotak yimli parnok meyong!

⁴ “Shiri mang ayimer parnok temoatsüba; kechiaser parnok süneptsütsü!

⁵ “Shir ajemalurtem lir parnok temoatsüba; kechiaser parnoki alima senmang amangtsü!

⁶ “Shiri temeshiba asoshi ya-a tzürar parnok temoatsüba; kechiaser parnok tipatemtsü!

⁷“Shiri taochi mapa sayur parnok temoatsüba; kechiaser parnoki taochi angutsü!

⁸ “Shir mulungsentsü merükmerüka ali parnok temoatsüba; kechiaser parnoki Tsüngrem angutsü!

⁹“Shiri yimjung yanglur, parnok temoatsüba; kechiaser parnok dang Tsüngrem chirtem ta ajatsü!

¹⁰ “Shir temeshiba inyakba asoshi rishikangshir parnok temoatsüba; kechiaser Kotak Yimli parnok meyong!

¹¹“Kodang nisungtemi ni asoshi nenok mezüngmeshia arütsüdir aser nenok rishikangshidir aser nenok anema tiyazü agi tamajung ajak jembidir, idangji nenok temoatsüba.

¹² Temulung chiang aser kanga pelaang, kechiaser kotak nung nenok sempetji tulu lir. Kechiaser nenok dang tama aliba ainkartem, parnoka yamaji rishikangshi.

¹³“Nenok alima metsü; saka metsü dak tanang samadokra, kechi agi aji nangdaktsütsü? Joko aji kecha sütsüa masü, saka padoker nisung tetsüng agi ajemshitsüba dang.

¹⁴Nenok alima tesangwa. Tenem nung aliba yimti memiimtet.

¹⁵Shingaia milen tsükloker molok telung nung mayur, saka milen atalokba dong nung ayur; aser iba jagi kidang alir ajak nem tesangwa agütsür.

¹⁶ Yamaji nisungtemi nenok mapa tajung ngua, kotak nung aliba nenok Tebu sentsü wangshidaktsütsü asoshi parnok madang nenok tesangwaji jungkai adokdakjang.

¹⁷“Ozüng süshia, ainkartem o süshia, raksatsütsü ni aru ta nenoki tebilem; itemji raksatsütsü masü saka ataloktsütsü ni aru.

¹⁸ Kechiaser züngpong ni nenok dang shidi, anüng aser ali mesama tashi, lateta akaba ozüng nungji tajento tilatiba ka mesüra tasüto tilatiba kata, ajak matalok tashi, kecha südanga süia maotsü.

¹⁹Anungji shibaisa item telatet ozüng rongnung tilatiba ka danga raksadir, aser yamaji nisungtem dang sayudir, Kotak yimli nung pa dang tilatiba ta ajatsü. Saka shibaisa item inyakdir aser sayudir kotak yimli nung pa dang tulu ta ajatsü.

²⁰Kechiaser ni nenok dang shidi, nenok temeshibaji Tezülurtem aser Farisitem temeshiba dang nungi tali tajungba mesüra, nenoki kodakaang Kotak yimli-i maitsü.

²¹“Alemli nisungtem dang ashiba ya nenoki angashiogo; ‘Nai nisung tetepset; aser shibaisa nisung tepset dir, pa obendangba lendong nung alitsü.’

²²Saka ni nenok dang shidi, shibaisa pei adianu dang rasadir,[1] pa obendangba lendong nung alitsü; aser shibaisa pei adianu dang ‘tamaji’ ta jadir, pa obendangba tsüngdang noktaktsü; aser shibaisa ‘na suwar mesüra tamaji’ ta shidir, pa molumi lendong nung alitsü.

²³Anungji tenla dak nai tenla agütsüya lira, aser yangji ne adianui na anema langka tai benshia lir ta bilemtetra, tenla dak madang ne tenlaji tokjang aser oang,

²⁴aser tamasa ne adianu den jungtepang, ajiser arung aser ne tenla agüjang.

²⁵Nai lendang alidang ne metbuba den jungtepang, aji oda mesüra, metbuba jagi na o bendanger ket nung bendanga agütsütsü, aser o bendangbai na sosang nem agütsütsü, aser na tsüngden chiokdak puoktsü.

²⁶Ni nenok dang züngpong ashir, Nai tatembangbuba poisaji meküpdang tashi idak nungjagi nai koda-kaang madoktettsü.

²⁷ “Ya ashiba nenoki angashiogo, ‘Nai nüktapangta tebenshi.’

²⁸Saka ni nenok dang shidi, ‘Shibaisa tetsür ka dak azüabunga ajidir pai la den temulung nung nüktapangtaogo.’

²⁹ Aser ne tenük tajichi agi na metsüdaktsüra, aji arokdokang aser endokang; kechiaser ne temang ajonga molumi nung puokdangbo, na asoshi ne tenük telen ka sama tajungba.

³⁰ Aser ne teka tajichi agi na metsüdaktsüra, aji leptokang, aser aji na nungi endokang, kechiaser temang ajak molumi-i aidangbo, na asoshi tenük telen ka sama tajungba.

³¹ “Ano ya shia liasü, ‘Shibaisa pei kinungtsü paladir, pai tepalaba kulizüng ka la nem agüjang.’

³²Saka ni nenok dang ashir, nüktapangta kuli dak alema tanga asoshi shibai pei kinungtsü paladir, pai la nüktapangtatsür ka kümdaktsür. Aser pala-a alidang, shibai la agidir, pai nüktapangtar.

³³ “Tana alemli nisungtem dang ashiba ya nenoki angashiogo, ‘Nai tiyazü züngyazüngku tesü, saka nai züngzükba Kibuba tsüngdang atalokjang.’

³⁴ Saka ni nenok dang ashir, kecha azüngashi tesü, kotak atemer masü, kechiaser aji Tsüngrem Chuba menden lir;

³⁵ mesüra alima atemer masü, kechiaser aji pa tetsüng ajemetdak; mesüra Yirusalem atemer masü, kechiaser aji tulusang chuba yimti lir.

³⁶Mesüra, ne kolak atemer azüngashi tesü, kechiaser kujang temesüng süshia mesüra tanak süshia nai meyanglutet.

³⁷Jokorla nenok ‘Hau’ süra ‘Hau’ mesüra ‘Nunga’ süra ‘Nunga’ ta südakjang. Aser kechisa item dakji tali jembidir, tamajungba nungi adoker.

³⁸“Ya ashiba nenoki angashiogo, ‘Tenük melen tenük, aser tepu melen tepu.’

³⁹Saka ni nenok dang ashir, Tamajunger den terara; saka shibai ne tenibong tajichi nung madir, pa tsütsü tabelenjia tendakang.

⁴⁰Aser kati ne den okai ora, aser ne süpoksü aginüra, pa nem süa agidakjang.

⁴¹Aser shibai na mile ka jajadaktsüdir, pa den anasü oang.

⁴²Shibai ne dang meshir pa nem agüjang, aser shibai ne dang apunüdir pa nungi ne tejak temeyip.

⁴³ “Ya ashiba nenoki angashiogo, ‘Nai ne kiyonger dang meimang, aser ne tsükchir sempaang.’

⁴⁴Saka ni nenok dang shidi, nenok tsükchirtem meimang aser shiri nenok rishikangshir parnok asoshi sarasademjang.

⁴⁵Anungji kotak nung aliba nenok Tebu chirtem nenok akümtsü. Kechiaser pai tamajunger aser tajunger madak pai anü adokdaktsür aser ochishir aser ochi mashir madak tzünglu aludaktsür.

⁴⁶Kechiyong nenok meimertem dang tang nenoki meimra kechi tajangzük aka? Alimelen sarurtemia yamaji meinyaker ama?

⁴⁷Nenoki adianutem dang salem ta shira nenoki tangar dang tali kechi inyak? Bendangertemia yamajibo meinyaker ama?

⁴⁸ Anungji nenok kotaker Tebu koda tabensa lir, yamaji nenoka tabensa liang.