Read njo MARK 11 Bible Online

MARK 11 - njo bible

MARK 11

¹Kodang Parnoki Yirusalem anasai aru, Oliv tenem jakdang Bethfage aser Bethani nung, pai pei nütsüng rongnungi ana yoka,

²parnok dang ashi, “Nenok jakdang aliba yim jagi oang, aser nenok ajagi aidang nisungi kodanga memendangba gado chanu ka idakji sentaka angutsü; aji sala-ang aser anir arung.”

³“Kechiba nenoki ya inyaker” ta kari nenok dang asüngdangra, yamai langzüang, “Kibuba asoshi ya nüngdaker, aser pai yaktasa aji yagi meyipa anir yoktsü.”

⁴Parnoki ao aser kima yimdong nung, kishi tezülen, gado chanu ka sentaka angu; aser parnoki aji sala.

⁵Idakji noktaka alir kari parnok dang asüngdang, “Nenoki kechiba gado chanuji salar?”

⁶Parnoki Yisui ashiba amaji parnok dang langzü; aser parnoki parnok odaktsü.

⁷Parnoki gado chanuji Yisu dangi anir aru, aser parnok sü iba manungji lemloktsü aser pai idakji amen.

⁸Nisung aikati pei sü lenmang nungji lemtsü, kari süngojong arem nungi lepzüka bener arua lemtsü,

⁹ aser tejaklen aortem aser tesülen anitakertem ajaki ayimtena ashi, “Hosanna! Tsüngrem tenüng nung shiba arur sangang!

¹⁰Asen tebu Dawid yimli koba arur, sangang. Tematiba nung Tsüngrem sangang!”

¹¹Pai Yirusalemi arua tenla kidangi ai; aser ajak meketa repranger nikongtsütsü asünung terana den Bethani-i ao.

¹²Asüngji kodang parnok Bethani nungi aru, pa yaadok.

¹³Aser mungudong ka to keter talang nung oagi ngua, idakji pai langka ngudisü ta aru. Kodang pa ajagi aru, süngo dak alema pai kecha mangu, kechiyong aji mungu atangwa masü.

¹⁴Idangji pai mungudong dang ashi, “Tang nungi teti shingaia ne dak nungi süngjang machitsü.” Aser pa nütsüngtemi aji angashi.

¹⁵Parnok Yirusalemi aru aser pai tenla kidangi ai aser tayokertem o talirtem tenla kidang nungi arizüka yoktsü tenzük; sen melenertem langbang aser guduru ayokertem menden mekeptoktsü,

¹⁶aser tenla ki ajanga oset abentsü pai memela.

¹⁷ Pai parnok dang sayua ashi, “Kin ajak asoshi kü kiji sarasademba ki ta ajatsü ta zülua melika ma? Saka nenoki aji rakzükraktemer leprungki kümdaktsüogo!”

¹⁸Puti-ungertem o tezülurtemi ya angashia pa samatsütsü bushimeso. Saka parnoki pa tsübu, kechiyong telok ajaki pai sayuba nung süngmang.

¹⁹Kodang nikongtsütsü aru, Yisu aser pa nütsüngtem yimti nungjagi pila ao.

²⁰Anepdang parnok süidang, mungudongji toa dena azülar parnoki angu.

²¹Peteri bilemtet aser Yisu dang ashi, “Tesayur, ajiangjo, nai atakatemba mungudong to aruzükogo”

²²Yisui parnok dang langzü, “Nenoki Tsüngrem dak tamang ka-ang;

²³ atangji ni nenok dang ashir, kari iba tenem dang, ‘ajungketang aser tzüyim nungji ajungokang’ ta shidir, aser temulung nung matitaki amangdir, pa dang yamaji inyaktsü.

²⁴Anungji ni nenok dang ashir, kechi asoshisa nenoki sarasademdir aser meshidir, nenoki itemji nguogo ta amangang aser nenoki itemji angutsü.

²⁵ Aser kodangsa nenoki noktaka sarasademdir, kari ne madang aia kara tai tokang; anungji nenok Tebu shiba kotak nung lir paia nenok dang nenok tai atoktsü.

²⁶Saka nenoki tai metokra, nenok Tebu shiba kotak nung lir paia nenok taitem matoktsü.”

²⁷Aser parnoki Yirusalemi tanaben aru. Yisu tenla kidang senzüya alidang, puti-ungertem o tezülurtem aser tamburtem pa dangi aru,

²⁸aser parnoki pa dang ashi, “Kechi tashi-ain agi nai itemi inyaker, mesüra itemi inyaktsü tashi-ain shibai ne nem agütsü?”

²⁹Yisui parnok dang langzü, “Nia nenok dang langka asüngdangdi: kü dang langzüang, aser kechi tashi-ain agi ni item inyaker nenok dang shidi:

³⁰Yohan baptitsüba kotak nungi asü mesüra meimchir nungi? Kü dang langzüang.”

³¹Parnoki parnok rongnung ashishitepa jembitep,“kotak nungi ta asenoki shira, ‘kechiba nenoki pa dak mamanger’ ta pai ashitsü.”

³²Aser meimchir nungi ta shira parnoki nüburtem tsübu, kechiyong ajaki Yohanji chichiba ainkar ka ta bilem.

³³Anungji parnoki Yisu dang langzü, “Onoki meshitet.” Anungji Yisui parnok dang ashi, “Sürabang, kechi tashi-ain agi ni itemi inyaker nia nenok dang meshili.”